Amagambo akomeye Robert Mugabe yavuze akiriho

Yanditswe na Ferdinand Maniraguha
Kuya 6 Nzeri 2019 saa 09:04
Yasuwe :
0 0

Robert Gabriel Mugabe wagejeje Zimbabwe ku bwigenge akanayibera Perezida imyaka 37 yitabye Imana.

Ni umugabo utarakunze kuvugwaho rumwe mu gihe cy’ubutegetsi bwe, aho benshi mu banyafurika bamubonaga nk’intwari idatinya kubwiza ukuri abazungu naho abandi cyane cyane abazungu bakamubona nk’umunyagitugu uganisha igihugu mu manga.

Mu myaka yamaze ku Isi mu mbwirwaruhame yagiye atanga hari amagambo atandukanye akomeye yagiye avuga atazibagirana.

Kuri ba gashakabuhake

Ubwo yari i Salisbury mu Bwongereza mu 1962 yagize ati “Afurika igomba gusubira uko yari imeze mbere ba gashakabuhake batarayigabanya. Aya ni amacakubiri yazanywe tuzashaka uburyo bwose tuyavanaho.”

Mu 2008 ubwo yari mu bikorwa byo kwiyamamaza by’ishyaka Zanu PF yagize ati “Imana yonyine niyo yanshyize ku butegetsi ni nayo izankuraho, ntawo ari MDC cyangwa Abongereza.”

Mu 2002 yagize ati “Ishyaka ryacu rizakomeza gusuka ubwoba mu mutima w’umuzungu ari na we mwanzi wacu nyakuri.”

Ku butunganyi

Ubwo yari kuri Radiyo ya ZDC mu mwaka 2015 yagize ati “Turabaza ngo, twaba twaravutse kuko ababyeyi bacu baryamanye bahuje ibitsina? Turashaka kororoka kandi ibyo biva ku mugore, ntabwo ari abagabo babiri baryamanye bahuje ibitsina. Yohani na Yohani , Oya. Mariya na Mariya, Oya. Ibyo ni bibi kurusha imbwa n’ingurube. Noroye ingurube ariko ingabo n’ingore ziramenyana.”

Mu Nteko rusange ya Loni mu 2015 yagize ati “Twamaganye gushaka kutuzanira ‘uburenganzira bushya’ butandukanye n’indangagaciro zacu n’umuco wacu. Ntabwo turi abatinganyi.”

Ibyo yavuze ku Bwongereza

Mu bikorwa byo kwiyamamaza mu 2013 yagize ati “u Bwongereza ni ahantu hakonja cyane, ni igihugu kidakwiriye guturwa gifite utuzu dutoya.”

“Turacyafitanye intambara na Guverinoma y’u Bwongereza. Bari gukoresha amabandi y’abatinganyi. Buri gihe uko nyuze i Londres, amabandi y’ubutegetsi bwa Blair anyereka ko andakariye.” Yagarukaga ku buryo abantu bamwamaganye mu ruzinduko yagiriye i Londres mu Ukwakira 1999.

Mu nama yiga ku bidukikije muri Afurika y’Epfo, mu 2002 yagize ati “ Twarwaniye ubutaka bwacu, twarwaniye ubusugire bwacu, nubwo duciriritse ariko twaratsinze tubona ubwigenge kandi twiteguye kumena amaraso yacu. Rero Blair gumana u Bwongereza bwawe, nanjye ureke ngumane Zimbabwe yanjye.”

Ibyo yavuze kuri Hitler

Ubwo yari mu muhango wo gushyingura Minisitiri wari witabye Imana mu 2003 yagize ati “ Ninjye Hitler w’iki gihe.Uyu Hitler afite intego y’ubutabera ku baturage be, ukwishyira ukizana kw’abaturage be, no kumenyekanisha ubwigenge bw’abaturage be ndetse n’uburenganzira ku mutungo kamere wabo, niba ibyo aribyo kuba Hitler, mundeke mbe Hitler inshuri icumi.

Ubukungu

Mu kiganiro yatanze mu 2007 yagize ati “Ubukungu bwacu buhagaze neza inshuro ijana kurusha byinshi mu bihugu bya Afurika. Nyuma ya Afurika y’Epfo, ni ikihe gihugu kindi kitari Zimbabwe?....ibyo tubura kuri ubu ni ibicuruzwa mu maduka, nta kindi.”

Kuri Yezu Kristu

Ubwo yavugiraga kuri Radiyo mu birori byo kwizihiza imyaka 88 yagize ati “Napfuye inshuro nyinshi, aho niho ndushiriza Kristu. Kristu we yapfuye rimwe azuka rimwe.”

Ibyo yavuze ku bayobozi ba Amerika

Mu Nteko rusange ya Loni mu 2007 yagize ati “Reka Bwana Bush musomere amateka neza. Amenye ko yaba we bwite n’inshingano afite zo guhagarira Leta Zunze Ubumwe za Amerika, ashyigikiye ibi bita ‘Iterambere’ ariryo ryadukolonije, rikadufunga rikatwica. Ntacyo rero afite cyo kwitwigisha ku bijyanye n’uburenganzira bwa muntu. Ibiganza bye birajojoba amaraso y’inzirakarengane zo mu bihugu byinshi.”

Kuri Radiyo ZDC mu 2015 yagize ati “Nafashe umwanzuro ko niba Obama yemeye ibyo kubana abantu bahuje ibitsina no kubavuganira, nibiba ngombwa nanjye ndaza kujya i Washington DC, mpfukame musabe kumbera umugore.”

Mu nteko rusange ya Loni mu 2017 yagize ati “Bamwe muri twe twagize ubwoba kubera igisa nko kugaruka kwa Goliyati w’igitangaza uvugwa muri Bibiliya. Ese muri twe haba harimo Goliyati ushaka kurimbura ibindi bihugu? (yavugaga Donald Trump).

Yakomeje agira ati “Reka mbwire Perezida wa Leta Zunze Ubumwe za Amerika, Bwana Trump, vuza akarumbeti kawe mu ijwi ryiza rizana ubumwe, amahoro, ubufatanye n’ibiganiro ari nacyo twaharaniye kuva kera.”

Icyo yavuze ku gushaka umusimbura

Mu kiganiro yagiriye kuri Televiziyo mu 2016 yagize ati “Ese ubwo gushaka unsimbura, si nko kuraga? Mu ishyaka rero rigendera kuri demokarasi ntabwo abayobozi bashakishwa muri ubwo buryo. Abaturage nibo babashyiraho.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza