Yasize avuze! Ikiganiro cya nyuma na Rudahunga wari Umupadiri ukuze kurusha abandi (Video)

Yanditswe na Philbert Girinema
Kuya 14 Gashyantare 2019 saa 03:50
Yasuwe :
0 0

In paradisum deducant te Angeli! Roho ye yakirwe mu ijuru! Yari umusaza ucisha make, uganira, utera urwenya mu biganiro byigisha kandi bifasha umuntu gufunguka mu mutwe no kongera gutekereza ku cyo yiyemeje mu buzima.

-  Yitabye Imana tariki ya 11 Gashyantare afite imyaka 97
-  Yari amaze imyaka 66 ari Umupadiri
-  Yiganye na Kayibanda Grégoire, anigisha Habyarimana Juvénal
-  Yari afite inzozi zo gukora ikintu cyose cyamwongerera gukunda Imana
-  Yapfuye nyuma y’iminsi mike aganiriye na IGIHE. Ikiganiro gitambutse bwa mbere uyu munsi
- Ubu Umupadiri ukuze kurusha abandi ni Charles Ndekwe, wari Ubuheta bwa Rudahunga

Hashize iminsi itatu Musenyeri Eulade Rudahunga wari ufite agahigo ko kuba ariwe mupadiri ukuze kurusha abandi mu Rwanda yitabye Imana. Yavutse mu 1922, ahabwa Ubusaseridoti tariki ya 02 Kanama 1953.

Ni umusaza wari uzi amateka menshi, uhereye ku Ngoma y’Abami, ibihe by’Abakoloni, umwaduko w’amadini mu Rwanda n’ibindi byinshi. Iyo mwaganiraga yabivaga imuzi agamije gutanga ubumenyi bw’ibyo yabonye kugira ngo ajijure abakiri bato.

Twaganiriye nawe mu ntangiriro za Gashyantare, icyo gihe yagaragaraga nk’umuntu ugifite akabaraga nubwo yacungwaga mu kagare k’abarwayi. Yatubwiye byinshi bikubiye mu kiganiro kirambuye twagiranye uko cyakabaye. Nta na kimwe dusimbutse mu minota 45 twaganiriye.

IGIHE: Umuhamagaro wo kwiha Imana waje ute?

Musenyeri Rudahunga: Nabanje kubona abaseminari bato ndabikunda noneho ngeze i Kabgayi mbona abafaratiri bakiri i Kabgayi batarajya mu Nyakibanda nkababona nkabakunda.

Kandi hari abapidiri b’abazungu bazaga aho ku ishuri, ntitwagira santarali icyo gihe, bakazana amahema bakarara aho mu gitondo bakimuka bakajya ahandi.

Noneho hari n’abapadiri b’abanyarwanda bazaga aho ku ishuri narababonaga nanjye nkifuza kuba padiri.

Narangije iseminari nto nandikira Musenyeri aranyemerera noneho banyohereza mu Nyakibanda.

Mu Nyakibanda nahize Filozifiya imyaka ibiri, ndangije banyohereza kwimenyereza ahantu hitwa i Rambura mu Rukiga kuko iyo yari diyosezi imwe (icyo gihe bavugaga vicaría), mpamara umwaka umwe ndangije ngaruka mu Nyakibanda nkomeza noneho Tewolojiya.

Urangije Tewolojia hari igice bitaga sous-diaconat nicyo cyabanzaga, ubu ntibikiriho. Iyo washakaga kuba padiri ubyemeye wabanzaga muri icyo gice warangiza ukaba Diyakoni nyuma bakaguha Ubupadiri.

IGIHE: Nyuma yo kuba Padiri wibuka Paruwasi wakozemo bwa mbere?

Musenyeri Rudahunga: Nabaye Padiri tariki 02 Kanama mu 1953, hanyuma icyo gihe banjyana muri Paruwasi ya Kanyanza kuri Ndiza niho nabaye mbere.

Navuye aho i Kanyanza, Musenyeri anyohereza mu Kinyaga ahitwa i Shangi mpavuye anyohereza i Rwankuba hariya muri Kigali Ngali.

Navuyeyo mu 1960 igihe birukanaga Abatutsi noneho njya mu Byimana mbayo igice cy’umwaka, Musenyeri anyohereza i Muyunzwe. Icyo gihe hari impunzi zari zagiye muri Uganda hari umuryango najyanye mbageza mu Nkole ahitwa Rwera ndagaruka.

Noneho Musenyeri wa Mbarara atuma ku ba bansenyeri b’inaha (kuri Musenyeri Perodin, Gahamanyi na Yozefu bari bamaze kwimikwa) ngo bohereze abapadiri baze gufasha abakirisitu babo b’impunzi.

Musenyeri Gahamanyi yari évêque wa Astrida (Butare) na Musenyeri Yozefu ari uwa Ruhengeri.

Musenyeri Gahamanyi arambwira ngo njye gufasha impunzi. Njyana n’umupadiri witwaga Amabilisi wabaga i Nyamata tugenda turi babiri tujya gufasha impunzi.

Bamaze kuba benshi babohereza Shungezi kuko hari hagari nyuma babohereza Nakivala.

IGIHE: Wari ubizi ko ari wowe mupadiri mukuru kugeza ubu?

Musenyeri Rudahunga: Ni njye njyenyine, abo twari kumwe mu myaka imwe bose barapfuye.

IGIHE: Ubuzima bwawe bwaranzwe ni iki aho wakoraga hose?

Musenyeri Rudahunga: Aho nakoraga hose nagombaga gusura abakirisitu nkabaha amasakaramentu, nkabakorera. Nicyo nagombaga gukora.

IGIHE: Wavutse ku ngoma y’uwuhe mwami?

Musenyeri Rudahunga: Musinga. Numvise gusa bamuvuga, hanyuma hari ubwo bari bamuhetse mbona anyura hirya y’iwacu bagenda baririmba ariko ntabwo nigeze mwegera, ntabwo nigeze mubona hafi.

IGIHE: Umwami waba warabonye amaso ku maso ni nde?

Musenyeri Rudahunga: Ni Mutara Rudahigwa. Namubonye ndi umwana muto, namubonye kandi ndi mukuru. Yari umuntu ukomeye cyane, umuntu wari ukunzwe, ugasanga bose bamwubashye.

Nka Rudahigwa namubonye aza agenderera abaturage n’ahabaga nk’amahane akaza kuyahosha. Cyane cyane si abaturage aba basanzwe, ni nk’abatware, aba sous-chef n’Abatutsi bakomeye.

IGIHE: Ni uwuhe Musenyeri waguhaye Ubupadiri?

Musenyeri Rudahunga: Ni Musenyeri [Laurent-François] Deprimoz

IGIHE: Ni abahe basenyeri ba mbere wibuka?

Musenyeri Rudahunga: Musenyeri wasimbuye [Jean-Joseph] Hirth , [Léon-Paul] Classe naramubonye yari i Kabgayi aho twigaga naramubonaga kuko yazaga kudusura.

IGIHE: Musenyeri Classe yari umuntu umeze ute?

Musenyeri Rudahunga: Yari umuntu mwiza, wakundaga abantu

IGIHE: Perraudin yaje nyuma ya Classe?

Musenyiri Rudahunga: Perraudin yaje nyuma twabanye mu iseminari hariya mu Nyakibanda atwigisha tewolojiya. Yabaye Musenyeri na njye ndi padiri.

IGIHE: Mu bikorwa byamuranze uzi ni nk’ibihe?

Musenyeri Rudahunga: Ibikorwa byamuranze hari byinshi. Hari ibaruwa yanditse ‘Super Omnia Caritas’ (hejuru y’urukundo). Ariko rero iyo baruwa bavuga ko ari yo yateje amahane kuko yarebye bamwe. Bamuvugaho byinshi ntacyo nabivugaho.

Mu kiganiro aherutse kugirana na IGIHE, yavugaga ko kimwe mu byo asaba Imana ari ukuzapfa ayikunda kandi ayizirikana

IGIHE: Iyo urebye Abapadiri b’iki gihe n’abo mu gihe cyawe, ubona hari itandukaniro ?

Musenyeri Rudahunga: Icyo gihe nta buryo twari dufite nk’ubwo kwifashisha mu ngendo kuko tumaze guhabwa ubupadiri wajyaga gusura abakirisitu n’amaguru.

Abakirisitu bakaza bakagutwaza agasanduku ka misa n’utuntu twawe, bakajyana ihema uza kuraramo, mukaganira ukabaha Penetensiya, ukabavugira misa, warangiza ukimuka wamara icyumweru cyose ukagaruka kuri Paruwasi.

Ubu rero bafite uburyo, bafite amapikipiki, imodoka. Nk’ubu umupadiri baramuhamagara bati ‘hari umurwayi’ niba afite imodoka akajyayo ariko ubwo buryo ntabwo twari dufite kandi n’imihanda yari mike. Urumva ko byari biruhije.

IGIHE: Hari abapadiri babijyamo ariko nta muhamagaro 100%.Nawe niko ubibona?

Musenyeri Rudahunga: Sinaca urubanza! Hari uwashaka kuba umupadiri ashaka ubutunzi ariko sinaca urubanza rw’ibyo.

IGIHE: Imyemerere y’abakirisitu muri icyo gihe n’iy’ab’ubu mubibona mute?

Musenyeri Rudahunga: Abantu bose si kimwe ariko icyo gihe hari abakirisitu koko bemera. Ugasanga afite ubukirisitu bwe kandi akabugaragariza no mu bikorwa bye. Bari bahari kandi benshi.

IGIHE: Ni iki wishimira mu gihe cyose umaze uri padiri?

Musenyeri Rudahunga: Kwitangira Imana.

IGIHE: Ni igiki cyagukomereye?

Musenyeri Rudahunga: Imbogamizi zo ntizibura kuko ndi umuntu ariko inema y’Imana ikamfasha ibyo nkabitsinda.

IGIHE: Ni ibiki wibuka wavuyemo bigoranye?

Musenyeri Rudahunga: Nk’ubu ndarwaye. Ntubona ko nicaye aha? Ntashobora kugenda? Ubu se nshobora kwishima? Sinshobora kwishima ariko kuko nziko ari cyo Imana ishaka ndabyemera, nyagasani akamfasha rero kugira ngo nshobore kwihangana muri ibyo.

IGIHE: Mu gihe mwahawemo ubupadiri nibwo igihugu cyarimo gishaka ubwigenge. Iby0 bihe mwabinyuzemo mute?

Musenyeri Rudahunga: Byari byaratangiye mu 1958 no mu 1959 aho ni ho batangiye kwicamo ibice.

Ariko byari byaratangiye tukiva mu Nyakibanda mu 1956 hari hatangiye kuzamo ibice, Abahutu, Abatutsi. Ibyo rero narabyumvaga kandi narabibonaga mu baturage. Ariko rero njye sinabikurikiraga.

IGIHE: Ntabwo cyari ikintu gikomeye kwigisha abakirisitu bafite inzangano hagati yabo?

Musenyeri Rudahunga: Imbogamizi zabayeho nyuma nko mu 1960. Mu 1961, abapadiri bagiye babyigisha (inzangano) muri kiliziya ariko ubundi ntabwo babivugagaho ku mugaragaro.

IGIHE: Ubona abo bapadiri bari batangiye gutandukira barabiterwaga n’iki?

Musenyeri Rudahunga: Sinakubwira! Ariko babayeho.

IGIHE: Mu gihe u Rwanda rwabonaga ubwigenge niba wibuka byari byifashe gute?

Musenyeri Rudahunga: Byari bibi kuko byateye inzangano mu baturage no mu bapadiri.

Musenyeri Eulade Rudahunga yitabye Imana afite imyaka 97

IGIHE: Ntabwo abapadiri se bahohoterwaga?

Musenyeri Radahunga: Si bose. Kuko hari abahutu b’abapadiri ariko batabigiyemo, babirwanyije ndetse barabatoteza kandi ari abahutu. Kuko bavugaga bati ‘tugomba kwigisha urukundo turi abanyarwanda’.

IGIHE: Hari n’abapadiri bakoraga politiki muri icyo gihe.

Musenyeri Rudahunga: Barayikoze nyine. Abo bajyaga mu ishyaka rya Parmehutu bakoraga politiki. Hari irindi shyaka ryari rishyigikiwe n’abazungu. Ntabwo ari ibintu byafashaga abaturage kuko babacagamo ibice.

IGIHE: Mu gihe cya Jenoside wabaga mu yihe Paruwasi?

Musenyeri Rudahunga: Nabaga hariya i Ngoma, Jenoside yansanze i Butare. Iyo najyaga gusura abakirisitu numvaga babivuga bati ‘tuzica abatutsi’. Bamwe babivugaga buhoro abandi babivuga beruye rwose.

IGIHE: Kwigisha abakirisitu bari bafite iyo mitekerereze byari bimeze bite?

Musenyeri Rudahunga: Twarabigishaga, tukababwira ijambo ry’Imana ariko rero icyo gihe hariho abandi bazaga bakababwira bya bindi bikamera nko ‘kujugunya inyuma ya Huye’ .

IGIHE: Ntibyari ikigeragezo gikomeye kuri mwe?

Musenyeri Rudahunga: None se! Nk’ubwo baraje banyicana abantu aho ngaho bari bahungiye mu kiliziya ndagenda ngira ngo twitegura kuko nanjye nari nziko bagomba kunyica.
Abasirikare bari badutangatanze baratubwira bati ‘nimuhumure ntabwo tubica tugiye kuzana za bisi zibajyane maze tubashyire ahantu tubarindira’, atubeshya.

Noneho agashaka nk’abantu batanu akabasohora tutabizi aho abajyanye babageze nko muri metero 500 bakabica.

Bose amaze kubasohora mu kiliziya nibwo yansohoye, ndebeye mu idirishya nsanga imirambo abandi yabiciye haruguru. None se ibyo byari kunshimisha?

IGIHE: None se warokotse ute?

Musenyeri Rudahunga: Uwo yarabasohoye nari ndi kumwe n’abandi bantu bari bafite indangamuntu z’abahutu aratubwira ati ‘nimwicare’ ntituzi icyo yashakaga gukora. Ni uko twarokotse. Yaradusize aragenda aza kugaruka kutubwira ko dutange amafaranga kuko yatugiriye imbabazi aduca ibihumbi 300 Frw.

IGIHE: Ubwo amafaranga angana atyo mwayakuye he?

Musenyeri Rudahunga: Nta kintu cyari gisigaye muri Paruwasi. Ari amafaranga, ari ibintu bari babijyanye ariko icyo gihe twagerageje gutabaza kuri Diyosezi batwohererza amafaranga kugira ngo dushobore kuyatanga. Baratubwiye bati ‘ntimuyabahe yose, mujye mubaha make, kuko nimuyabaha yose bazagaruka babice’.

IGIHE: Gukomeza umurirmo w’iyogezabutumwa nyuma y’ibyo bihe ntibyari ikigeragezo?

Musenyeri Rudahunga: Byari ikigeragezo ariko wagombaga gukora umurimo w’Imana no gushaka uburyo nyine wunga abasigaye, abapfakazi, impfubyi n’Abahutu kugira ngo bongere basubire mu rukundo.

IGIHE: Ubona muri iki gihe ubwiyunge bwaragarutse mu banyarwanda?

Musenyeri Rudahunga: Hari ibyo ubona kuri bamwe ukabona ubwo bwiyunge bwaragarutse kuko bikirangira Musenyeri Filipo yanyohereje kujya gufasha abagororwa kuri gereza, nahamaze imyaka itatu. Nabonaga mu bagorwa harimo abanangiye, abandi usanga bicuza.

N’iyo ndi aha hari abafunguwe baza kundeba, ugasanga hari abafite umutima bavuga bati ‘ibyo twakoze ni bibi’.

IGIHE: Hari abagize uruhare mu kwica Abatutsi baje kugusaba imbabazi ?

Musenyeri Rudahunga: Rwose benshi n’aho muri gereza barazaga bakicuza bakabimbwira bati ‘twakoze nabi.’

IGIHE: Kera abantu bari bakomeye ku myemerere gakondo, kubacengezamo ivanjili mwabishobojwe n’iki?

Musenyeri Rudahunga: Igihe cyacu imico gakondo bamwe bari barayiretse ndetse niba byaragarutse byaje nyuma ariko ubundi bari barayiretse. Kubandwa, guterekera, ibyo bari barabiretse rwose.

Byagarutse nyuma babitewe n’uko gushidikanya bavuga bati ‘bariya batwigishije ivanjili none dore ibyo bakoze’. Uko gushidikanya gutuma bagaruka kuri gakondo.

IGIHE: Ni iki uhora usaba Imana umunsi ku wundi?

Musenyeri Rudahunga: Ni ukugira ngo nyimenye, nyikunde. Ni cyo nsaba Imana umunsi ku wundi. No kumenya kwihanganira ibigeragezo.

IGIHE: Ni gute umuntu umaze imyaka 60 ari padiri asaba Imana kuyikunda?

Musenyeri Rudahunga: Nibyo koko kuko kugeza ku rupfu urwo rukundo tugomba gukomeza kurusaba kuko umwanzi shitani ahora atugeregaza.

Petero ni we ubivuga ati ‘ shitani imeze nk’intare’ igenda ikuzenguruka kugira ngo irebe ko yagufata. Ntuzibwire ngo maze imyaka iyi n’iyi, nabaye umukirisitu uyu n’uyu shitani ishaka kugira ngo igufate, ifite byinshi ishobora kugushukisha.

IGIHE: Ubona ari nk’iyihe myitwarire abantu basigaye bafite itarabagaho kera?
Musenyeri Rudahunga: Aho wabaza abandi kuko ubu sinkigenda ariko igomba kuba ari myinshi. Hari ibyo nyine byo kudacumbikira abandi, nk’umubano w’abana n’ababyeyi, umubano w’abashakanye, ibyo byarahindutse.

IGIHE: Ubona ari iki cyabiteye?

Musenyeri Rudahunga: Cyane cyane byahindutse nyuma ya Jenoside. Nk’umugabo wica umugore ntibyagabaho, umugore wica umugabo ntibyagaho, umwana wica se ntibyabagaho ariko nyuma ya Jenoside murabibona.

IGIHE: Muri iyi minsi hari n’abapadiri basigaye babuvamo bakajya gushaka.

Musenyeri Rudahunga: Ibyo ntibyabagaho, namenye umupadiri umwe gusa wavuyemo mu 1963.

IGIHE: Waba wibuka amazina ye?

Musenyeri Rudahunga: Yari yarihimbye Padiri Tadeyo Cyumacyimodoka.

IGIHE: Muri Iki gihe basigaye bavamo ari benshi. Utekereza ko biterwa n’iki?

Musenyeri Rudahunga: Aho sinamenya impamvu kuko hari abavamo batarama n’imyaka nk’itatu, ine. Wakwibaza uti kuki yagiyemo kandi baramuhaye umwanya munini, muri Filozofiya, muri Tewolojiya bamuha stage, ibyo byose ntiyabibonaga? Mu mutima wabo sinamenya ibirimo.

IGIHE: Wibuka umunsi Papa yaje mu Rwanda?

Musenyeri Rudahunga: Ndawibuka mu 1990 nagiye no kumureba.

IGIHE: Abakirisitu bamwakiriye bate?

Musenyeri Rudahunga: Bamwikiriye n’ibyishimo byinshi! Bamwakiriye hariya mu Bukinankwavu, ajya kuri Bazilika nabwo asangamo abakirisitu benshi bamwakirana ibyishimo. Noneho n’i Kigali bamwakiriye neza.

IGIHE: Wigeze ujya hanze y’u Rwanda?

Musenyeri Rudahunga: Nagiye mu Budage ngiye kwivuza

IGIHE: Atari ibijyanye n’uburwayi nta handi wigeze utemberera?

Musenyeri Rudahunga: Ntaho

IGIHE: Mu bice by’u Rwanda ntekereza ko wagiye henshi?

Musenyeri Rudahunga: Hafi ya hose ndahazi.

IGIHE: Ni he wageze ukumva ni heza?

Musenyeri Rudahunga: Mu marangara aho navukiye ikirere cyaho ni cyiza, mu Kinyaga ikirere cyaho ni cyiza harera, ku Nyundo mu Bugoyi naho ni heza, Byumba harakonja cyane. Mbona ko ikirere cyo mu Rwanda ari cyiza.

IGIHE: Iyo utaba padiri wumva wari gukora iki?

Musenyeri Rudahunga: (Aseka) Sinakubeshya! Icyo gihe nta mirimo myinshi yabagaho. Iyo wavaga mu ishuri wageragezaga kuba umukarani muri Paruwasi icyo gihe rero nta mwuga wari uhari, nari guhitamo iki se?

IGIHE: Nkeka ko Abaperezida bose bayoboye u Rwanda ushobora kuba ubazi?

Musenyeri Rudahunga: Ndabazi. Kayibanda yanyigaga imbere ho umwaka umwe mu mashuri abanza, mu iseminari nto, mu bufaratiri twariganye. Ndamuzi rwose.

Habyarimana, ndibuka ko ndi muri stage aho I Rambura namwigishije. Umwarimu wabo yari yabuze njya kwigisha muri iryo shuri.

Theodore [Sindikubwabo] ni uw’inaha akora hariya ku bitaro najyagayo kwivuza yari ‘ ‘assistant medicale’.

IGIHE: Habyarimana yari umunyeshuri umeze ute mu ishuri?
Musenyeri Rudahunga: Yari azi ubwenge.

IGIHE: Nk’aba bantu mu buto wababonagamo impano y’ubuyobozi?

Musenyeri Rudahunga: None se wari uziko yaba Perezida ate? Abantu bagombaga kuyobora bigaga hariya muri Groupe Scolaire de la Charité, kubona ko umuseminari agiye kwiga ngo azabe perezida, azategeke, ntiwabitekerezaga.

IGIHE: Nk’aba babiri ni irihe tandukaniro wabonye mu miyoborere yabo?

Musenyeri Rudahunga: Kayibanda amaze guhabwa ubutegetsi yashatse kwerekana ubutegetsi bwe, yashakaga kugira ngo abereke ko umuhutu ategeka. Kandi nawe yarabivugaga agira ati ‘dufashe ubutegetsi ntabwo duteze kubuvaho’.

Habyarimana yafashe ubutegetsi ariko sinabashije kugira ngo ngende nganire nawe.

Kuri Yubile y'imyaka 100 y'ubusaserdoti mu Rwanda, Perezida Kagame yashimiye abapadiri babumazemo igihe kurusha abandi. Aha yasuhuzaga Musenyeri Eulade Rudahunga

IGIHE: Mu gihe gito wabonanye na Kagame, wabonye ari umuntu umeze ute?

Musenyeri Rudahunga: Kagame namumenye ari umwana kuko yavukiye hariya mu Byimana noneho nkajya njya iwabo ku ishuri.

Bamaze guhunga yajyaga agaruka mu Rwanda gusura uriya mwamikazi Rozariya Gicanda. Naramubonye ari agasore, amaze kuba perezida namubonye kenshi.

IGIHE: Mu busore bwe wabonaga ari umuntu witwara gute?

Musenyeri Rudahunga: Icyo sinashobora kukimenya kuko sinari nziko azaba n’umusirikare. Ntavuga menshi ni umuntu utuje.

IGIHE: Niko byakomeje abaye na Perezida?

Musenyeri Rudahunga: Aho sinabimenya.

IGIHE: Ujya ukurikira amakuru?

Musenyeri Rudahunga: Ndakurikira ariko sinjya guta igihe hari n’ibindi ngomba gukora.

IGIHE: Umunsi wawe uba umeze ute?

Musenyeri Rudahunga: Mu gitondo hari amasengesho ngomba kuvuga, nkakurikizaho gutura igitambo cya Misa. Kuko muganga yarambwiye ati ‘ujye uruhuka ntukicare igihe kirekire’, nkajya kuruhuka, nkagira igihe cyo kubyuka nkongera nkasubira muri ya mirimo yanjye nihaye.

Yari afite icyumba cyihariye asengeramo cyarimo n’imyenda ye y’ubupadiri

IGIHE: Ujya urebe umupira?

Musenyeri Rudahunga: Oya ibyo simbikunda. Niyumvira amakuru yo mu Rwanda n’ayo hanze. Iby’imipira simbikunda. Kera narawukundaga.

IGIHE: Wafanaga iyihe?

Musenyeri Rudahunga: (Aseka cyane) Hari imipira y’ubu, hari imipira ya kera ariko sinakubwira ngo nafanaga aba ngaba.

IGIHE: Ni ubuhe butumwa waha urubyiruko?

Musenyeri Rudahunga: Ni ukutishora mu biyobyabwenge kandi no kumenya kubaha ababyeyi, kubahana ubwabo n’urukundo.

Yaturaga igitambo cya misa buri munsi
Iki cyumba nicyo yakoreragamo amasengesho buri munsi

Amafoto: Kazungu Armand

Video: Kazungu Armand na Hakizimana Lydvine


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza