00:00:00 IGIHE NETWORK KN KINYARWANDA EN ENGLISH FR FRANCAIS

Yakoraga ibilometero 20 ajya gusharija telefoni: Ibyishimo bya Kantengwa wahawe amashanyarazi

Yanditswe na Thamimu Hakizimana
Kuya 29 July 2022 saa 03:18
Yasuwe :

Kantengwa Peace ari mu byishimo bidasanzwe nyuma yo guhabwa amashanyarazi akomoka ku mirasire y’izuba muri gahunda ya Cana Challenge ya Banki y’u Rwanda Itsura Amajyambere (BRD).

Kantengwa ni umubyeyi w’abana bane utuye mu Mudugudu wa Rugendo ya I, Akagari ka Ryabega mu Murenge wa Nyagatare, Akarere ka Nyagatare.

Mu kiganiro yagiranye na IGIHE, kuri uyu wa Kane nyuma yo guhabwa amashanyarazi na Banki itsura Amajyambere y’u Rwanda (BRD) n’abafatanyabikorwa bayo barimo ikigo cya Crystal Connect, yavuze ko yishimye cyane kuko atazongera gukora urugendo rurerure ajya gusharija telefone no kumva amakuru.

Kantengwa yashyikirijwe amashanyarazi mu mushinga wa BRD wo kugeza amashanyarazi ku miryango ibihumbi 24 itayafite, uzwi nka Cana Challenge.

Yemeza ko yari abayeho mu buzima bubi kubera ko yiberaga mu icuraburindi kandi bikamusaba gukora ibilometoro bigera kuri 20 kugira ngo abashe gusharija telefone ye.

Ahamya ko kugira ngo abana be basubiremo amasomo bize byabasabaga gukora urugendo rurerure bakajya ku musozi w’ahitwa Mbare cyangwa mu isantere ya Karangazi bigatuma bataha mu gicuku.

Yagize ati “Ndishimye cyane kuko nabaga mu mwijima kandi abana banjye bariga ku buryo baburaga uko basoma bikabasaba kujya mu baturanyi gutira cyangwa se ubundi bakambuka bakajya iriya hakurya kuri uriya musozi i Mbare gushaka umuriro bikambabaza kuko byatumaga bataha nijoro.”

Yakomeje ashimira Leta yabonye ko akwiye kubona amashanyarazi, kuko bizatuma abana be biga neza bagatsinda neza bityo na bo bakazatera imbere nk’abandi.

Ati “Byari bigoye kuko no gucana byabaga ari intambara kubera umwijima, bwiraga ukabona abana no guteka birabananiye nta hantu ho gusharija telefone nta no kumva radiyo ngo wumve amakuru, ariko ubu nzajya nyumvira ku gihe, mbese ndi mu byishimo.”

Umwana w’uyu mubyeyi witwa Mugeni Judith, nawe yavuze ko yishimiye kuba bahawe amashanyarazi anashimangira ko bizatuma atsinda neza mu ishuri.

Yagize ati “Ndashimira Leta yaduhaye umuriro ikanabona ko tuwukeneye, nizeye ko umuriro uzamfasha cyane kuko sinzongera gukora urugendo rurerure njya gushakisha aho nigira nijoro, bitume ntsinda neza.”

Umuyobozi w’Ikigo cya Crystal Connect kigamije guteza imbere imibereho y’abaturage, Brendah Muteteri, yabwiye IGIHE ko bafite gahunda yo kuzacanira ingo 1000 mu Karere ka Nyagatare.

Yagize ati “BRD ifite gahunda yo gucanira ingo ibihumbi 24 muri Cana Challenge, ni muri urwo rwego yatwegereye kugira ngo bakore icyo gikorwa natwe twinjira muri icyo gikorwa tukaba tuzacanira ingo 1000."

Yongeyeho ko batanze miliyoni 15Frw mu gitera inkunga umushinga wa Cana Challenge kugira ngo iyo ntego igerweho.

BRD ikaba yaratekereje uyu mushinga wa Cana Challenge wo kuzacanira ingo ibihumbi 24 mu rwego rwo kunganira Leta kugira ngo umwaka wa 2024 uzagere Abanyarwanda bose bafite amashanyarazi.

Kuva iyi gahunda ya Cana Challenge yatangira hamaze gucanirwa ingo 19 806 zirimo 1 157 zo mu Karere ka Nyagatare.

Kantengwa yishimiye ko yakuwe mu icuraburindi
Inyubako ya Kantengwa yashyizweho amashanyarazi aturuka ku mirasire y'izuba
Ubwo Kantengwa yahabwaga amashanyarazi mu nyubako ye
Umwana wa Kantengwa avuga ko azajya yiga neza bimufashe gutsinda mu ishuri
Kantengwa ari mu byishimo byinshi nyuma yo guhabwa amashanyarazi
Umuyobozi w’Ikigo cya Crystal Connect, Brendah Muteteri yavuze ko bishimiye gufatanya na BRD mu gucanira abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .