00:00:00 IGIHE NETWORK KN KINYARWANDA EN ENGLISH FR FRANCAIS

Afurika y’Epfo: Ntihavugwa rumwe ku gihe Aba-Australopithèque’ babereyeho

Yanditswe na Zigiranyirazo Bajecteur
Kuya 29 June 2022 saa 12:36
Yasuwe :

Nyuma y’uko hasigaye hari uburyo bushya bugezweho mu gusuzuma amagufwa y’abantu babayeho kera hakanamenyekana igihe babereyeho, hahishuwe ko ibisigazwa by’imibiri y’abantu byakuwe mu buvumo bwo muri Afurika y’Epfo, babayeho imyaka igera kuri miliyoni mbere y’igihe byajyaga bitekerezwa ko babereyeho.

Inkuru ya BBC ivuga ko abashakashatsi basanze abo bantu barabaye ku Isi mu myaka ibarirwa hagati ya miliyoni 3,4 na miliyoni 3,7 ishize ku buryo ibyo babonye binitezweho kuba byahindura imyumvire yari isanzwe ku kijyanye n’uruhererekane mu buzima bwa muntu ku Isi hamwe n’imibereho yaranze abakurambere bacu.

Ubusanzwe abashakashatsi bajyaga bavuga ko abantu bo mu muryango wa Australopithèque bo muri Afurika, babayeho mu myaka miliyoni 2,6 ishize hagendewe ku bisigazwa byavanwe mu buvumo bwo muri Afurika y’Epfo mu gace ka Sterkfontein hafi y’umujyi wa Johanesbourg, icyakora ubu amakuru mashya yamaze kuvuga ibitandukanye n’ibyo by’umwihariko ku gihe abo bantu babereyeho.

Ibisigazwa byakoreweho ubushakashatsi, ni igice cy’amagufwa y’umutwe cyuzuye cyavumbuwe mu 1947 aho byavuzwe ko ari amagufwa y’umugore wahawe izina rya Ples akanafatwa nk’uwa kera kurusha abandi ku Isi wavumbuwe aho muri Afurika y’Epfo.

Abantu bo muri icyo gihe cye bivugwa ko babaga ari bagufi ugereranyije n’ab’uyu munsi aho umugabo yashoboraga kugira uburebure bwa metero imwe na santimetero 38 (1m38) mu gihe abagore bagiraga metero imwe na santimetero 15 (1m15).

Ubushakashatsi bushya bwavuze ko yaba amagufwa y’uyu mugore n’andi y’abo mu gihe cye yakuwe hamwe n’aye, yose agaragaza ko babayeho mbereho imyaka igera kuri miliyoni ugereranyije n’igihe cyafatwaga nk’icyo babereyeho.

Umushakashatsi w’Umufaransa, Laurent Bruxelles uri mu bakoze ubu bushakashatsi, yavuze ko uruhererekane rw’inzira ya muntu yo kubaho rufatwa nk’igiti kigaba amashami, rukomeje gusa n’uruhinduka igihuru bitewe n’uko hakomeza kuvumburwa amakuru mashya atandukanye n’ayari asanzwe ariho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .