00:00:00 IGIHE NETWORK KN KINYARWANDA EN ENGLISH FR FRANCAIS

Yakubiswe ubuhiri ku mabere muri Jenoside bimuviramo kanseri: Ubuhamya bw’ubugome Mukarusine yakorewe

Yanditswe na Hakizimana Jean Paul
Kuya 9 June 2022 saa 10:22
Yasuwe :

Iyo bavuze amahano yabereye mu Rwanda mu 1994 ubwo hakorwaga Jenoside yakorewe Abatutsi, hari bamwe usanga batabyemera kuko batiyumvisha uburyo abaturage bari basangiye igihugu n’umuco, ubwabo bahindukiranye bakicana kugeza ubwo abarenga miliyoni bishwe mu mezi atatu.

Hari n’Abanyarwanda biganjemo abakomoka ku bateguye bakanashyira mu bikorwa Jenoside yakorewe Abatutsi mu 1994 bakunze kubihakana, urugero ni nk’ishyirahamwe Jambo asbl n’abambari babo benshi ntarondoye kuko si cyo nshaka kuvugaho.

Mukarusine Alphonsine w’imyaka 55 utuye mu Karere ka Rwamagana mu Murenge wa Mwulire mu Kagari ka Mwulire mu Mudugudu wa Gisiza, ari na ho yarokokeye, ni umwe mu bo wasura ukamenya ubugome Jenoside yakorewe Abatutsi yakoranwe kuko yayiburiyemo abo mu muryango we bose barimo abo bavukanaga, umwana we umwe ndetse n’umugabo we.

Uretse ibi kandi yanayikuyemo kanseri y’ibere nyuma yo gukubitwa ubuhiri ku mabere ari umubyeyi wonsa bikamuviramo kubyimba haza no kuvukamo kanseri amaranye imyaka myinshi.

Mu kiganiro uyu mubyeyi yagiranye na IGIHE yavuze ko ubwo Jenoside yakorerwaga Abatutsi yatangiraga yari afite abana batatu maze ngo we n’abandi Batutsi bishyira hamwe bahungira ku musozi wa Mwulire aho bari bariyo ari benshi bizeye kuharokokera bose.

Yavuze ko kuva bagitangira guhungira ku Musozi wa Mwulire batangiye kugabwaho ibitero, ibyinshi babasha kubisubiza inyuma iminsi myinshi ariko baza kugera igihe bacika intege.

Mukarusine yavuze ko itariki atazibagirwa na n’ubu ikimuri mu mutwe ari iya 19 kuko ari bwo yakubiswe ubuhiri ku ibere mu gihe yabonaga abandi bavandimwe be bicwa.

Ati “Tariki ya 19 Mata ni yo tariki ntazibagirwa kuko nonsaga umwana w’amezi icyenda icyo gihe bishe abantu benshi noneho njye bankubita ubuhiri mu ibere ndabibana nkajya mwonsa ibere rimwe, umugabo wanjye we bamwishe tariki ya 20 Mata. Nagiye kwa muganga rero bambwira ko badashobora kumbaga kuko ngo byangiraho ingaruka.”

Mukarusine yavuze ko kuri ubu afata imiti imugabanyiriza uburibwe n’ubushyuhe ngo kuko iryo bere ririmo kanseri bamubwiye ko bitapfa kumworohera baribaze kuko bishobora kumuteza ibyago byinshi kuruta uko yaryihorera.

Mukarusine avuga ko kubera gupfusha abari bagize umuryango we bose, bakiyongera ku mwana we umwe n’umugabo we bishwe areba, bituma atibagirwa na gato Jenoside yakorewe abatutsi mu 1994. Avuga ko ibyabaye kuri ubu abifata nk’ibyabaye ejo mu gitondo kuko ngo abyibuka neza byose.

Ati “Jenoside nyibuka nkiyabaye ejo mu gitondo bose uko babishe ndabireba neza mu maso, ubu nta n’umwe ngira wo mu muryango wanjye habe n’umwe pe.”

Mukarusine yasabye Leta kumwubakira inzu nziza yasaziramo ngo kuko kuri ubu adashoboye guhinga kandi n’inzu abamo iri kugenda isaza.

Yavuze ko ikindi kintu kimushengura kuri ubu ari uko abamwiciye n’abamukubise atigeze ababona nibura ngo bamusabe imbabazi ku mahano bamukoreye we n’umuryango we.

Ati “Sinzi aho bagiye kuko simbabona, urumva niba umuntu akwiciye ntunamubone ngo agusabe imbabazi uhorana akababaro, niba barafunzwe, niba barapfuye nta makuru yabo njya menya.”

Yavuze ko gusa ashimira Leta yazanye igitekerezo cyo kunga Abanyarwanda bagashyira hamwe kuri ubu nibura ngo amoko n’ibindi byose byabatanyaga bikaba bitagihari.

Umusozi wa Mwulire ni hamwe mu haguye Abatutsi benshi ariko babanje kwirwanaho mu gihe cy’ibyumweru bibiri, nyuma abasirikare n’interahamwe barabatera tariki ya 18 Mata babanza kubateramo grenade n’amasasu ubundi interahamwe zibiraramo zirabica.

Kuri uyu musozi hari urwibutso rushyinguyemo abishwe muri Jenoside yakorewe Abatutsi barenga ibihumbi 26, abenshi bakaba bariciwe kuri uyu musozi.

Mukarusine avuga ko ibyo yakorewe ari igihamya cy'ubugome ndengakamere Jenoside yakoranywe
Mukarusine yasabye ko Leta yamufasha kubakirwa inzu y'amasaziro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .