00:00:00 IGIHE NETWORK KN KINYARWANDA EN ENGLISH FR FRANCAIS

Ese koko nta rukundo rukibaho?

Yanditswe na Zigiranyirazo Bajecteur
Kuya 20 June 2022 saa 04:47
Yasuwe :

Urukundo rusobanurwa n’abantu mu buryo butandukanye aho bamwe baruvuga bashingiye ku mikoranire, imibonano mpuzabitsina cyangwa bakarusobanura nk’ikintu gishingiye ku bitekerezo bijyana n’ibimenyetso ukunda agaragariza uwo akunda.

Muri iki gihe, hakunda kumvikana amajwi y’abantu benshi baba bavuga ko nta rukundo rukibaho n’abitwa ko barurimo batakirangwa n’ibikorwa byo kwitanaho bigaragiwe n’ubwuzu n’urugwiro ku buryo bigeze aho nko muri Leta Zunze Ubumwe za Amerika imibare y’abadafite abakunzi bahamye yazamutse ku rugero rwa 50% kuva mu 1986.

Muri Amerika kandi ubu bivugwa ko abantu batagishamadukira ibyo gukora imibonano mpuzabitsina ku rugero bitigeze bibaho kuva mu 1989 ndetse n’abizihiza umunsi ufatwa nk’uw’abakundanye witiriwe Mutagatifu Valentin uba ku wa 14 Gashyantare buri mwaka, umubare wabo wagabanutse ugereranyije n’uko byabaga bimeze mu myaka ya za 2000.

Igabanuka ry’iyi mibare bavuga ko ritatewe na COVID-19 kuko ryatangiye kugaragara cyane na mbere y’uko haduka icyo cyorezo ku buryo byasunikiye abanditsi n’abasesenguzi kwibaza ku mpamvu yabyo, niba ari urukundo rutakibaho n’icyaba cyarabiteye.

Umwanditsi wa CNN avuga ko mu by’ukuri yasanze atari uko urukundo rutakibaho ahubwo agaragaza ko rusigaye ruboneka mu ishusho itandukanye n’uko mbere byagaragaraga.

Ibiganiro bica kuri za televiziyo bizwi nka “reality shows” byahinduye byinshi mu buryo abantu bakundana ku buryo ubu bigaragara mu isura nshya ugereranyije n’uko byabaga bimeze mbere bitewe n’izo kinamico na filimi akenshi bigaruka ku rukundo harimo n’izamamaye cyane nka “Love is Blind”, “Love on Spectrum”, “Indian Matchmaking” n’izindi.

Adriana Herrera wandika ibitabo bikubiyemo inkuru ndende, avuga ko ibyo abantu bafata nk’igisobanuro cy’urukundo bisigaye bitandukanye ugereranyije no mu gihe cyashize.

Ati “Birashoboka ko ibyo abantu baba biteze nk’urukundo bitandukanye n’uko byabaga bimeze mu myaka ibarirwa mu binyacumi ishize.”

Yongeyeho ko muri iyi minsi sosiyete isigaye yakira uburyo butandukanye abantu bakundanamo bigizwemo uruhare n’itangazamakuru ku buryo usanga hari abakundana bagamije iby’imibonano mpuzabitsina gusa, hakaba abakundana baremeranyije kudakozwa ibyo kuryamana ndetse bikaba binagenda bimenyerwa ko abantu badahuje ibara ry’uruhu cyangwa inkomoko bashobora kwisanga bari mu rukundo.

Uyu mwanditsi akomoza no ku mpamvu ituma benshi batacyihutira ibyo gushaka aho avuga ko basigaye baba bafite ibintu byinshi bagenderaho ku buryo kubona umuntu ubyujuje byose biba bitoroshye.

Imibare igaragaza ko mu bavutse hagati ya 1981 na 1996, abagera kuri 44% ari bo babashije gushaka abagore cyangwa abagabo kugera muri 2019 mu gihe abavutse hagati ya 1965 na 1980, abangana na 53% ari bo bateye iyo ntambwe muri icyo gihe, abo hagati ya 1946 na 1964 ni 61% naho aba mbere y’icyo gihe; ni ukuvuga abavutse hagati ya 1928 na 1945 bagera kuri 81% babashije gutera intambwe yo gushaka nk’uko bigaragazwa n’Ikigo cy’Ubushakashatsi cya Pew.

Muri raporo iheruka gusohorwa n’iki kigo, hagaragajwe ko abavutse mu myaka ya 1980 na 1990, abagera kuri bibiri bya gatatu bateganya kuzatera intambwe yo gushaka umunsi umwe mu gihe abangana na kimwe cya kane bo bavuga ko batarabona umuntu ujyanye n’inzozi zabo.

Ubushakashatsi bwasohotse mu mwaka ushize, bwagaragaje ko umubare w’abantu bavaga mu cyiciro cy’ingaragu wagabanutse bigizwemo uruhare n’iterambere ry’ikoranabuhanga aho urubyiruko rusigaye ruhugira cyane ku mikino itandukanye ijyanye n’ikoranabuhanga abandi bagahugira mu kunywa inzoga ku buryo batanagishamadukira ibyo gushaka bigatuma abantu bavuga ko nta rukundo rukibaho.

Indi mpamvu ivugwa nk’itera abantu kuvuga ko nta rukundo rukibaho, ni iy’uko hagezweho cyane ibyo guteretana no gukundana biciye kuri Internet ku buryo hatakibaho ibyo kuba abakundana babasha guhura bya hato na hato ariko ngo ibi ntibikwiye gusobanuro ko urukundo rutakibaho ku buryo abantu bakwiye kwitega ko bizanarushaho kugenda bifata indi ntera kurusha uko biri none.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .