Amakuru atari yo Perezida Trump yagiye atangaza kuri coronavirus

Yanditswe na Bukuru JC
Kuya 26 Werurwe 2020 saa 05:11
Yasuwe :
0 0

Leta Zunze Ubumwe za Amerika n’Isi muri rusange, bikomeje guhangana n’icyorezo cya coronavirus kimaze guhitana abasaga ibihumbi 21.

Muri Amerika honyine, abantu basaga ibihumbi 65 bamaze kuyandura, mu gihe abasaga igihumbi imaze kubahitana.

Perezida Donald Trump kuva icyo cyorezo cyamenyekana yagiye atangaza amakuru anyuranye, ariko amwe bikaza kugaragara ko atari ukuri.

Ikinyamakuru The Atlantic cyakusanyije bimwe mu binyoma Perezida Trump amaze gutangaza guhera coronavirus yaba icyorezo.

Kuwa Gatanu tariki 7 Gashyantare, no kuwa Gatatu tariki 19 Gashyantare Trump yavuze ko nibigera muri Mata icyorezo kizaba cyagabanyije umurego kuko muri icyo gihugu hazaba hatangiye gushyuha.

Ukuri ni uko nta muntu n’umwe ushobora kumenya niba ubushyuhe cyangwa ubukonje hari icyo byongera ku bukana bwa coronavirus nk’uko Ishami ry’Umuryango w’Abibumbye rishinzwe Ubuzima (OMS) ryabitangaje.

Kuwa Kane tariki 27 Gashyantare Trump yagize ati “Kigiye kurangira. Uwo munsi bizaba nk’igitangaza, rwose kizashira.”

Umuyobozi w’ikigo gishinzwe indwara zandura muri Amerika, Anthony Fauci yavuze ko nta cyizere ko coronavirus izashira vuba cyane kuko uko bwije n’uko bukeye hari kuboneka abantu bashya bandura.

Kuwa Mbere tariki 23 Werurwe, Trump yavuze ko ubucuruzi nibukomeza gufungwa abantu bakaguma mu rugo, muri Amerika hazaboneka impfu nyinshi z’abantu biyahura kurusha abicwa na coronavirus.

Ikigo gishinzwe kurwanya indwara z’ibyorezo cyatangaje ko coronavirus ariyo ihangayikishije cyane kuko imibare igaragaza ko abantu ibihumbi 200 ku baturage miliyoni 1.7 bashobora guhitanwa na yo.

Icyo kigo kivuga ko nubwo kwiyahura ari byo biza imbere mu guhitana ubuzima bwa benshi muri Amerika, umubare wabo ari muto ugereranyije n’abashobora guhitanwa na coronavirus. Nko mu mwaka wa 2017, abantu 47 000 nibo bapfuye biyahuye.

Kuwa Gatanu tariki tariki 6 Werurwe, Trump yanditse ati “Umuntu wese ushaka gupimwa, arapimwa. Turabishoboye. Hari ibyo gupimisha kandi kwipimisha ni byiza.”

Ukuri ni uko igihugu kidafite ubushobozi buhagije bwo gupima ababyifuza bose kuko hari Leta zimwe na zimwe zagaragaje ko ibikoresho byo gupima biri kubura.

Trump kandi yandika ayo magambo hari hashize umunsi umwe Visi Perezida we, Mike Pence avuze ko ibikoresho byo gupima bafite bidahagije.

Kuwa Kabiri tariki 24 Werurwe no kuwa Gatatu tariki 25 Werurwe, Trump yavuze ko Amerika yamaze kurenga Koreya y’Epfo mu gupima abantu benshi bashaka kumenya uko bahagaze kuri coronavirus.

Ukuri ni uko mu mibare, Amerika ari yo ifite abantu benshi bamaze kumenya uko bahagaze kuri coronavirus ariko ugereranyije n’abaturage bayituye, iri nyuma ya Koreya y’Epfo.

Ukurikije uko abaturage ba Koreya y’Epfo bangana, icyo gihugu gikubye inshuro eshanu abo Amerika imaze gupima ugereranyije n’abaturage bayo bose. Amerika imaze gupima abasaga ibihumbi 430 mu gihe Koreya imaze gupima abasaga ibihumbi 350.

Kuwa Kane tariki 12 Werurwe, Trump yavuze ko umunyamerika wese uzagaruka mu gihugu avuye i Burayi azajya abanza gupimwa kandi agashyirwa mu kato k’iminsi 14.

CNN yatangaje ko uburyo bwo gupima budahagije ku buryo buri wese uje mu gihugu apimwa. Yatangaje ko atari abantu bose bashyirwa mu kato.

Kuwa Kabiri tariki 12 Werurwe, Trump yavuze ko mbere y’uko bitangazwa ko coronavirus izaba icyorezo cyugarije isi, na we yabyiyumvagamo. Ati “Nabyiyumvagamo ko kizaba icyorezo ku isi hose na mbere y’uko bitangazwa. Narabibonaga ko bikaze.”

Trump ubwe niwe wabanje kugaragaza amakuru ya coronavirus nk’igihuha, avuga ko abantu bari gukabya. Trump kandi yavuze ko coronavirus ari ibicurane bisanzwe bidakwiriye guhangayikisha abantu.

Kuwa Mbere tariki 2 Werurwe, Trump yavuze ko inganda zikora imiti muri Amerika zigiye kubona urukingo rwa coronavirus mu gihe cya vuba.

Ukuri ni uko abajyanama ba Trump ubwabo n’inzobere mu gukora imiti uwo munsi bari bamubwiye ko bizatwara igihe kiri hagati y’umwaka cyangwa amezi 18 kugira ngo urukingo rukorwe.

Kuwa Kane tariki 19 Werurwe, Perezida Trump yavuze ko umuti ukoreshwa mu kuvura malaria wa chloroquine, wemejwe n’ikigo gishinzwe imiti n’ibiribwa ko ushobora kuvura coronavirus.

Ubuyobozi bw’icyo kigo bwahise bubinyomoza, buvuga ko uwo muti ugisuzumwa kandi utaremezwa ku buryo abaganga bawukoresha bavura coronavirus. Icyakora ubwo buyobozi bwavuze ko uwo muti ushobora gukoreshwa havurwa ibimenyetso by’iyo ndwara.

Trump yagiye atangaza amakuru atandukanye kuri coronavirus, nyuma bikagaragazwa ko atari yo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza