Yari ahugiye mu gusangira Champagne n’abajenosideri- Ubuhamya kuri Rusesabagina muri Mille Collines

Yanditswe na Bukuru JC
Kuya 3 Nzeri 2020 saa 08:32
Yasuwe :
0 0

Urwego rw’Igihugu rw’Ubugenzacyaha, RIB, ruheruka guta muri yombi Paul Rusesabagina akurikiranyweho ibyaha by’iterabwoba, bishingiye ahanini ku mutwe wa FLN wubakiye ku mpuzamashyaka MRCD yari akuriye, byagabwe mu nkengero z’ishyamba rya Nyungwe mu 2018.

Rusesabagina yamenyekanye cyane nyuma ya filime yamukinweho, Hotel Rwanda, yamugaragaje nk’intwari yarokoye Abatutsi basaga 1200 bari bahungiye muri Hotel des Mille Collines, nyamara bo bahamya ko huzuyemo amakabyankuru.

Tatien Ndolimana Miheto, ni umwe mu bari bahungiye muri Hotel des Milles Collines n’umuryango we. Avuga ko hari hahungiye abantu benshi mu nzego zinyuranye, abanyamategeko, abaganga, abacuruzi n’abandi bari bafite abamenyi benshi, ku buryo mu gihe bahamaze boherezaga ubutumwa hirya no hino basaba ubufasha.

Ubwo Jenoside yarimo ikorwa, ngo abantu bari muri Mille Collines babaga bafite ubwoba ko bashobora kwicwa isaha iyo ariyo yose, ndetse radio RTLM yabaga ibagarukaho, ko umuntu uzitwara neza mu kwica azagororerwa.

Rusesabagina yatangiye kuyobora Hotel des Mille Collines ku wa 16 Mata 1994, icyumweru kimwe Jenoside itangiye. Icyo gihe ngo yahise yigwizaho ububasha bwose, akakira cyangwa akirukana uwo ashatse.

Amacumbi ngo yayahaye abantu be ba hafi n’abandi bashoboraga kwishyura, abatabishoboye akabasohora, anarenga ku busabe bwa Perezida wa Sabena Hotels yacunganga iyo hotel, wari wasabye ko yakira impunzi zose atazishyuje. Ni icyemezo cyari cyafashwe ku wa 18 Gicurasi 1994.

Mwenenganucye Pasa wakoraga kuri Hotel des Mille Collines kuri reception, kugeza Jenoside itangiye, avuga ko Rusesabagina yahageze aherekejwe n’abasirikare, agiye gushakayo lisansi nk’uko yakundaga kubigenza. Ahageze ngo yasanze Umuholandi Cornelius Bik wayoboraga Mille Collines yagiye, Mwenenganucye ni we wari wasigaranye ibikorwa byose, aza kumwaka imfunguzo atangira kuhayobora.

Abantu bari batangiye kugera muri hotel kandi nta wishyuzwaga ibiribwa, ibinyobwa cyangwa aho kurara, ari nako Cornelius Bik yabishakaga mbere yo gucyurwa iwabo, ariko hotel igeze mu maboko ya Rusesabagina ashaka kuyibora nka hoteli iri mu bucuruzi mu minsi isanzwe.

Mu ntangiriro abantu bishyuraga ako kanya, amafaranga abashiranye batangira gusinya sheki. Mwenenganucye ahamya ko abatabishoboye basohowe mu byumba, basimbuzwa abashoboye kwishyura.

Hari impamvu zatumye abahungiye muri Mille Collines baticwa

Ubuhamya bugaragaza ko mu gihe cye nk’umuyobozi wa hotel, Rusesabagina yari afitanye umubano wa hafi n’abayobozi b’Interahamwe barimo Robert Kajuga wari umukuru wazo hamwe na Froduard Karamira, n’abasirikare bakuru nka Gen. Augustin Bizimungu wari Umugaba w’Ingabo na Col. Théoneste Bagosora wari Umuyobozi w’Ibiro bya Minisitiri w’Ingabo. Ngo bakundaga no kumusura.

Abarokotse Jenoside bari muri Mille Collines bakomeje kugaragaza ko Rusesabagina nta ruhare yagize mu kubatabara, kuko nta jambo rya nyuma yagiraga ku byaberaga muri hotel.

Miheto agaragaza ko impamvu abantu bo muri Hotel des Mille Collines barokotse atari impuhwe z’umuntu umwe, ahubwo ari impamvu nyinshi zirimo uruhare rw’Ingabo z’Umuryango w’Abibumbye zari mu Rwanda (Minuar), Ikigo cy’Ababiligi, Sabena ari nacyo cyacungaga Hotel des Mille Collines n’uruhare rw’Ingabo za FPR, zari zikomeje urugamba rwo kubohora igihugu.

Mu buhamya yigeze gutanga, Miheto yavuze ko ku wa 7 Mata 1994 Hotel des Mille Collines n’utundi duce tumwe twatangajwe nk’uducungiwe umutekano na MINUAR. Hoherejwe abasirikare bamwe bari bayobowe na Lieutenant-Colonel Cyprien Moigny, kugeza mu mpera za Jenoside.

Icyo gihe ibendera ry’Umuryango w’Abibumbye ryazamuwe hejuru y’inyubako, ku muryango wayo hashyirwa imodoka za gisirikare mu kurinda impunzi nubwo hirya habaga hari Interahamwe.

Mu igorofa ya gatanu y’iyi hotel kango ngo niho hari icyicaro cy’Umutwe w’ingabo z’Abafaransa wari ushinzwe itumanaho, bityo Abafaransa ngo ntibari gupfa kwemerera abicanyi kwinjira muri hotel. Ngo Rusesabagina ubwe ntiyavuga ko ari we wabujije abicanyi kwinjira.

Ubuhamya bwanagaragaje uburyo ubwo Umufaransa Bernard Kouchner yagiriraga uruzinduko mu Rwanda mu 1994, yaburiye guverinoma kudatera impunzi zari muri hotel, bitabaye ibyo u Bufaransa bugahagarika inkunga zose bwahaga iyo guverinoma.

Byongeye, Hotel des Mille Collines yari umutungo w’Ikigo cya Sabena cy’Ababiligi cyakoraga iby’indege, ku buryo yarindwaga cyane ngo hato batayisahura cyangwa igasenywa ikajyana n’impunzi zihishemo.

Indi mpamvu ni uko kugeza mu mpera za Mata 1994, ingabo za leta icyo gihe zahisemo kuba ziretse abatutsi mu bice nko muri Hotel des Mille Collines, Paruwasi Sainte Famille, muri Saint Paul i Kabgayi n’i Nyarushishi mu Karere ka Rusizi.

Ubwo RPF-Inkotanyi nayo yari ikomeje igitutu, mu duce yari yafashe hagendaga habaho guhererekanya impunzi ku babishatse, nk’abifuza kujya mu gice cyari kiri mu maboko y’ingabo za Leta, cyangwa abashaka gusanga Inkotanyi.

Ibyo bikiyongeraho ubutumwa bw’intabaza abahungiye muri Mille Collines babaga bohereza ubutitsa bari muri hotel, ibintu byakozwe na mbere y’uko Rusesabagina atangira kuhayobora.

Miheto yakomeje ati “Ni izo mpamvu zatumye dukomeza kubaho, naho umuntu ku giti cye, Rusesabagina, we yari ahugiye mu gusangira Champagne n’abajenosideri, abajenosideri bari bemerewe buri kintu cyose, na ba bajenosideri bo hasi, bamubwiraga ko hari Champagne, Whisky, byeri kuri Mille Collines, bakaza gufata.”

“Rusesabagina ntabwo yari ashoboye kubakumira na gato, rero niba muri Milles Collines hataratewe si uko Rusesabagina yakoze ubuvugizi, oya. Ni uko hari izindi mbaraga ndetse na guverinoma y’abajenosideri yari yafashe icyemezo cyo kuba baretse kwica abantu bari muri Mille Collines, wenda bashoboraga kutwica barangije kubona ibyo bashaka, icyiza ni uko batakigezeho.”

Nyuma ya Jenoside, abarokotse bagerageje kwiyubaka, ariko Rusesabagina wagizwe intwari kubera ububabare abandi banyuzemo, atangira kujya mu bikorwa byo guhungabanya umutekano w’igihugu, ari nabyo bigize ibyaha aregwa.

Miheto yakomeje ati “Tekereza uwarokotse Jenoside, wageragezaga kongera kwiyubaka kugira ngo abashe kubaho, abashe kugira uruhare mu kubika urwibutso rw’abe, ugasanga ahungabanyijwe mu rugendo rwe rwo kwiyubaka, agakorerwa iyicarubozo n’umuntu wagizwe icyamamare n’abo mu burengerazuba bw’Isi, n’amafilime n’ibitabo.”

“Mugize icyamamare umuhakanyi, umuntu ufite ingengabitekerezo y’amoko, umuntu wifitemo ivangura, abakora filime bagakora intwari ikamamara, igahabwa ibihembo n’abakuru b’ibihugu bakomeye, mwibaza ingaruka bigira ku warokotse Jenoside uba uhanganye n’ibinyoma by’uwo muntu?”

Yagarutse ku buryo Rusesabagina yavugaga uburyo yakijije abantu batandukanye kandi ntacyo yabamariye, ugasanga bamwe batumva ingano y’ibikomere igikorwa nk’icyo gitera.

Yavuze ko uyu munsi ari ukwiruhutsa kw’abarokotse Jenoside kubera ibikorwa bimaze iminsi bya Rusesabagina.

Ati “Kuba Rusesabagina agiye kuburanishirizwa mu Rwanda ni ubutumwa bukomeye cyane, ku Banyarwanda n’abanyamahanga, baba abantu basanzwe cyangwa abanyapolitiki badashishikajwe na politiki y’ibihugu byabo ahubwo bashishikajwe n’ubuzima bwa politiki bw’ibi bihugu nk’u Rwanda.”

“Inshuti zacu zo mu Burengerazuba bw’Isi zari zishishikajwe no gushyigikira bene ibi bikorwa babonye ubutumwa bukomeye. Ndahamya ko ifatwa rya Rusesabagina, urubanza azacibwa, bizakangura, binakebure abantu, babone ko u Rwanda ari igihugu gikomeye.”

Avuga ko byari kuba bibabaje iyo filime Hotel Rwanda yagize Rusesabagina itarangira nk’uko ubu irangiye.

Yakomeje ati “Filime Hotel Rwanda ubu irarangiye, irangiranye n’ifatwa rya Rusesabagina, umunyabyaha. Turishimye cyane kubera inzego z’u Rwanda zabashije kubikora.”

Rusesabagina aregwa ibyaha birimo iterabwoba, gutwika, ubushimusi n’ubwicanyi, byakorewe abaturage b’inzirakarengane, b’Abanyarwanda mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018 no muri Nyungwe mu Karere ka Nyamagabe mu Ukuboza 2018.

Paul Rusesabagina aheruka gutabwa muri yombi, ubu afungiwe mu Rwanda
Tatien Ndolimana Miheto ni umwe mu barokokeye muri Hotel des Milles Collines n’umuryango we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .