Abashakashatsi bavumbuye ko ifarashi yahoze ifite amano atanu

Yanditswe na Iradukunda Serge
Kuya 10 Gashyantare 2020 saa 10:36
Yasuwe :
0 0

Ubushakashatsi bwagiye hanze ku wa 5 Gashyantare bwerekana ko ifarashi ikiri nto ibanza kugira amano atanu mbere yo kugira ikinono n’amano mato abiri isanzwe imenyereweho.

Ibi byamenyekanye nyuma y’uko umwarimu w’isomo ry’ibinyabuzima muri kaminuza ya Massachusetts witwa Kathryn Kavanagh, afashe igihe akiga ku ifarashi nto zikiri mu nda ya za nyina (insoro).

Nyuma yo kumara igihe yitegereza uko izi nsoro zikura, Kavanagh yatunguwe no kubona ko uko utunyangingo duto two mu kinono tugenda dukura, dukora amatsinda ashushanya amano atanu aho kuba abiri.

N’ubwo byari bisanzwe bizwi ko ifarashi yahoze ifite amano atanu nyuma akaza gusigara ari ikinono gifite amano mato abiri ahagana inyuma, Kavanagh avuga ko igishya bavumbuye ari uko igihe ifarashi iri gukura mu nda ya nyina igaragaza iyi shusho y’utunyangingo yerekana ko yahoze ifite amano atanu n’ubwo inyuma bitagaragara.

Ati “Turatekereza ko bitari bizwi mbere kubera ko uku kugaragara kumara igihe gito, kumara iminsi mike, twagize amahirwe”.

Ubu bushakashatsi bwateye intambwe mu kugaragaza ko uko ibinyabuzima bigenda bikura binyuzamo bikagaragaza ishusho y’uko byahoze mbere y’uko habaho ubwihindurize n’ubwo iyi shusho itajya igaragara inyuma.

Mu 2018 nibwo hari hakozwe ubundi bushakashatsi bwerekana ko ifarashi ikigaragaza ibimenyetso by’uko yahoze ifite amano menshi hagendewe ku mitsi myinshi n’imyakura iri mu kaguru kayo bigaragaza ko atari iyo ino rimwe gusa.

Mu myaka ibarirwa muri miliyoni ifarashi yahoze ifite amano atanu ariko kubera ubwihindurize n’ihinduka ry’ibihe iryo hagati riza gukura cyane kuruta andi rivamo ikinono mu gihe ayo ku ruhande abiri kubera kudakoreshwa yataye ubushobozi akagenda agabanuka kugeza abuze.

Ifarashi byagaragaye ko yahoze ifite amano atanu agenda azimira hasigara ibinono bisatuyemo ibice bibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .