Dr Tedros yifurije Perezida Kagame umwaka mushya muhire mu Kinyarwanda gitomoye

Yanditswe na IGIHE
Kuya 1 Mutarama 2021 saa 12:12
Yasuwe :
0 0

Umuyobozi w’Ishami ry’Umuryango w’Abibumye ryita ku buzima (OMS) Dr Tedros Adhanom Ghebreyesus yifurije Perezida Kagame Paul Umwaka mushya muhire, benshi batungurwa n’uburyo yabikoze mu Kinyarwanda gitomoye.

Uku kwandika Ikinyarwanda kwa Dr Tedros kwaturutse ku ifoto Perezida Kagame yashyize hanze ari kumwe n’umwuzukuru we maze ayihererekesha amagambo yo kwifuriza ‘umwaka mushya inshuti, abantu bose muri rusange n’umuryango.”

Dr Tedros mu gusubiza ubu butumwa bwa Perezida Kagame, yakoresheje Ikinyarwanda, aho yagize ati “Urakoze cyane murumuna wanjye. Umwaka mushya muhire kuri wewe.”

Nubwo yanditse aho ‘wewe’ aho kuba ‘wowe’ benshi bamushimiye kuba yagaragaje ubushake bwo gukorasha Ikinyarwanda cyane ko n’ibyo uyu mugabo wo muri Ethiopia yakoze bitakorohera umunyamahanga wese.

Ababonye ubu butumwa bwa Dr Tedros batunguwe maze mu buryo bwo gutebya batangira kugaragaza ko ashobora no kuba akomoka mu Rwanda.

Uwitwa Isanintwari yagize ati “Burya Tedros azi Ikinyarwanda? Wabona iwabo ari i Nyamata.”

Uwitwa Ubuzima we yagize ati “ Hey Urakoze cyane DrTedros bivuze ikintu gikomeye kwandika Ikinyarwanda. Umwaka mushya muhire.”

Seth Bisimwa nawe yagaragaje ko yatunguwe n’Ikinywarwanda Tedros yavuze. Ati “ Hhhhhh, DrTedros ikinyarwanda urakizi kabisa, Umwaka mushya muhire.”

Uku gutungurwa kwa Bisimwa kunzwemo na Jean Marie Wild, maze nawe agaragaza ko yashimishijwe no kuba Dr Tedros yanditse Ikinyarwanda. Ati “Uranshimishije cyane DrTedros Abanyarwanda tukwifurije umwaka mwiza wa 2021.”

Dr Tedros asanzwe ari inshuti ikomeye y’u Rwanda, ndetse ubucuti afitanye na Perezida Kagame bukaba bukunze kugaragara mu butumwa bashyira kuri Twitter umwe agira icyo avuga ku wundi.

Mu ugushyingo Perezida Kagame yari aherutse kwandika ubutumwa bwo gushima uyu mugabo wari wabonye umwuzukuru we wa mbere.

Ifoto ya Perezida Kagame ateruye umwuzukuru we yatumye Dr Tedros yandika mu Kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .