Afurika y’Epfo: Umugabo wafashe mwishya we w’imyaka 11 ku ngufu yakatiwe burundu

Yanditswe na Twarabanye Venuste
Kuya 16 Ugushyingo 2019 saa 11:50
Yasuwe :
0 0

Umugabo w’imyaka 36 wafashe mwishywa we w’imyaka 11 ku ngufu, akamuha ama-rand 30 yo muri Afurika y’Epfo, akabakaba 1900 Frw kugira ngo abigire ibanga, yakatiwe gufungwa burundu.

Uwo mugabo yahamijwe icyaha cyo gufata mwishya we ku ngufu mu Rukiko rwa Witbank mu iburanisha ryabaye ku wa Gatatu nkuko News24 yabitangaje.

Ibimenyetso byagaragajwe mu rukiko, byerekanye ko ibyo byabaye ku wa 25 Ukuboza mu 2014 mu gace ka Likazi gaherereye mu Ntara ya Mpumalanga.

Uwo mugabo utatangajwe amazina yari yatumiye mushiki we n’abana be ngo bishimire umunsi mukuru wa Noheri bari hamwe.

Kuri uwo mugoroba, ubwo buri wese yari yagiye kuryama, nibwo yafashe ku ngufu mwishya we wari wasigaye areba Televiziyo.

Urukiko rwumvise kandi ko yahaye uwo mwana 1900 Frw ngo abigire ibanga. Igitondo cyakurikiyeho uwo mwana yabibwiye nyina ari nawe wabimenyesheje polisi imuta muri yombi.

Komiseri wa Polisi mu Ntara ya Mpumalanga, Lt Gen Mondli Zuma, yatangaje ko yishimiye icyo gihano umugabo wafashe mwishywa we ku ngufu yahawe.

Mu itangazo ry’Umuvugizi wa Polisi ku rwego rw’Intara, Brigadier Leonard Hlathi, yavuze ko “Gen. Zuma yishimiye imirimo yakozwe n’ikipe ishinzwe iperereza, ubushinjacyaha na laboratwari zagaragaje ibimenyetso.”

Yongeyeho ko abakora ibyaha nk’ibyo batazajya babareka ngo bidegembye mu gihe abagore n’abana b’inzirakarengane babayeho mu bwoba.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza