Abantu bizihiza uyu munsi mu buryo butandukanye bitewe n’ibyo bakunda cyangwa n’aho bari bagamijwe kwishimisha no kwishimana n’ababo.

IGIHE yabateguriye ibikorwa bitanu ushobora gukora kuri Noheli ukishimisha ndetse ukaba wanasabana n’abawe mu buryo bwiza kandi bitagutwaye amikoro menshi.

Kujya gusenga

Abantu bizihiza Noheli ni abakristu bamwe bemera Yesu/Yezu kimwe mu bikorwa byo gukora kuri uyu munsi harimo kujya gusenga, kuko hirya no hino mu nsengero na kiliziya haba hari inyigisho zijyanye n’uyu munsi.

Gusangira n’abawe

Mu Rwanda n’ahandi ku Isi, kimwe mu bikorwa ku minsi mikuru ni ugusangira no gutegura amafunguro adasanzwe mu kwishimisha kuri uyu munsi.

Ushobora gutegura amafunguro mu rugo ugatumira inshuti n’abavandimwe mugasangira, kimwe n’uko mushobora gusohokera ahandi hantu nko muri resitora cyangwa hoteli mugasangira mwizihizanya uyu munsi.

Gutanga impano

Ibirori bya Noheli aba ari umwanya mwiza wo kwegerana n’abawe no kubereka urukundo mu buryo butandukanye, kimwe mu bikorwa cyane ni uguhana impano by’umwihariko ku bana ibizwi nka ‘Père Noël’.

Si abana gusa n’abakuru bahana impano mu kwishimana ushobora gufata umwanya ukagenera abawe impano bitewe n’ibyo bishimira cyangwa urwibusto ushaka ko basigarana ku mutima.

Kureba filimi zigaruka kuri Noheli

Akenshi usanga Noheli yizihirizwa mu miryango biba byiza iyo ibirori byo kwishimisha nk’umuryango n’inshuti nyuma y’icyo gihe cyo kwishimisha mushobora kureba filimi zijyanye n’uwo munsi.

Zimwe muri filimi ushobora kureba kuri uyu munsi ni ‘Falling for Christmas’, ‘Santa Claus is Comin’ to Town’, ‘Single All the Way’, ‘The Princess Switch’ n’izindi.

Gukora ibikorwa by’ubugiraneza

Nubwo uba uri kwishimisha ariko uba ugomba kwibuka n’abadafite ubushobozi bwo kwishimisha mukaba mwasangira ku minsi mikuru. Ushobora gufata kuri ya mafunguro watetse cyangwa ibindi ukabisangira n’abatabashije kuyabona uwo munsi.

Gufata amafoto mu muryango ni kimwe mu bintu byakorwa kuri Noheli ikarushaho kuryoha

Gusangira n'abawe biba byiza kuri Noheli

Guhana impano kuri Noheli bituma urushaho kwishimana n'abawe