00:00:00 IGIHE NETWORK KN KINYARWANDA EN ENGLISH FR FRANCAIS

Yakumiriwe muri Harvard! Kenneth Roth wijunditse u Rwanda akomeje kubura aho apfunda imitwe

Yanditswe na Musangwa Arthur
Kuya 8 Mutarama 2023 saa 07:12
Yasuwe :

Muri Mata 2022 nibwo Kenneth Roth yatangaje ko agiye kuva ku ntebe y’ubuyobozi bwa Human Right Watch, Umuryango uvuga ko uharanira uburenganzira bwa muntu. Ni inkuru yakiranywe yombi n’Abanyarwanda bari bamaze kuzinukwa uyu mugabo bitewe n’uburyo yagiye akunda kwibasira igihugu cyabo n’ubuyobozi bwacyo.

Muri Kanama 2022, Kenneth Roth yashyize mu bikorwa ibyo yari yavuze, ava ku mwanya w’Umuyobozi Nshingwabikorwa wa Human Right Watch yari yaragezeho mu 1993.

Icyakora, ubu yongeye kugaruka cyane mu itangazamakuru bitewe n’icyemezo Kaminuza ya Harvard iherutse gufata cyo kwanga ko uyu mugabo ahabwa akazi ko kuzajya afasha mu bushakashatsi, gutanga amasomo ndetse n’ibiganiro ku banyeshuri biga mu ishuri ry’iyi kaminuza ryigisha ibijyanye n’imiyoborere, Harvard Kennedy School.

Amakuru avuga ko muri Mata 2022 ubwo Kenneth Roth yatangazaga ko agiye kuva muri Human Rights Watch, yatangiye kujya mu biganiro na Sushma Raman ukora nk’Umuyobozi Nshingwabikorwa w’Ikigo gishinzwe ibijyanye n’uburenganzira bwa muntu muri Harvard Kennedy School.

Muri icyo gihe, Raman yabajije Roth niba ashobora kwemera akazi ko kuzajya afasha iki kigo mu bijyanye n’ubushakashatsi, gutanga amasomo ndetse n’ibiganiro muri iki kigo.

Kuri Raman, yumvaga uyu mugabo ashobora kuba umuntu w’ingirakamaro muri Harvard Kennedy School, ashingiye ku bunararibonye bw’imyaka 30 afite mu bijyanye n’uburenganzira bwa muntu.

Si ubwa mbere Roth yari kuba akoranye n’iki kigo cy’ibijyanye n’uburenganzira bwa muntu gikorera muri Harvard Kennedy School, kuko kuva cyashingwa mu 1999 yagiye atangamo ibiganiro bitandukanye.

Icyamenyekanye cyane ni icyo yatanze mu 2004 kigaruka cyane ku kurebera hamwe niba icyemezo cya Amerika cyo gutera Iraq cyari cyubahirije uburenganzira bwa muntu.

Kimwe mu byo abantu bibukira cyane kuri iki kiganiro ni uko cyari kiyobowe na Samantha Power wabaye Ambasaderi wa Amerika mu Muryango w’Abibumbye, ubu ayobora Ikigo cy’Abanyamerika gishinzwe iterambere mpuzamahaga, USAID.

Mu kiganiro cyabaye hifashishijwe ikoranabuhanga, Kenneth Roth yavuze ko yakwishimira cyane kubona aka kazi muri Harvard Kennedy School, ndetse agaragariza abayobozi b’iki kigo ko afite imishinga migari ishobora kubafasha.

Yavuze ko afite gahunda yo kwandika igitabo kizaba kigaruka ku bihe yagiriye muri Human Rights Watch n’ubunararibonye yahakuye, ndetse no gukora ubushakashatsi bugaragaza uko amatsinda mato y’abantu ashobora kugena ibikorwa na Guverinoma z’ibihugu abarizwamo.

Ku wa 7 Gicurasi 2022, Raman yoherereje Roth ubusabe bwo kuba umukozi wa Harvard Kennedy School ndetse ku wa 9 Kamena, uyu mugabo agaragaza ko yemeye amategeko n’amabwiriza agenga izi nshingano nshya yari agiye kwinjiramo.

Nyuma yo guhuza kw’aba bagabo bombi, Raman yahise amenyesha umuyobozi w’amasomo muri iki kigo, Douglas Elmendorf ko Roth agiye guhabwa akazi.

Nyuma yo kumenya iby’iyi gahunda, Douglas Elmendorf yahamagaye Roth kugira ngo arusheho kumenya neza ibijyanye n’ayo makuru.

Nyuma y’ibyumweru bibiri, Roth witeguraga kwinjira muri izi nshingano nshya yatunguwe no kubwirwa na Douglas Elmendorf ko adashobora guhabwa aka kazi.

Kenneth Roth wazonze u Rwanda yazize iki?

Kubara inkuru ya Kenneth Roth ntugaruke ku mateka afitanye n’u Rwanda, Abanyarwanda bakunenga gucamo kabiri amateka.

Ku buyobozi bwa Kenneth Roth, mu bihe bitandukanye HRW yasohoye raporo zibasira u Rwanda mu bijyanye n’uburenganzira bwa muntu, ndetse na Perezida Paul Kagame mu buryo bwihariye.

Imwe muri izo ni iyasohotse muri Nyakanga 2017, mbere y’amatora ya perezida.

Mu Ukwakira 2017, mu Nteko Ishinga Amategeko habaye ikiganiro nyunguranabitekerezo kuri iyo raporo yiswe "All Thieves Must Be Killed", ugenekereje mu Kinyarwanda ni "abajura bose bagomba kwicwa".

Iyo raporo yavugaga ko hari abantu 37 bishwe n’abapolisi, abasirikare, inkeragutabara cyangwa DASSO, mu turere twa Rubavu na Rutsiro.

Nyamara mu iperereza ryakozwe na Komisiyo y’Igihugu y’Uburenganzira bwa Muntu, ryagaragaje ko ataribyo, kuko yasanze hari abantu barindwi bavugwaga ko bishwe n’abasirikare kandi bakiriho.

Yanavuze ko hari n’abandi byavugwaga ko bishwe nyamara bazize urupfu rusanzwe n’abo komisiyo yasanze batabaho.

Muri uwo mwaka wabayemo amatora ya Perezida, Roth yaje no gushinja Perezida Kagame ubwicanyi, nabwo abanyarwanda bamwamaganira kure.

Icyo gihe Louise Mushikiwabo wari Minisitiri w’Ububanyo n’amahanga yamusabiye ko yajyanwa i Ndera, ahavurirwa abafite uburwayi bwo mu mutwe.

Yanditse kuri Twitter ati "Ken, Ken, Ken... waretse imiti nanone? Hari ahantu hitwa i Ndera mu Rwanda, bashobora kugufasha."

Icyo gihe Inteko Ishinga Amategeko yasabye Guverinoma "kongera gusuzuma amasezerano y’imikoranire n’uyu muryango, ku buryo ibikorwa bigayitse bikomeje kuwuranga mu guharabika isura y’u Rwanda n’Abanyarwanda bitakomeza gukorwa hashingiwe cyangwa hitwajwe ayo masezerano atanakurikizwa".

Ubwo hamenyekanaga amakuru y’uko Kenneth Roth yimwe akazi muri Harvard Kennedy School, Umuvugizi wa Guverinoma y’u Rwanda, Yolande Makolo ni umwe mu bagize icyo bavuga kuri iki cyemezo.

Abinyujije kuri Twitter yagize ati "Uwahoze ari Umwami muri Human Right Watch waranzwe n’imikorere idahwitse yimwe akazi muri Harvard? Ku buyobozi bwa Roth, uyu muryango wazambije ibintu."

Imikorere idahwitse ya Kenneth Roth ntiyabonwaga n’u Rwanda gusa, ahubwo ishimangirwa na Kathryn Sikkink wigisha ibijyanye n’uburenganzira bwa muntu muri Kennedy School.

Uyu mugore avuga ko "baje gutekereza basanga Kenneth Roth yari kuba ari umukozi uteye ubwoba muri iri shuri."

Kathryn Sikkink yakomeje avuga ko nubwo mu bihe bitandukanye Kennedy School yagiye ikoresha abakozi batandukanye b’inzobere mu by’uburenganzira bwa muntu barimo William Schulz na Salil Shetty bavuye muri Amnesty International, Kenneth Roth we afite imyitwarire isa nk’iyihariye, ari nayo yatumye yimwa uyu mwanya.

Amakuru yizewe ahari avuga ko Douglas Elmendorf yimye Roth akazi kubera ukuntu yagiye akunda kwibasira Israel ndetse ntahweme no kubigaragaza kuri Twitter.

Muri raporo Human Rights Watch yagiye isohora mu bihe bitandukanye ku buyobozi bw’uyu mugabo, yagiye ishyira Israel mu bihugu birimo ikandamizwa ry’abantu n’ibikorwa byo guhonyora uburenganzira bwa muntu. Ni icyiciro Israel yisangagamo iri kumwe n’ibindi bihugu nka Angola, Colombia, Turikiya na Zimbabwe.

Urugero, raporo yasohowe n’uyu muryango muri Mata mu 2021 yavuze ko Israel iri gukorera Abanya-Palestine igisa na apartheid yo muri Afurika y’Epfo. Ni ibintu byamaganiwe kure n’Abayahudi, bagaragaza ko Roth abafitiye urwango.

Kathryn Sikkink yavuze ko yagerageje kumvisha Douglas Elmendorf ko Roth atigeze arenganya Israel, ariko undi aramutsembera amubwira ko ibikorwa by’uyu mugabo bidashobora gutuma abona aka kazi muri Harvard Kennedy School.

Kenneth Roth wijunditse u Rwanda akomeje kubura aho apfunda imitwe nyuma yo kwimwa akazi muri Harvard

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .