Ese Yesu yaba yari umunyabufindo?

Yanditswe na Zigiranyirazo Bajecteur
Kuya 2 Ukuboza 2020 saa 03:29
Yasuwe :
0 0

Ububasha bwo gutsinda urupfu akazuka, gukiza indwara, kuzura abapfuye, gutubura amafi n’imigati no guhindura amazi divayi mu bukwe bw’i Kana ni bimwe mu bigaragara hashingiwe ku mateka nk’ibitangaza Yesu yakoze akiri ku Isi.

Ibi bitumwa hari abibaza niba koko abo mu gihe cye abariho baramubonaga nk’umukonikoni, aba wakwita abanyabufindo bakora ibintu bidasanzwe cyangwa se umunyabitangaza.

Hejuru y’ibintu bidasanzwe byaranze ubuzima Yesu yabayemo mu Isi, abakirisitu ba kera ntibigeze bamufata nk’umukonikoni kubera ko ibyo bo babashaga gukora mu gihe cye bitarimo nko kugaragaza imbaraga zidasanzwe zo kuzura abapfuye bigatuma abizera b’icyo gihe bemeza ko ari ibitangaza byabayeho binyuze mu mbaraga z’Imana zonyine.

-  Ubukonikoni n’ubukirisitu mu gihe cyo hambere

Mu gihe cy’intangiriro y’ubukirisitu nko mu Kinyejana cya Gatatu n’icya Munani, imigenzo y’abapfumu n’abakonikoni na yo yari ihari cyane.

Mu gitabo “The Rutledge Handbook of Early Christian Art” cyanditswe na Lee Jefferson avugamo ko mu gihe cy’Ubwami bw’Abaromani abantu bari mu gihirahiro cyo kumenya ibyo bakwizera hagati y’ibishingiye ku bupfumu n’ubukonikoni ndetse n’ibyerekeye ku bukirisitu.

Byabaye ngombwa ko ubwo bwami bufata ingamba zo guhagarika ikorwa ry’imigenzo yose ijyanye n’ubupfumu n’ubukonikoni nubwo bitabujije abantu gukomeza kubikorera mu bwihisho. Ibi byabaye icyasha n’igihanda ku bayobozi bari bashyigikiye banashyize imbere ubukirisitu nk’uko Jefferson abivuga.

Hari abantu bamwe beruye bakavuga ko ubukirisitu na bwo ari ibintu bishingiye ku bupfumu n’ubukonikoni kubera ukuntu abantu bashobora kwihuriza hamwe bakanywa divayi barangiza bakavuga ngo “aya ni amaraso ya Yesu”, bakongera bakarya umugati hanyuma bakavuga ngo “uyu ni umubiri wa Yesu”.

Jefferson avuga ko iyi yonyine yaba impamvu ituma abantu batekereza ko Yesu yakoreshaga imbaraga zidasanzwe “magie”.

Abakirisitu bo bavuga ko Yesu ibyo yakoraga ari ibitangaza abifashijwe n’imbaraga z’Imana bitari ubupfumu cyangwa ubukonikoni.

Jefferson akomeza ashimangira ko abakirisitu badakunda kumva umuntu ushaka kwita Umwami wabo umukonikoni kuko ngo byabagaragaza nk’abanyembaraga nke.

Umunyamateka mu Ishuri rya Yale Divinity, Felicity Harley-McGowan, we avuga ko imbaraga zafashije Yesu kuzuka agatsinda urupfu, gukiza indwara, gutubura ibyo kurya no guhindura amazi mo divayi byahise bimuzamura bikamushyira hejuru y’ibigirwamana Abaromani bizeraga.

Mu Bugiriki ho hari ikigirwamana cyitwaga Asclepius cyari gifite ubushobozi bwo gukiza abantu indwara binyuze mu nzozi mu gihe Yesu we yakoreshaga ikiganza cye kandi mu buryo butaziguye.

Iki kigirwamana cyaje kwicwa kizize kuzura umuntu mu gihe Yezu we yabihererwaga ikuzo.

Abayuda barenze ibyo gufata Yesu nk’umukonikoni ahubwo bamubona nka Musa mushya ku bw’ibitangaza byaranze ubuzima bwa bombi.

Abayuda barenze ibyo gufata Yesu nk’umukonikoni ahubwo bamubona nka Musa mushya ku bw’ibitangaza byaranze ubuzima bwa bombi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .