Uwasimbuye Theodor Meron ntiyanyurwaga n’uburyo abafungiwe ibyaha bya Jenoside barekurwaga

Yanditswe na HABIMANA James
Kuya 2 Mata 2019 saa 07:32
Yasuwe :
0 0

Umuyobozi w’Urwego rwasigariyeho Inkiko Mpuzamahanga Mpanabyaha, UNMICT, Umucamanza Carmel Agius uri mu Rwanda, yavuze ko mu mikorere ye atigeze yishimira uko abahamijwe ibyaha bya Jenoside n’uru rukiko bagiye barekurwa, arahirira ko amakosa yakozwe atazasubira.

Carmel Agius wanakoze mu Rukiko Mpuzamahanga Mpanabyaha rwari rwarashyiriweho u Rwanda nk’umucamanza, yavuze ko nubwo uwamubanjirije hari ibyo yakoze bidaciye mu mucyo, gusa ngo ntacyo yabikoraho uyu munsi bigendanye n’indangaciro z’akazi ariko ko azagira ibyo ahindura.

Carmel w’imyaka 73 y’amavuko akomoka muri Malta, yasimbuye Umunyamerika Theodor Meron w’imyaka 88 y’amavuko mu kwezi kwa mbere muri uyu mwaka wa 2019.

Inshuro nyinshi Meron yanenzwe na Guverinoma y’u Rwanda ndetse n’imiryango irengera abacitse ku icumu rya Jenoside yakorewe Abatutsi, ashinjwa kugabanya ibihano by’abahamijwe ibyaha bya Jenoside no kubarekura ibihano bahawe bitararangira kandi u Rwanda rutagishijwe inama.

Mu bo Meron aheruka kurekura barimo Col. Simba Aloys warekuwe mu gihe yari yarakatiwe n’Urukiko Mpuzamahanga Mpanabyaha rwashyiriweho u Rwanda (ICTR) imyaka 25, rumaze kumuhamya ibyaha byo kuyobora ibitero bitandukanye by’Interahamwe zishe Abatutsi mu zahoze ari Perefegitura ya Butare na Gikongoro n’ibyaha byibasiye inyokomuntu. Yari afungiye muri Bénin.

Mu 2016 yandikiye urukiko asaba kurekurwa bitewe n’uko yarangije 2/3 by’igihano cye.

U Rwanda n’imiryango y’abarokotse Jenoside bamaganye ubwo busabe, bavuga ko bizabangamira abarokotse kandi bihabanye n’ubutabera mpuzamahanga.

Kuri uyu wa mbere ubwo Umucamanza Carmel Agius yakirwaga na Minisitiri w’Ubutabera Busingye Johnston, yavuze ko yiteguye guhindura amakosa yose yakozwe.

Yagize ati “Iyi ni inshuro ya mbere nsuye iki gihugu ariko ndi na hano mu rwego rwo guha agaciro inzirakarengane zazize Jenoside. Ku birebana n’uko Inkiko zashyizweho na Loni zagiye zikora mu by’ukuri ntizakoze neza uko bikwiye, ubundi Umuryango Mpuzamahanga washyizeho izi nkiko ngo urwanye umuco wo kudahana kubera ko iyo hari ibyaha byakozwe byibasiye inyokomuntu, uburyo bwiza ni ugushyiraho uko harwanywa uwo muco.”

Yakomeje agira ati“Naje mu Rwanda n’umutima wanjye wose, kuvugisha ukuri no kuganira n’abanyarwanda bahuye n’izi ngaruka kandi bakeneye kubona ubutabera.”

Ati “Icyo navuga ni uko ntigeze numvikana n’uwo nasimbuye, ntabwo byagiye bica mu mucyo ariko ndatekereza ko hakwiye kubaho impinduka.”

Carmel Agius yavuze ko kugira ngo umuntu asabe kuba yafungurwa hari ibigomba kuzagenderwaho, ku buryo uzaba atarageza bibiri bya gatatu by’igifungo cye atazemererwa kuba yasaba kuba yafungurwa.

Umucamanza Meron yagiye anengwa kurekura ba ruharwa kandi akabikora nta nama asabye u Rwanda.

Carmel Agius na we yavuze ko ibi atari byiza kandi ko we yiteguye kujya agisha inama leta y’u Rwanda, Ubushinjacyaha ndetse n’imiryango y’abarokotse Jenoside.

Yatangaje ati “Nzagerageraza kubanza kubwira leta y’u Rwanda mu gihe hari uwaba yasabye kuba yarekurwa, ntabwo nemeranya n’uko byagiye bikorwamo, ni byiza ko abantu bumva ibyo iki gihugu kivuga byanaba ngombwa kikagishwa inama, ikibabaje ni uko mbere bitigeze bikorwa ariko ndashaka kubihindura.”

Minisitiri w’Ubutabera Busingye Johnston yavuze ko u Rwanda rutanga ko abantu bahabwa ifungurwa ry’agateganyo, ahubwo icyo banga ni uko bahabwa ifungurwa ry’agateganyo mu buryo bufifitse kandi butanyuze mu mucyo no mu mategeko aboneye y’inkiko.

Yagize ati “Iki nicyo duhora dusaba kandi Perezida w’Urukiko atwijeje ko na we ariko abibona, ko uko byagiye bigenda bitamushimishije ndetse bimwe na bimwe ko atanabyemeraga ariko ko aza gusuzuma uko bikorwa n’amategeko abigenga ndetse n’amabwiriza, kugira ngo bikorwe mu buryo abo bireba bose bumva ko byakozwe mu buryo buboneye.”

Umucamanza Carmel Agius uzayobora uru kugeza ku wa 30 Kamena 2020, yavuze ko azaharanira ko imibanire y’uru rukiko n’u Rwanda izarushaho kuba myiza.

Umucamanza Carmel Agius, Minisitiri Busingye n'Umunyamabanga wa leta ushinzwe Itegeko Nshinga n'andi mategeko, Uwizeyimana Evode

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza