Abashakashatsi bagaragaje ko Coronavirus itakozwe n’abantu

Yanditswe na Ferdinand Maniraguha
Kuya 26 Werurwe 2020 saa 04:11
Yasuwe :
0 0

Kimwe mu bihuha biri gukwirakwizwa hirya no hino ku isi, ni uko Coronavirus, ari virusi yakorewe muri Laboratwari, ikaza gutoroka abashakashatsi ikajya mu bantu. Ubushakashatsi buherutse gusohoka bwagaragaje ko ibyo atari byo.

Ubwo bushakashatsi bushya bwakozwe n’abarimo inzobere mu buvuzi, Kristian Andersen, bugaragaza ko iyo coronavirus iba yarakozwe, itari kuba ikiri amayobera kugeza ubu nk’uko bimeze.

Abo bashakashatsi bavuze ko mu bigize iyo virusi harimo uturemangingo dushya tutari tuzwi twagaragaye mu nyamaswa zizwi mu Kinyarwanda nk’igisamujyonjyo (Pangolins).

Mu bushakashatsi bwakorewe mu Scripps Research Institute muri Leta Zunze Ubumwe za Amerika bugasohoka tariki 17 Werurwe mu kinyamakuru Nature Medicine, bugaragaza ko bimwe mu bihuha byakwirakwizwaga ku nkomoko ya coronavirus atari byo.

Anderson avuga ko mbere bakekaga ko iyo virusi yaba yarakomotse mu binyabuzima byo mu mazi bicuruzwa mu isoko ryo muri Wuhan mu Bushinwa, hanyuma ikava muri ibyo binyabuzima ijya mu bantu. Abandi bavugaga ko iyo virusi yaba yaravuye mu nyamaswa zo mu gasozi, abantu baziriye bakandura bagatangira kuyihererekanya.

Ubwo ibigize Coronavirus, byagaragazwaga muri Mutarama uyu mwaka, hazamutse ibindi bihuha ko iyo virusi yaba yarakorewe muri laboratwari, ikaza kubacika ikajya mu bantu.

Ibyatizaga umurindi ibyo bihuha, ni uko mu mujyi wa Wuhan aho virusi yahereye hari ikigo gikora ubushakashatsi kuri za virusi cyitwa Wuhan Institute of Virology, icyo kigo kikaba cyegeranye n’aho isoko ry’ibinyabuzima byo mu mazi riherereye. Icyo kigo kandi kijya gikora ubushakashatsi kuri virusi ziba mu ducurama zirimo na coronavirus.

Ibyo byatumye bamwe bakeka ko virusi yaba yaratorotse muri laboratwari, cyangwa se umwe mu bakozi muri iyo laboratwari akayijyana hanze igatangira gukwirakwira mu bantu.

Kuba virus yatoroka ikava mu bushakashatsi ikajya hanze ni ibintu bibaho nk’uko Andersen abisobanura. Avuga ko bamaze kubona ibigize COVID-19, bakoranyije inzobere mu binyabuzima n’udukoko twandura kugira ngo bamenye inkomoko yayo.

Andersen yavuze ko basanze nta kimenyetso na kimwe kigaragaza ko iyo virusi yakozwe n’abantu. Yavuze ko iyo iza kuba yarakozwe n’abantu, baba barakoresheje virusi zisanzwe zizwi ku buryo kuzimenya byoroha, mu gihe kuri COVID-19 ari virusi ifite ibiyigize bitazwi.

Ati “Uwo ari we wese ushaka gukora virusi ye akenera gukoresha virusi zindi zisanzwe zibaho, akazibyazamo ikindi ashaka. Amakuru y’uturemangingo kuri COVID-19 yerekana ko itavuye mu zindi virusi zisanzwe.”

Robert Garry, umwe mu bakoze ubushakashatsi avuga ko uburyo iyo virusi nshya iteye, ikoze mu buryo buteye urujijo ku buryo bitari gushoboka iyo iba yarakozwe n’umuntu. Avuga kandi ko bitari gukorwa nk’uko ikoze iyo umuntu wayikoze aba ashaka gukora virusi yica abantu benshi.

Ibyabonywe n’aba bashakashatsi, biranyomoza indi raporo iherutse kunyuzwa ku rubuga bioRxiv.org, yavugaga ko mu bigize COVID-19 harimo utunyangingo tuboneka muri virusi itera SIDA. Iyo raporo igisohoka yamaganywe n’inzobere ndetse ba nyirayo baza kuyivanaho.

Garry avuga ko bagereranyije COVID-19 na coronavirus zindi ziboneka mu ducurama n’igisamujyonjyo, bagasanga bijya guhura nubwo COVID-19 igizwe na coronavirus zo muri izo nyamaswa zombi.

Abashakashatsi bagaragaje impamvu COVID-19 atari virusi yakozwe n’abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .