00:00:00 IGIHE NETWORK KN KINYARWANDA EN ENGLISH FR FRANCAIS

Ibidasanzwe kuri Barack Obama, umwirabura wa mbere wayoboye Amerika

Yanditswe na Mugisha Christian
Kuya 7 July 2022 saa 12:23
Yasuwe :

Barack Hussein Obama ni umunyapolitiki w’Umunyamerika wavutse tariki ya 4 Kanama mu 1961, avukira mu gace ka Honolulu, muri Hawaii muri Leta Zunze Ubumwe za Amerika.

Uyu mugabo wakunwe na benshi kubera imbwirwaruhame ze ziryoheye amatwi yaminurije amashuri ye muri Kaminuza ya Columbia mu 1983.

Barack ubarizwa mu ishyaka ry’aba-démocrate yabaye Perezida wa 44 wa Amerika, kuva mu 2009 kugeza 2017 ari nawe perezida rukumbi wabayeho w’Umwirabura muri iki gihugu.

Mu buzima butandukanye yagiye abamo kuva avutse, mu ishuri ndetse na nyuma yaryo, Barack Obama hari ibintu byinshi yagiye amenyekanamo.

Muri iyi nkuru tugiye kugaruka ku bintu bimwe bitangaje kandi bidasanzwe kuri uyu wayoboye Amerika imyaka umunani.

Yasomye ibitabo byose bya Harry Potter

‘Harry Potter’ ni igitabo cyanditswe n’Umwongereza, J. K. Rowling gikundwa n’abatari bake ku Isi.

Iki gitabo cyerekana ubuzima bw’umukonikoni ukiri muto, Harry Potter, n’inshuti ze Hermione Granger na Ron Weasley, bose ari abanyeshuri mu ishuri rya Hogwarts.

Gifite imizingo umunani yasohotse mu bihe bitandukanye harimo icyitwa Harry Potter and the Philosopher’s Stone cyo mu 1997, Harry Potter and the Chamber of Secrets cyo mu 1998 n’ibindi. Ibi byose Obama yarabisomye.

Obama kandi yagiye anasoma ibindi bitabo bitandukanye, rimwe cyangwa kabiri mu mwaka asohora urutonde rw’ibitabo akunda mu rwego rwo gushishikariza abandi kubisoma.

Yanywaga itabi

Barack Obama yavuze ko ubwo yari muri kaminuza, we n’itsinda ry’inshuti birukanwe ku ishuri bazira kunywa itabi.

Ibi yabitangaje ubwo yatangiraga kwiyamamaza kuzahagararira ishyaka ry’aba-démocrate mu matora y’umukuru w’igihugu.

Ubwo benshi bari batangiye kwibaza niba yaranywaga urumogi yahise avuga ko ryari itabi ndetse yongeraho ko igihe cyageze akaza kubireka.

Niwe watangije konti ya Twitter ya Perezida wa Amerika

Mu 2015 Barack Obama yafunguye ku mugaragaro urukuta rwihariye rwa Perezida wa Amerika (@POTUS) azajya akoresha. Yarufunguye agamije kwiyegereza mu buryo butaziguye Abanyamerika abaha urubuga rwo kuganira nabo.

Kuva ubwo uyoboye iki gihugu ahabwa uru rukuta agakoresha izina ‘@POTUS’.

Yabaye Perezida wa 6 wa Amerika wandikisha imoso

Abahanga mu bya siyansi bemeza ko abantu bakoresha ukuboko kw’ibumoso igihe bandika baba bafite ubushobozi bwo gutekereza cyane, ibi bigashimangirwa n’uko ijanisha ryinshi ry’abatsindiye igihembo cyitiriwe Nobel nk’abanditsi n’abanyabugeni bakoresha ukoboko kw’imoso.

Mu gihe 10 ku ijana gusa by’abaturage batuye Amerika bakoresha ukuboko kw’ibumoso, batandatu muri ba perezida 14 baheruka ku butegetsi bw’iki gihugu nabo bandikisha imoso.

Barack Obama yabaye Perezida wa munani wa Amerika wandikisha ukumoso nyuma y’abandi nka, James Garfield, Herbert Hoover, Harry Truman, Gerald Ford, Ronald Reagan, George H.W. Bush na Bill Clinton.

Niwe wa mbere wemeje gushyingiranwa kw’abahuje ibitsina muri Amerika

Mu 2012 Barack Obama yavuze ko ku giti cye abaryamana bahuje ibitsina bakwiye uburenganzira bwo kuba bashyingiranwa bakabana.

Mu kiganiro n’umunyamakuru wa ABC News, yagize ati “Ku bwanjye ndumva ari ngombwa ko abaryamana bahuje ibitsina babona uburenganzira bwo gushyingiranwa.”

Byamugize Perezida wa mbere w’Amerika mu mateka wagaragaje ugushyigikira uburenganzira bwa muntu ku bakundana bahuje ibitsina.

Barack Obama ni umwe mu bantu bake bayoboye Amerika bandikisha ukuboko kw'imoso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .