00:00:00 IGIHE NETWORK KN KINYARWANDA EN ENGLISH FR FRANCAIS

Abashakashatsi barakataje mu kureba uko umuntu yajya abaho adasaza

Yanditswe na Zigiranyirazo Bajecteur
Kuya 5 Mutarama 2023 saa 08:43
Yasuwe :

Ikoranabuhanga rigezweho rikomeje kuzana byinshi ku buryo mu rwego rw’ubuzima ibintu bikomeje gufata indi ntera, aho abahanga bakataje mu bushakashatsi bw’imiti ifasha abantu gukura birondereza, icyizere cy’uburame kikiyongera birushijeho.

National Geographic ivuga ko abashakashatsi bo mu kigo ‘Calico Life Sciences’ cyo muri Leta Zunze Ubumwe za Amerika, bamaze kugera ku bushobozi bwo gufasha imbeba kuramba ikabaho imyaka myinshi kurusha uko byari bisanzwe.

Babikora hifashishijwe umuti wa ‘rapamycin’ ubusanzwe ufasha mu gihe cyo guha abantu ingingo nshya, aho ku mbeba ziri mu kigero cy’ubukure kigereranyije, uwo muti uzifasha kuramba ku rugero rwa 60%.

Ku mbeba zikuze, hifashishwa umuti wa "senolytics" na wo wagaragaje ubushobozi bwo gutuma zongera kubaho igihe kirekire nyuma y’uko izingana na zo zipfuye zizira gusaza.

Havugwa n’indi miti harimo nka metformin na acarbose izwiho gukumira isukari nyinshi mu mubiri ku buryo ubu hakurikiyeho ibyo kugerageza iyo miti ku mbeba zikiri nto.

Cynthia Kenyon uri mu bamaze imyaka ibarirwa mu binyacumi bakora ubwo bushakashatsi bwitiriwe "frenzy", avuga ko ubu imbeba ari ibiremwa by’ibinyamahirwe kuko hari uburyo bwinshi bwo kuzongerera icyizere cy’uburame.

Ku ruhande rw’abantu, imibare igaragaza ko hagati y’umwaka wa 1900 na 2020, icyizere cy’uburame cyikubye inshuro zirenga ebyiri kikagera ku myaka 73,4 nubwo ibi bitasiganye n’indwara zibasira abakuze zirimo iz’umutima, kanseri, alzheimer itera kwibagirwa bya hato na hato, za diyabete, iz’ibihaha n’izindi.

Abashakashatsi bavuga ko mu gihe iyi miti yanozwa hagamijwe gufasha abantu kuramba, byashoboka ko bagera mu myaka 80 na 90 bagifite imbaraga nta minkanyari ku buryo icyizere cy’uburame cyazamuka kikagera ku myaka ibarirwa hagati ya 120 na 125.

Ni bake ubu babasha kugeza mu myaka 100 aho imibare igaragaza ko mu bihugu biteye imbere, mu bagera ku bihumbi bitandatu, umwe ari we ushobora kurama imyaka 100 mu gihe umwe mu bagera kuri miliyoni eshanu ari we ubasha kugeza ku myaka 110.

Uwa vuba uherutse gupfa afite imyaka myinshi, ni Umufaransakazi Jeanne Calment wapfuye mu 1997 afite imyaka 122 n’iminsi 164.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .