00:00:00 IGIHE NETWORK KN KINYARWANDA EN ENGLISH FR FRANCAIS

“Zebra crossing si umurimbo kandi kuzishyiraho si ukurangiza umuhango”, CP Kabera

Yanditswe na IGIHE
Kuya 7 Mutarama 2023 saa 09:08
Yasuwe :

Umuvugizi wa Polisi y’u Rwanda, CP John Bosco Kabera yibukije abatwara ibinyabiziga ko bakwiriye kubahiriza amategeko agenga umuhanda cyane cyane bakubaha uburenganzira bw’umunyamaguru igihe ari kwambukira mu mirongo yabugenewe izwi nka ‘Zebra crossing’.

Ibi CP Kabera yabigarutseho kuri uyu wa Gatanu tariki ya 06 Mutarama, ubwo Polisi y’u Rwanda ku bufatanye n’abafatanyabikorwa baramukiraga mu gikorwa cyo kongera mu mihanda itandukanye yo mu mujyi wa Kigali, ahagenewe kwambukira abanyamaguru (Zebra Crossing), zishyirwa aho zitari zisanzwe bigaragara ko zihakwiye, hanasiburwa izari zarasibamye zisigwa irangi.

Muri ubu bukangurambaga kandi Polisi yahuguye ingeri zose z’abakoresha umuhanda barimo abatwara ibinyabiziga, amagare n’abanyamaguru, bibutswa ko bagomba kubahiriza ikoreshwa ry’imirongo yagenewe kwambukirwamo n’abanyamaguru.

Umuvugizi wa Polisi y’u Rwanda, CP John Bosco Kabera, yavuze ko imirongo yagenewe kwambukirwamo n’abanyamaguru ikwiye kubahirizwa n’abatwara ibinyabiziga kandi abanyamaguru nabo bakirinda kurangara mu gihe bambuka.

Ati “Iyi mirongo aho yashyizwe, abagenda n’amaguru baba bagomba kuyikoresha kuko nibo iba yashyiriweho by’umwihariko. Turasaba abakoresha umuhanda barimo abashoferi, abatwara moto n’abatwara amagare kuyubahiriza babona umunyamaguru arimo kuyambukiramo bagahagarara kuko ntabwo ari iy’umurimbo kandi gushyiramo iyi mirongo si ukurangiza umuhango gusa, ahubwo ifite icyo ivuze kandi kigomba guhabwa agaciro.”

Yaburiye abatwara ibinyabiziga birengagiza iyi mirongo bakayisangamo abanyamaguru ko Polisi itazabura kubahana kuko byagiye bigaragara ko biri mu biteza impanuka, ashishikariza abanyamaguru nabo kujya bambuka bihuta no kwirinda gukoresha telefone igihe bambuka umuhanda mu rwego rwo kwirinda impanuka zaturuka ku burangare.

Iki ni icyumweru cya gatanu gishize ubukangurambaga bwa Gerayo Amahoro busubukuwe, nyuma y’uko bwari bwarahagaritswe imburagihe mu mwaka wa 2020 bumaze ibyumweru 39 butangijwe, bitewe n’icyorezo cya COVID-19.

CP John Bosco Kabera yibukije abatwara ibinyabiziga ko bakwiriye kubahiriza uburenganzira bw’umunyamaguru igihe ari kwambukira mu mirongo yabugenewe izwi nka ‘Zebra crossing'
Binyuze muri ubu bukangurambaga bwa Gerayo Amahoro, imirongo abagenzi bambukiramo yarasibuwe hashyirwaho n'indi mishya aho yari ikenewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .