Diamant idasanzwe yagurishijwe kuri miliyoni 26,6$ muri cyamunara

Yanditswe na IGIHE
Kuya 12 Ugushyingo 2020 saa 02:06
Yasuwe :
0 0

Diamant ifite ibara rijya gutukura (purple-pink) yacukuwe mu Burusiya, yagurishijwe miliyoni $26.6, ni ukuvuga nibura miliyari 26 Frw, muri cyamunara yabereye mu Busuwisi kuri uyu wa Gatatu.

Ikigo gikora za cyamunara, Sotheby’s, cyavugaga ko iri buye ry’agaciro ryahawe akazina ka "The Spirit of the Rose," rishobora kugurwa hagati ya miliyoni 23$ na miliyoni 38$.

Igiciro fatizo cyari amafaranga miliyoni 21 z’amasuwisi, ariko hashyizweho na komiziyo kiza kugera kuri miliyoni 24,4 z’amafaranga y’amasuwisi, ahwanye na miliyoni 26,6$.

Sotheby’s yatangaje ko iri buye ryaguzwe n’umuntu watanze igiciro kuri telefoni ariko utatangajwe amazina.

Impuguke mu bijyanye n’imirimbo ikoze mu mabuye y’agaciro, Benoit Repellin, wayoboye iri gurishwa, yavuze ko iki giciro kibaye icya mbere mu mateka gihanitse, kiguzwe diamant ifite iryo bara.

Yapimaga ‘carats’ (soma kara, igipimo gikoreshwa mu gupima diamant) 14.83, ni ukuvuga nibura garama 2.966, ari nayo nini yabashije kuboneka ifite iryo bara. Yabonetse ikuwe kuro diamant nini cyane yacukuwe mu Burusiya mu 2017.

Mu zindi zagurishijwe akayabo, muri Gicurasi 2016 diamant nini yiswe Oppenheimer Blue, yashyizeho agahigo ko kugurwa miliyoni 50,6$, gusa uwayihashye ntiyatangajwe.

Ni mu gihe mu Ugushyingo 2015, diamant yiswe The Blue Moon yaguzwe n’umuherwe Joseph Lau wo muri Hong Kong, wishyuye miliyoni 48,4$. Yayiguriye umukobwa we w’imyaka irindwi, ahita anayimwitirira ayiha izina rya "Blue Moon of Josephine".

Ni mu gihe muri Gicurasi 2015, umuguzi utaratangajwe amazina yaguze ibuye ryo mu bwoko bwa Gemstone ryiswe Sunrise Ruby, kuri miliyoni 30$. Ni naryo buye ritari diamant ryabashije kugurwa amafaranga menshi kurusha andi.

Iyi diamant yagurishijwe kuri miliyoni 26,6$ muri cyamunara mu Busuwisi (Ifoto: Fabrice Coffrini/AFP/Getty Images)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .