00:00:00 IGIHE NETWORK KN KINYARWANDA EN ENGLISH FR FRANCAIS

Amerika yatangiye gukora igifaru kijyanye n’intambara zigezweho

Yanditswe na Bukuru JC
Kuya 1 Mutarama 2023 saa 02:55
Yasuwe :

Sosiyete yo muri Amerika, General Dynamics Land Systems yatangiye gukora igifaru gishya kitaremereye (light tank) kijyanye n’ibibazo by’mutekano, kizajya cyifashishwa mu ntambara zigezweho.

Iki gifaru cyiswe Mobile Protected Firepower, ni ubwoko bushya bw’ibifaru Amerika ishaka kubaka nyuma y’aho ubwoko bushya icyo gihugu cyaherukaga ari ubwubatswe mu myaka 40 ishize.

Icyo gifaru byitezwe ko kizaba cyihariye mu buryo cyubatsemo ku buryo bicyorohera kwihuta, bigaha umutekano umuntu ugikoresha kandi kikagira ubushobozi bwo kurasa neza ku rugamba.

Defense News yatangaje ko iki gifaru kizaba gifite imiterere yihariye haba mu buryo igikanka cyayo (chassis) kimeze ndetse n’umututu w’imbunda kizajya gikoresha, byose bizaba bifite ishusho itamenyerewe.

Biteganyijwe ko kubaka ibyo bifaru bizatwara miliyari 6 z’amadolari. Igifaru cya mbere kizaboneka muri uyu mwaka wa 2023. Igisirikare cya Amerika cyasabye ko mu cyiciro cya mbere hakorwa ibifaru 70.

Mu gihe ibi bifaru byaba bimaze kuboneka, Amerika iteganya kuguramo ibisaga 500 mu gihe cy’imyaka 30 iri imbere, bikaba byabonetse bitarenze 2035.

Igisirikare cya Amerika gisanganywe ibindi bifaru, ariko hubakwaga ibigendeye ku nyigo zisanzwe, hakagenda havugururwaho utuntu duke. Kuri iki gishya cyo byose bizaba ari bishya.

Igifaru Amerika yaherukaga gukora ni icyitwa M551 Sheridan cyakoreshejwe mu ntamba zirimo izo muri Vietnam, Panama ndetse no muri Arabie Saoudite.

Icyakora mu mwaka wa 1996 Amerika yahagaritse gukora izo modoka, kuva ubwo ntihaboneka izizisimbura.

Igisirikare cya Amerika cyatangaje ko cyari gikeneye ibifaru bishya kandi bitaremereye cyane, bibasha kwiruka ku rugamba no gufasha ingabo mu butasi bwa gisirikare mu bice birimo intambara.

Ibifaru bizwi nka Abrams Amerika yacungiragaho, bipima toni 70 ku buryo bitoroha kwiruka. Ibi bifaru bishya, kimwe kizaba gipima toni 38.

Amerika ivuga ko yari ikeneye ibifaru bishya bifite ubushobozi bwo guhangana n'ibibazo by'umutekano bigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .