00:00:00 IGIHE NETWORK KN KINYARWANDA EN ENGLISH FR FRANCAIS

Guhabwa amafaranga bishobora gutuma umuntu atakaza ibilo vuba-Ubushakashatsi

Yanditswe na Uwase Kevine
Kuya 2 Mutarama 2023 saa 11:32
Yasuwe :

Ubushakashatsi bwagaragaje ko guha amafaranga abantu bibatera umurava wo kugabanya ibilo, kurusha abahawe ibikoresho bakwifashisha harimo ibitabo ku bijyanye n’imirire myiza, ibikoresho bya siporo, porogaramu zibafasha mu kugabanya ibilo n’ibindi.

Ubushakashatsi bwatangajwe muri JAMA Internal Medecine Journal, Dr. Melanie Jay umuganga mu bijyanye no kuvura indwara z’umubyibuho ukabije muri Leta zunze ubumwe Amerika, yagaragaje ko abenshi mu bafite iyi ndwara baba bafite ibibazo by’amafaranga.

Ati “40% by’abaturage ba Amerika bafite indwara y’umubyibuho ukabije, umubare uri hejuru ku bafite ibibazo by’amafaranga.”

Mu igeragezwa ryo kureba niba guha amafaranga abantu bizabatera kugabanya ibilo, Dr. Melanie n’abagenzi be bafashe abarwayi 688 bari hagati y’imyaka 18 na 70, bivuzaga indwara y’umubyibuho ukabije mu bitaro byo mu mijyi ya Leta zunze ubumwe Amerika harimo New York na Los Angeles.

Aba baganga bashyize mu matsinda atatu aba barwayi, icyiciro cya mbere cyahawe ibikoresho bisanzwe byo kugabanya ibilo, amasomo ajyanye n’imirire myiza, kubagenera ibyo kuryo, ndetse no gusurwa n’abaganga buri kwezi.

Itsinda rya kabiri ryahawe amafaranga bitewe n’ibilo bataye, itsinda rya gatatu rigahabwa amafaranga mu rwego rwo kuguma kuri gahunda yo guta ibilo, harimo kurya ibiryo birimo intungamubiri, kureba muganga buri cyumweru no gukora siporo iminota 75 buri cyumweru.

Buri wese mu itsinda yashoboraga guhabwa amadolari 750, asaga ibihumbi 800 by’Amanyarwanda.

Abenshi mu barwayi bari bafite ibiro 218, mu mezi atandatu abo mu itsinda rya mbere ritahabwaga amafaranga, abangana na 22.1% bataye ibilo bingana na 5% gusa , ugeranyije n’abahawe amafaranga bangana na 39% bakurikije amabwiriza ya muganga na 49.1% bahabwaga amafaranga bitewe n’ibilo bataye.

Dr. Melanie Jay yavuze ko nubwo abo mu cyiciro cya mbere bataye 5% gusa by’ibilo byabo ugeranyije n’abandi, yemeza ko kumenyereza ubwonko imyitwarire yo kugira ubuzima bwiza ukora siporo no kurya ibiryo birimo intungamubiri, aribyo bigira umumaro ku buzima bw’umuntu.

Imbogamizi ni uko akenshi hari abatabasha kubona iyo ndyo yuzuye, ibikoresho bya siporo bigezweho n’ibindi bituma bahangayika kuko nta bushobozi babifitiye.

Ubushakashatsi bwagaragaje ko guha abantu amafaranga bishobora kwihutisha gahunda yo kugabanya ibilo ku bafite umubyibuho ukabije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .