Abantu barenga 250 bishwe n’impanuka kubera ‘selfie’ mu myaka itandatu

Yanditswe na Emma-Marie Umurerwa
Kuya 6 Ukwakira 2018 saa 10:58
Yasuwe :
0 0

Ubushakashatsi bwagaragaje ko abantu barenga 250 bapfuye hagati y’umwaka wa 2011 na 2017 mu bice bitandukanye by’Isi, bagerageza kwifata ‘selfie’ kandi bari ahantu hashyira ubuzima bwabo mu kaga.

Abapfuye babaga bagerageza kwifotorera nko mu manga y’imisozi, ku dusongero tw’inyubako ndende no mu mihanda inyuramo imodoka, mu gihe abandi barohamye mu mazi.

Ubu bushakashatsi bwakozwe na ‘National Library of Medicine of the United States’, yifashisha isesengura ry’amakuru yatangajwe mu myaka itandatu ishize.

CBS News yatangaje ko abantu 259 bapfiriye mu byago 137 bishingiye ku kwifata selfie mu myaka itandatu, nubwo ngo umubare ushobora kuba urenga.

Umubare munini w’abahitanwa n’ibyago bishingiye ku kwifotora ni abagabo kuko bangana na ¾ by’abapfuye bose. Abashakashatsi ariko bavuga ko abagore aribo bifotora cyane, itandukaniro rikaba ko abagabo aribo bakunda kwifotoreza ahantu hateye inkeke.

Abapfuye benshi bari hagati y’imyaka 10-19 na 20-29, aho impuzandengo y’imyaka ari 23.

U Buhinde nibwo buza ku isonga mu kugira umubare munini w’abapfuye kuko bagera ku 159, u Burusiya bukagira 16 mu gihe Leta zunze Ubumwe z’Amerika zifite 14.

Kuba u Buhinde aribwo bufite umubare munini w’abahitanwa no kwifotora ngo biterwa n’uko ari nabwo bufite umubare munini w’urubyiruko ruri munsi y’imyaka 30.

Inama zitangwa n’aba bashakashatsi ni uko hashyirwaho ahantu hatemerewe kwifatira selfie mu bice by’ubukerarugendo nko mu nkengero z’amazi no ku misozi ihanamye.

Impamvu ngo ni uko impanuka nyinshi ari izishingiye ku kurohama mu mazi, impanuka z’ibinyabiziga cyangwa guhanuka aho umuntu aba yifotoreza.

Byagaragaye ko abagabo ari bo bakunda kwifotoreza ahashyira ubuzima bwabo mu kaga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza