Bya bihe! Iyibutse imikandara ya rukamata, Viscose n’ibindi byo hambere

Yanditswe na Uwiduhaye Theos
Kuya 20 Mutarama 2020 saa 12:53
Yasuwe :
0 0

Meddy mu ndirimbo yise ‘Amayobera’ yararirimbye ati “Ibihe biha ibindi […] bihinduka vuba bikibagirana….” Yashakaga kwerekana ko akenshi umuntu ugezweho mu rukundo na kanaka uyu munsi, ejo ashobora kugenda hakaza undi.

No mu bijyanye no kurimba n’ayandi mafiyeri, ibihe birahinduka icyari kigezweho uyu munsi kigateshwa agaciro n’ikindi cyaje kishimirwa na benshi bakagiharara.

Mu minsi ishize IGIHE yari yabakoreye inkuru ijyanye n’amafiyeri agezweho mu banyamujyi b’abanyabirori n’abandi bakunda kwisanisha n’abari muri uwo mujyo.

Ingero ni nyinshi mu byo twababwiye, zirimo Gutebeza ishati igice kimwe (Half Tuck), Kwambara agakapu ko mu rukenyerero (Waist Bag), Imikandara ya Cinture Donna, Do-rags (Durags) n’ibindi.

Si ab’ubu gusa usanga badukanye amafiyeri mu kurimba n’ibindi bya gisirimu kuko kuva na kera byahozeho. IGIHE yabakusanyirije amwe mu mafiyeri y’utuntu dutandukanye mu bihe byo hambere.

-Porte-clés ziri ku mugozi

Porte-clés y’umugozi wabaga wihinahinnye muremure wabaga ufite akuma kawufungira ku dukondo tw’ipantalo byabaga ngombwa ikaba izirikiye ku gakondo k’iburyo umusore akayizungurutsa imbere irereta za mfunguzo zigatebera mu mu mufuka w’uruhande rutandukanye n’uwo izirikiyeho.

Umusore wabaga afite iyo Porte-clés yabaga yihagazeho. Utarabaga ashobora kwigondera izo Porte-clés yashoboraga kwisunga amaduka akomeye akigurira utwuma tuzwi nk’ikanifu (Knife) twabaga tuzingiyemo utundi twinshi nk’udufungura Fanta, uduca inzara n’utuzisena, udufungura udukopo tw’inyama zakorewe mu nganda.

-Ipaki y’itabi rya filitiri mu isogisi n’akabiriti ka gaz

Mu myaka yo hambere ntiwashoboraga kuba wakwigondera inkumi mu gihe wabaga utazi gutumura agatabi kari kazwi nka filitiri cyangwa isigara. Ahanini muri icyo gihe amatabi yari agezweho nk’uko ab’iki gihe babivuga.

Yari arimo nka SM (Sweet Mentor), Impala ya Tabarwanda yahindutse Premier Tobacco, ndetse na Marlboro ryigonderaga na bake, hamwe abasore basorekaga banitoza uko bagatumura mu buryo bwa gisirimu.

Agatabi kabaga gasobetse hagati y’urutoki rwa mukubitarukoko na musumbazose maze uri kugatumura agahengeka umutwe asa n’uwifata selfie imitoma ikisuka nka Nyabarongo yisukanura mu Akagera!.

Byumvikane ko itabi ritatwarwaga uko umuntu yiboneye kose. Ipaki yaryo yabaga isesetse mu isogisi ipantalo ihinnye kugira ngo igaragare ariko umuti umwe w’itabi washoboraga gutwarwa ku gutwi.

Cendrier ku meza mu basirimu

Mu iterambere rigezweho kuri ubu iyo ugeze mu ngo z’abasirimu uhabona ibintu bitandukanye nka Frigo, Laptop ku meza, Televiziyo zizwi nka Flat ku nkuta n’ibindi nka Water Dispenser.

Kera ariko wasangaga udukoresho tuzwi nka Cendrier twabaga tugenewe gushyirwamo ivu ry’itabi. Wa musore rero mu gihe yabaga amaze kugatumura yabaga ahungura ivu ry’itabi mu busore n’ubukaka butangaje maze nyamukobwa yatereraho akajisho akavuga ati umusore n’uyu.

Mu mutima inkuba n’imirabyo by’urukundo byabaga byasana.

-Imikandara ya rukamata

Hari imikandara yambazwaga imyambaro yihariye nka Jeans zo mu bwoko bwa Saveco zigeze kubica bigacika. Yabaga ari imikandara minini y’umukara ifite utwuma tubiri twinjizwaga mu ntoboro z’umweru zabaga zizengurutse umukandara wose.

N’abakobwa kandi bagiraga iyabo idatoboye minini cyane bambaraga ku makanzu maremare ukabona rwose mu nda ni zeru kandi ntako hasa. Iyi mikandara ku bakobwa yanashoboraga guhambiranya ijipo n’agashati cyangwa agapira ukaba utapfa kumenya ko atari ikanzu imwe. Byahe byo kajya!.

-Isaha ya Disco cyangwa Seiko 5

Iyi ni isaha ikaze itarigonderwaga na benshi ariko umusore uyitwaye ku kuboko byamusabaga gukunja ishati maze ijambo rye si ukwijyana rigahurura. Umukobwa umubonye akava mu bye.

Amashati ya Viscose

Ni amashati yabaga ariho igisiga cya kagoma ‘Eagle’ inyuma yagiraga amapantalo yayo agenda ahuhwa n’umuyaga kandi ubwo ku mukunjo w’ipasi byabaga bicika. Yari amashati yakunzwe cyane mu bihe y’abasirimu ku buryo yambarwaga na bake.

-Abacost

Ni imyambarire yamamaye cyane mu myaka yo hambere, aho umuntu yadodeshaga ipantalo n’ishati y’amaboko magufi byose bisa.

Iyi myambarire hari abavuga ko yadukanywe na Mobutu wari Perezida RDC, icyo gihe yitwaga Zaire. Muri iki gihe iyi myambaro yambarwa n’abaperezida bamwe barimo; Kim Jong-un wa Koreya ya Ruguru.

Isaha ya Seiko 5 iri mu zakanyujijeho
Cendrier yifashishwaga n'abifite mu bihe byo hambere
Abacost nayo iri mu myambaro yagacishijeho mu bihe byo hambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza