00:00:00 IGIHE NETWORK KN KINYARWANDA EN ENGLISH FR FRANCAIS

Cambodge harobwe ifi nini ya mbere ku Isi mu ziba mu migezi

Yanditswe na IGIHE
Kuya 21 June 2022 saa 09:36
Yasuwe :

Abashakashatsi bavuze ko ifi yarobwe n’abaturage bo muri Cambodge mu mugezi wa Mekong, ari yo ya mbere nini ku Isi mu ziba mu migezi, aho ibarirwa ibiro bikabakaba 300 ku buryo byasabye abagabo 12 kugira ngo babashe kuyigeza ku nkombe.

CNN yatangaje ko iyi fi y’ingore yahawe izina rya “Boramy” mu rurimi rwa Khmer rukoreshwa muri icyo gihugu bikaba bisobanuye “inzora”, ni ukuvuga muri cya gihe ukwezi kuba kugaragara kose kuzuye, ifite metero enye z’uburebure ikaba yaje gusubizwa mu mazi nyuma yo gushyirwaho akuma k’ikoranabuhanga kazajya gafasha abashakashatsi gukurikirana imibereho yayo ya buri munsi n’imyitwarire yayo.

Zeb Hogan wamenyekanye cyane mu kiganiro cya “Monster Fish” ku muyoboro wa National Geographic, yavuze ko bishimishije kuba babashije kubona iyo fi.

Ati “Aya ni amakuru meza kubera ko ari yo fi ya mbere nini ku isi ikiri nzima.”

Yakomeje avuga ko ari iby’agahebuzo kuko bisobanuye ko umugezi wa Mekong ugifite ubuzima kandi ko ari ikimenyetso cy’ibyiringiro byo kuba amafi nk’ayo manini akiba muri uwo mugezi.
Boramy yari yafatiwe mu rushundura mu cyumweru gishize ikaba yarahise ikuraho agahigo k’ifi yari yararobewe mu majyaruguru ya Thailand mu 2005, aho yo yapimaga ibiro 293.

Ubwo iyi fi yo mu bwoko bwa Stingray yamaraga kurobwa, bahise bahamagara abashinzwe kurengera urusobe rw’ibinyabuzima mu mugezi wa Mekong n’inkengero zawo barimo na Zeb Hogan maze bayishyiraho akuma kazakomeza kujya kabafasha mu by’ubushakashatsi.

Umugezi wa Mekong uvugwaho kugira ubwoko butandukanye bw’amafi ariko ibikorwa by’uburobyi, umwanda no kutabungabunga ibidukikije neza, byagiye byangiza ubusugire bw’uwo mugezi ku buryo urusobe rw’ibinyabuzima ruhabarizwa byahagiriye imbogamizi zirimo no kugabanuka kw’ayo mafi nubwo hakomeza kugenda hafatwa ingamba zikaze zigamije kubungabunga ibidukikije.

Iyi fi yo muri Cambodge niyo ya mbere nini ku Isi mu ziba mu migezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .