00:00:00 IGIHE NETWORK KN KINYARWANDA EN ENGLISH FR FRANCAIS

Amenyo ashaje yahishuye inkomoko y’icyorezo cya Black Death

Yanditswe na Zigiranyirazo Bajecteur
Kuya 16 June 2022 saa 02:13
Yasuwe :

Abashakashatsi bemeje ko icyorezo cya Black Death cyatangiriye muri Kyrgyzstan, nyuma y’imyaka isaga 600 cyishe abantu benshi mu Burayi, Aziya na Afurika ya Ruguru.

Black Death ni kimwe mu byorezo bikomeye byibasiye abantu mu isi, ku buryo imibare ivuga ko cyahitanye ababarirwa hagati ya miliyoni 75 na 200 mu gihe cy’imyaka irindwi cyamaze.

Kuri ubu, abashakashatsi bo muri Kaminuza ya Stirling muri Ecosse bafatanyije n’abo mu ya Tubingen, bapimye amenyo yakuwe mu marimbi ari hafi y’Ikiyaga cya Issyk Kul muri Kyrgyzstan - rwagati muri Asia - ndetse bemeza ko ariho kiriya cyorezo cyahereye.

Hari haragiye hakorwa ubushakashatsi butandukanye ku nkomoko y’iki cyorezo kinazwi ku mazina ya Pestilence, Plague na Great Mortality, ariko kumenya aho cyatangiriye byarabaye ingorabahizi.

Kuri ubu aba bashakashatsi bemeza ko ibisubizo byavuye mu bizamini bakoreye ku menyo y’abashyinguwe hagati mu kinyejana cya 14 mu myaka ya 1338 na 1339, bibahamiriza ko muri Kyrygyzstan ari ho iki cyorezo cyatangiriye.

Dr Maria Spyrou wo muri Kaminuza ya Tubingen, yavuze ko itsinda ryabo ryakoze ubushakashatsi hapimwa ibimenyetso by’isanomuzi hifashishijwe amenyo yavuye ku mibiri y’abantu barindwi batandukanye.

Asobanura ko kwibanda ku menyo byatewe n’uko yigiramo ububiko bw’amaraso ashobora gufasha mu bushakashatsi bugamije kumenya icyateye urupfu rw’umuntu runaka, ndetse ko mu menyo basuzumye basanze atatu muri yo yifitemo bacteries za Yersinia pestis zitera icyorezo cya Plague.

Umunyamateka wo muri Kaminuza ya Stirling, Dr. Philip Slavin yavuze ko uretse kubona ahatangiriye icyorezo cya Black Death, banabashije gutahura ko cyakwirakwizwaga n’abantu aho kuba imbeba nk’uko byavugwaga.

Ibyavuye mu bushakashatsi byasohotse mu kinyamakuru The Nature aho byahawe inyito igira iti "Inkomoko ya Black Death mu kinyejana cya 14 muri Eurasia."

Eurasia bikoreshwa mu kugaragaza u Burayi na Asia icyarimwe, ari naho hakundaga gushakishirizwa inkomoko y’iki cyorezo, amakuru anagaragaza ko hagati ya 2010 na 2015 ubwoko bwacyo byiswe "bubonic plague" bwibasiye abantu 3248, kigahitana 584.

Icyorezo cya Black Death gitera umuntu uburibwe bukomeye ndetse ibice bimwe na bimwe by’umubiri nk’intoki n’inzara bigasa n’ibyapfuye bidakora, akanagira ibiheri biza bigaturika ku mubiri we.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .