00:00:00 IGIHE NETWORK KN KINYARWANDA EN ENGLISH FR FRANCAIS

Amasaha umwana akwiye kuryama bikamufasha gukura neza no gutsinda mu ishuri

Yanditswe na Yvette Balinda
Kuya 12 July 2022 saa 12:37
Yasuwe :

Uramutse ufashe akanya gato ukitegereza imibereho y’abana bato by’umwihariko uko baryama, uzasanga abenshi baryama amasaha make cyane ku buryo mu gitondo bababyutsa ngo bajye ku ishuri bakarira kuko baba bataramara ibitotsi.

Ubushakashatsi bwakozwe n’abahanga mu by’abana n’umuryango bo muri Leta Zunze Ubumwe za Amerika, bwagaragaje ko abana bato baryama nibura amasaha 10 bagira imikurire myiza.

Bemeza ko imiryango myinshi igorwa no kuryamisha abana ku gihe kubera imirimo itandukanye bakora mu masaha y’ijoro, igihe abana bamara bareba televiziyo no kudashyiraho igihe baryamira gihoraho.

Hari kandi n’ababyeyi batinda gutaha kubera imirimo bakora, ibi bikaba byatera abana babo kuryama amasaha akuze kandi abenshi bazinduka bajya kwiga.

Abashakashatsi bavuga ko hafi kimwe cya kabiri cy’abana bari hagati y’imyaka itandatu kugeza kuri 17 bo muri Leta Zunze Ubumwe za Amerika, baryama amasaha ari munsi y’icyenda mu ijoro.

Umwana uryama amasaha 10 cyangwa arenga, ntagorwa n’umwaka wa mbere w’amashuri y’incuke yaba mu kumenyerana n’abandi, imbamutima ze cyangwa gukurikira amasomo.

Mu bana bakoreweho ubushakashatsi byagaragaye ko abana baryamaga amasaha 10 kuzamura bakoraga neza mu ishuri kurusha abaryama amasaha ari munsi ya 10.

Kuryama igihe gihagije bifasha umwana gukura neza kandi bikongera imbaraga n’ubudahangarwa bw’umubiri we.

Ni mu gihe kutaryama ku mwana bimutera umunaniro, bikagabanya ibyishimo bye, bikabangamira imyigire ye, imibanire ye n’abandi n’imibereho ye muri rusange.

Kuryamira ku gihe by’umwana ni inshingano z’umubyeyi. Ababyeyi bakwiye kumenya ko ari byiza ku mwana kuryama amasaha 10 cyangwa se arenga.

Bagendeye ku gihe umwana abyukira, ababyeyi bakwiye kumushyiriraho isaha ihoraho agomba kuryamiraho kugira ngo aryame ayo masaha yuzuye.

Ubushakashatsi kandi bwagaragaje ko abana bashobora kugira ibibazo byo gusinzira bitewe n’ibikoresho by’ikoranabuhanga bakoresha bareba amashusho (televiziyo, mudasobwa, na telefoni...).

Kugira ngo umwana asinzire neza agomba kureka kwifashisha ibikoresho by’ikoranabuhanga bakoresha bareba amashusho iminota 30 mbere yo kuryama, ibi bimufasha gusinzira neza.

Umuntu wese kugira ngo agire ubuzima bwiza muri byinshi bisabwa harimo no gusinzira umwanya uhagije, bikaba umwihariko ku bana kuko baba bari mu rugendo rwo gukura.

Abana nibura bagomba kuryama amasaha 10 kugira ngo bagire ubuzima bwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .