00:00:00 IGIHE NETWORK KN KINYARWANDA EN ENGLISH FR FRANCAIS

Ese koko abagore bakunda abagabo bafite amafaranga kurusha abagaragara neza?

Yanditswe na Zigiranyirazo Bajecteur
Kuya 4 June 2022 saa 04:35
Yasuwe :

Ubushakashatsi butandukanye ku mitekerereze n’amahitamo bya muntu, bukunda kugaragaza ko hari ikinyuranyo kinini mu buryo abagore n’abagabo bagira amahitamo ku bintu umukunzi agomba kuba yujuje.

Icyo ubu bushakashatsi bukunze guhurizaho ni uko abagabo bakunda kwita ku bwiza n’ikimero mu gihe abagore bakunda kwibanda ku kijyanye n’amikoro kurusha uko umugabo agaragara inyuma ku mubiri, nubwo ku bagore binagaragazwa ko usanga bashobora gushingira ku bindi bitandukanye.

Mu gihe cyo guhitamo umukunzi cyangwa umuntu bashobora kuzabana nk’abashakanye, abagore bakunda kureba umuntu wifite aho impamvu isobanurwa nka gitera ari iyo kuba batekereza cyane ku muntu ufite ubushobozi bwababeshaho mu gihe umugore atwite afite imbaraga nke zo gukora cyangwa se mu gihe yabyaye agomba kwita ku mwana cyane.

Abagabo bo ibyabo birangirira ku kureba uko umugore akeye inyuma ku ruhu, isura ye, bakareba ikimero ndetse no ku bijyanye n’ubwiza bw’imisatsi, ku buryo ibindi bishingiye ku mikoro bitaza ku isonga mu bishobora kubashitura.

Mu myaka igera ku bihumbi 200 ishize, abantu bakundaga kubaho mu matsinda aho akenshi babaga batunzwe n’ubuhigi bwakorwaga n’abagabo mu gihe muri iyi minsi uhereye mu myaka ibihumbi 10 urwego rw’ubuhinzi rwadutse rukanatera imbere cyane ku buryo usanga abagore bazwiho gukunda gutahana ihaho rishingiye ku mirire mu gihe cy’umugoroba.

Psychology Today ivuga ko kuba abagore biyiziho ubushobozi bwo kuba babasha kwibonamo ibitunga umuryango by’umwihariko ibishingiye ku mirire bikomoka mu buhinzi uhereye muri iyo myaka ya kera, ari imwe mu mpamvu zituma bumva ko ibituruka ku mugabo bikwiye kuba bishingiye ku mafaranga kugira ngo babashe no kwihaza mu bindi bintu nkenerwa mu muryango nk’ibijyanye n’ubuvuzi, imyigire y’abana n’ibindi.

Mu gihe cya kera, abagabo batahanaga umuhigo utubutse w’inyama, wasangaga bafite igikundiro kurusha abandi imbere y’abagore ku buryo n’ubundi icyo gihe unagerageje kubisanisha n’ubu, babaga ari abagabo bafite igituza n’imikaya ibyimbye byabahinduraga abanyembaraga cyane bikanababera imbarutso yo kuza guhigukana umuhigo uruta uwo abafite urubavu ruto batahukanaga.

Uyu mugabo ushinguye kandi ufite imikaya n’igituza bibyibye no ku gihe cya none bari mu bashobora gukurura abagore, icyakora aha ubushakashatsi buvuga ko bakurura cyane abagore baba bifuza abakunzi b’igihe gito batabafitemo umugambi muremure w’ahazaza.

Alice Eagle, umuhanga mu by’imitekerereze ya muntu, avuga ko kuba abagore bashobora kwita ku butunzi kurusha uko bita ku isura mu gihe cya none, ari ibintu bishingiye ku buryo bw’imibereho isi irimo ku buryo we kuri iki gihe avuga ko n’ibyo kuba umugore yabasha kubona ibyerekeranye n’ifunguro bitacyoroshye kuko bisaba umunyembaraga ahubwo ugasanga ubu abagore babasha cyane ibyerekeye imirimo yo mu rugo nko kwita ku bana, gutegura n’isuku.

Agaragaza ko kuba n’ibyo byabashobokeraga mbere bisigaye bigoranye none, ari impamvu ituma bakunda abagabo bafite uburyo n’amikoro ku buryo icyo gukururwa n’ab’ibigango batahanaga umuhigo, byagiye bikura bigahindukamo gukunda abafite ubutaka buhagije, abacuruzi, abakora mu biro n’abayobozi b’amadini.

Nubwo bimeze bityo ariko, abasesengutsi bavuga ko hashingiwe ku buryo mu kinyejana cya 20 n’icya 21 abagore benshi bahagurukiye icyo guharanira uburenganzira bwabo no kurwanya ubusumbane bugaragara hagati y’umugore n’umugabo ku gaciro bahabwa, ibi bishobora kuzatuma mu gihe kiri imbere abagore bazajya bakora amahitamo bashingiye ku isura n’imiterere y’umugabo gusa aho gushingira ku butunzi bitewe n’uko abagore bazaba biyizeye ku kwihaza mu byo bakenera bitagombeye ukuboko kw’umugabo.

Abashakashatsi bagaragaza ko hari impamvu zituma abagore bakunda abagabo bafite amafaranga kurusha abagaragara neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .