00:00:00 IGIHE NETWORK KN KINYARWANDA EN ENGLISH FR FRANCAIS

Abayobozi b’ibigo by’ikoranabuhanga bakize kurusha abandi bahombye asaga miliyari 250$ mu 2022

Yanditswe na Zigiranyirazo Bajecteur
Kuya 14 July 2022 saa 05:30
Yasuwe :

Muri iki gihe ntiwatekereza ku rutonde rw’abantu bakize kurusha abandi ku Isi ngo urenze ingohe amazina y’abashoye ubumenyi n’imari yabo mu by’ikoranabuhanga barimo Elon Musk, Jeff Bezos, Bill Gates, Mark Zuckerberg n’abandi.

Urutonde rwakozwe na Bloomberg rugaragaza ko mu baherwe 20 ba mbere ku Isi, abagera ku munani bose ari abashoye mu rwego rw’ikoranabuhanga kandi muri abo umunani, barindwi bakaza mu 10 ba mbere kuri urwo rutonde aho babarirwa igiteranyo cya miliyari 936 z’amadolari ya Amerika.

Ni akayabo k’amafaranga bavana mu bucuruzi bw’imodoka zitwara, Software za mudasobwa, ubucuruzi bwo kuri murandasi ndetse n’ibijyanye n’imbuga nkoranyambaga.

Nubwo bimeze bityo ariko, ikinyamakuru cya USA Today kivuga ko uyu mwaka aba baherwe bahombye akayabo k’amafaranga menshi ugereranyije n’umwaka ushize ku buryo ubu bivugwa ko umutungo rusange w’abaherwe 20 ba mbere ku isi muri uyu mwaka wagabanutseho agera kuri miliyari 256$, angana n’umusarurombumbe wa Nouvelle Zélande ku mwaka hashingiwe ku makuru ya Banki y’Isi.

Mark Zuckeberg ari mu baherwe bahombye cyane uyu mwaka aho umutungo we ugeze kuri miliyari 63,8$, bigaragara ko wagabanutseho miliyari 61,7 uyu mwaka ugereranyije n’umwaka ushize ndetse ubu akaba ageze ku mwanya wa 17 ku rutonde rw’abatunze amafaranga menshi.

Hari n’andi mazina asanzwe amenyerewe nka Bill Gates ubu ugeze kuri miliyari 116$, umutungo we ukaba waragabanutseho miliyari 22$. Ibi bimushyira ku mwanya wa kane w’abaherwe ba mbere ku isi mu gihe Jeff Bezos uri ku mwanya wa kabiri, umutungo we wagabanutseho miliyari 52,5$ aho ubu ugeze kuri miliyari 140$.

Elon Musk uri ku mwanya wa mbere w’abaherwe batunze akayabo, umutungo we wagabanutseho miliyari 47,8 z’amadolari ya Amerika aho ubu abarirwa umutungo ungana na miliyari 223$.

Uru rutonde ruriho andi mazina y’abiyeguriye ibikorwa by’ikoranabuhanga nka Larry Ellison uri ku mwanya wa 10 akaba azwi mu kigo cya Oracle yashinze mu 1977 aho muri uyu mwaka yahombye miliyari 18,4$ akaba atunze miliyari 88,8$.

Hariho kandi Steve Ballmer wayoboye Microsoft kuva mu 2000 kugeza muri 2014. Ari ku mwanya cyenda ku isi na miliyari 94,6$, akaba yarahombye izigera kuri 11 uyu mwaka. Ballmer ubu ni na we nyir’ikipe y’umukino w’intoki wa BasketBall ikunzwe muri NBA, Los Angeles Clippers.

Sergey Brin uri mu batangije urubuga rwa Google, ari ku mwanya wa gatandatu ku rutonde rw’abaherwe isi ifite none n’umutungo wa miliyari 103$ akaba yarahombye izigera kuri 20,9 ugereranyije n’umwaka ushize mu gihe mugenzi we batangiranye Google, Larry Page ari ku mwanya wa gatanu nubwo uyu mwaka yahombye miliyari 21,3$ aho ubu atunze miliyari 107$.

Umutungo wa Elon Musk wagabanutseho miliyari 47,8 z’amadolari ya Amerika muri uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .