00:00:00 IGIHE NETWORK KN KINYARWANDA EN ENGLISH FR FRANCAIS

Zimbabwe yahakanye gukingira ikibaba Protais Mpiranya

Yanditswe na Rabbi Malo Umucunguzi
Kuya 15 May 2022 saa 05:13
Yasuwe :

Guverinoma ya Zimbabwe yahakanye ko yaba yaragize uruhare mu guhishira Protais Mpiranya biheruka kwemezwa ko yapfiriye muri icyo gihugu, ko ahubwo yatanze ibikewe ngo ukuri kujye ahagaragara.

Ibiro by’Umushinjacyaha w’Urwego rwasigaranye imirimo y’inkiko mpuzamahanga mpanabyaha (IRMCT), biheruka kwemeza ko Mpiranya yapfiriye muri Zimbabwe mu 2006.

Uyu mugabo washakishwaga kuva mu 2000 yahise anashyingurwa muri Zimbabwe, mu mazina atari aye nka Ndume Sambao.

Mpiranya yapfuye atagejejwe imbere y’ubutabera ngo abazwe ku ruhare rwe muri Jenoside yakorewe Abatutsi.

Ni we wari umuyobozi w’umutwe w’ingabo zarindaga Perezida Juvenal Habyarimana, wayoboye u Rwanda kuva mu 1973 - 1994. Yari afite ipeti rya Major.

Mu itangazo Minisitiri w’Ububanyi n’amahanga wa Zimbabwe, Frederick Musiiwa Makamure Shava, yasohoye kuri iki Cyumweru, yavuze ko Zimbabwe yagize uruhare mu ifatwa rya Mpiranya, aho kumukingira ikibaba nkuko byagiye bitangazwa muri iyi minsi.

Yavuze ko kuva hajyaho Repubulika ya Kabiri iyobowe na Perezida Emmerson Mnangagwa yasimbuye iya Robert Mugabe, biyemeje gufatanya n’izi nzego "kubera ko ntacyo dufite cyo guhisha."

Yavuze ko Zimbabwe ifatanyije n’Ubushinjacyaha bwa IRMCT buyobowe na Serge Brammertz, bashyizeho itsinda rihuriweho ryo guhuza ibikorwa by’iperereza no gushimangira ubufatanye.

Muri icyo gihe ngo Zimbabwe yatanze amikoro yari akenewe mu iperereza rya ririya tsinda, ikanakurikirana ibimenyetso byose biganisha ku irengero rya Mpiranya.

Haje no gutegurwa uruzinduko rwa Brammertz i Harare, ahura na ba visi Perezida babiri b’icyo gihugu.

Hagati aho, ngo Zimbabwe yagendaga isangiza abandi raporo ku ntambwe zose zitewe mu iperereza, harimo n’incamake y’ibyavuzwe n’abatangabuhamya.

Minisitiri Shava yakomeje ati "Byongeye, ni Guverinoma ya Zimbabwe yatanze uburenganzira ndetse igira uruhare mu gutaburura umubiri wa Mpiranya, ubwo byari bimaze gukekwa ko ari we washyinguwe mu mazina atari aye ya Ndume Sambao."

"Guverinoma yacunze umutekano w’imva, itanga uburenganzira bwo gufata ibipimo bya DNA no kuba byajyanwa hanze y’igihugu muri Netherlands Forensic Institute, ngo bisuzumwe neza."

Mpiranya yashyinguwe ku mazina atari yo, ya Ndume Sambao

Muri icyo gihe ngo hanifashishijwe rya tsida rihuriweho hamwe n’inzobere za Guverinoma ya Zimbabwe mu bijyanye n’ibimenyetso bya gihanga.

Yakomeje ati "Ntabwo byari gushoboka ko Ibiro by’Umushinjacyaha w’Umuryango w’Abibyumbye byaza, bigataburura umuntu wahambwe muri Zimbabwe nta bushake bwa Guverinoma buhari."

Minisitiri Shava yavuze ko muri urwo rugendo batafashaga ruriya rwego gusa, ahubwo Zimbabwe yanafashaga u Rwanda nk’igihugu, kandi ubusabe bwo kohereza abandi bantu bahunze ubutabera bihishe muri icyo gihugu "bugeze ku byiciro bitandukanye bukurikirawa."

Bityo, ngo bitandukanye n’ibikomeje kuvugwa mu bitangazamakuru ko Zimbabwe yagize uruhare mu kumuhishira, "yafashije Umushinjacyaha w’Umuryango w’Abibumbye gutahura Mpiranya."

Ikibazo cyakomeye ku bwa Perezida Mugabe

Amakuru avuga ko nyuma ya Jenoside yakorewe Abatutsi mu Rwanda mu 1994, Mpiranya yahunze agana muri Cameroon.

Mu 1998 yasubiye muri Zaire, aza no kurwana mu ntambara yiswe iya kabiri ya Congo ku ruhande rwa Perezida Laurent-Désiré Kabila, bagamije kurwanya Guverinoma y’u Rwanda.

Muri icyo gihugu, Mpiranya yaje no gukorana n’Ingabo za Zimbabwe zari zishyigikiye Kabila, ku buryo ubwo yazaga guhunga Congo, yerekeje muri Zimbabwe mu mpera za 2002.

Amakuru yemeza ko abayobozi ba Zimbabwe bamworohereje kwinjira mu gihugu hamwe n’abambari be ba hafi.

Yinjiye mu bucuruzi atangiza sosiyete yo gutwara abantu n’ibintu akoresheje imodoka ebyiri yavanye muri diyama yacukuye muri Congo. Ubucuruzi ntibwamuhiriye, ndetse abamuzi bavuga ko imibereho ye yatangiye kugenda iba mibi kurushaho kubera ubukene.

Umwaka wa mbere muri Zimbabwe yawubayeho mu nzu igezweho ya wenyine (Villa) ariko byaje kwanga ajya mu nzu rusange aho akodeshanya n’abandi.

Abakoze iperereza bavuga ko Mpiranya, inshuro nyinshi yahuraga n’abayobozi bakuru mu butegetsi bwa Perezida Robert Mugabe wayoboye icyo gihugu mu 1987 - 2017, akitaba Imana mu 2019.

Ubwo ubukungu muri Zimbabwe bwari bumaze kuzamba, Mpiranya yarakenye, ndetse mu mezi ashyira Ukwakira 2006, IRMCT ivuga ko yarembye cyane kubera igituntu maze arwarira mu bitaro bya West End i Harare ku izina rya Ndume Sambao.

Yaje gupfa ku ya 05 Ukwakira 2006, ashyingurwa mu irimbi riri hanze ya Harare ku izina rya Ndume Sambao.

Umusanzu wa Zimbabwe waje kuzamuka

Raporo y’ibikorwa bya IRMCT hagati ya tariki 1 Nyakanga 2020 na 30 Kamena 2021, yagaragaje ko imikoranire na Zimbabwe yakomeje gutera intambwe. Bitandukanye n’uko byari bimeze ku butegetsi bwa Mugabe.

Iyo raporo yagejejwe ku Muryango w’Abibumbye yakomeje iti "Mu gihe cyatangiwe raporo, Ibiro by’Ubushinjacyaha byongereye imikoranire n’ubuyobozi bwa Zimbabwe. Byishimira uburyo bwongeye gushimangira ubufatanye bwuzuye kandi butanga umusaruro."

"Ibiro byishimiye ibiganiro byagiranye n’itsinda ryashyizweho na Guverinoma ya Zimbabwe ngo rifashe mu bijyanye n’iperereza ndetse byohereje ubundi busabe bitekereza ko buzubahirizwa."

Umushinjacyaha mukuru Brammertz yanahishuye ko ategerejwe mu murwa mukuru Harare, mu biganiro byo ku rwego rwo hejuru bigamije kurushaho gushakisha Mpiranya.

Mu ijambo yagejeje ku kanama k’Umuryango w’Abibumbye gashinzwe umutekano ku wa 8 Kamena 2021, Brammertz yavuze ko bizeye ko amaperereza azatanga umusaruro.

Ati "By’umwihariko, turimo guperereza ku bijyanye no kuba Mpiranya, hejuru y’ibyaha bye muri Jenoside, mu myaka makumyabiri ishize yaba yaragize uruhare mu bindi byaha bikomeye. Dufite impamvu ituma dutekereza ko yakoze ubucuruzi yifashishije amafaranga yabonetse mu buryo butemewe."

Mpiranya afatwa nk’umwe mu batanze itegeko ryo kwica Uwilingiyimana Agathe wari Minisitiri w’Intebe, abasirikare 10 b’Ababiligi bamurindaga n’abandi banyapolitiki bicanwe n’imiryango yabo Jenoside yakorewe Abatutsi igitangira.

Inyandiko za IRMCT zigaragaza ko Mpiranya yaregwaga ibyaha birimo icyaha cya Jenoside, ubufatanyacyaha muri Jenoside, ibyaha byibasiye inyokomuntu birimo ubwicanyi, gufata ku ngufu n’ibindi.

Indi nkuru wasoma: Amayeri yafashije Protais Mpiranya kwihisha ubutabera na nyuma y’urupfu

Byemejwe ko Mpiranya yapfuye mu 2006

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .