00:00:00 IGIHE NETWORK KN KINYARWANDA EN ENGLISH FR FRANCAIS

Ese inyamaswa na zo zaba zifuhirana nk’abantu?

Yanditswe na Zigiranyirazo Bajecteur
Kuya 7 June 2022 saa 01:34
Yasuwe :

Gufuha ni ikintu kimenyerewe hagati mu bantu by’umwihariko abakundana, aho akenshi bibyutswa no kubona hari undi muntu ushaka kukugira mu mwanya ugatekereza ko byazarangira akunyaze ibyo wari ufite.

Gufuha bitandukanwa n’ishyari kuko ryo rikunda guturuka ku kintu umwe yagezeho undi adafite cyangwa atifuzaga ko yageraho.

Ku ruhande rw’inyamaswa, abatunze izororerwa mu rugo bashobora gutanga ubuhamya ku kuntu nazo zigira iyi ngeso ku buryo iyo hari iyabaga mu rugo ari yonyine ikabona bazanye indi, itangira kurangwa n’imyitwarire idasanzwe no guhangayikira uko imibereho yari ibayemo igiye guhinduka.

Uretse ibyo abantu bashobora kubonesha amaso, hanifashishijwe ubushakashatsi, byagaragaye ko gufuha ari ikintu abantu bahuriyeho n’inyamaswa by’umwihariko imbwa ndetse n’izindi zifitanye isano ya hafi n’umuntu nk’inguge, inkende, ingagi n’izindi.

Abahanga mu by’imitekerereze ya muntu, bavuga ko ishyari ritandukanye no gufuha kuko ishyari riziramo n’urwango ku buryo bishobora kubyara ibikorwa by’ubugome.

Icyo ubushakashatsi bwinshi buhurizaho, ni uko gufuha bishingira ku bantu cyangwa inyamaswa zidahuje igitsina cyane iyo hari umubano udasanzwe hagati y’abo bantu cyangwa hagati y’izo nyamaswa.

Bugaragaza kandi ko bishobora kuba no mu zindi nzego z’ubuzima nko hagati y’abantu b’inshuti magara, abakorana cyangwa abo mu muryango umwe.

Ubushakashatsi bwo mu 2014 bwakorewe muri Kaminuza ya Californie iherereye i San Diego, bwagaragaje ko ibyo gufuha binagaragara guhera ku mpinja zifite amezi atandatu aho zigaragaza iyo myifatire nk’igihe nyina agerageje kugira akandi kana agaragariza ubwuzu n’amarangamutima ku buryo byatumye bavuga ko gufuha bishobora kuba bivukanwa atari ibyigwa umuntu cyangwa inyamaswa bikuze.

Mu ikorwa ry’ubushakashatsi, abantu batunze imbwa, bafashe ibipupe bimeze nka zo maze batangira gusa n’ababikinisha babigaragariza ubwuzu n’urugwiro nyuma imibare igaragaza ko imbwa imwe muri eshatu yahitaga ijya kwitambika hagati ya shebuja n’iyo yindi y’igipupe ndetse imwe muri enye yo yahitaga inazana amahane isumira imwe y’igipupe ishaka kuyigirira nabi.

Imbwa zitagaragaje ifuhe, bivugwa ko zishobora kuba zari zavumbuye ko izindi zazanwe atari iza nyazo ari ibipupe cyangwa se bigaterwa n’uko zitari zifitanye umubano wihariye na ba nyirazo.

Abashakashatsi bavuze ko iyi myitwarire banayibonanye inkende hamwe n’izindi nyamaswa zikunda kubaho mu buryo bw’amatsinda zigakora imiryango by’umwihariko izifitanye isano ya hafi n’umuntu ndetse bavuga ko hakomeje kwigwa byinshi ku byerekeye amarangamutima y’inyamaswa.

Ubushakashatsi bwagaragaje ko inyamaswa zishobora gufuha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .