Uwafashe ifoto Perezida Kagame na Tshisekedi bafatanye mu kiganza yanenze abayisobanuye nabi

Yanditswe na Habimana James
Kuya 13 Ukuboza 2019 saa 05:30
Yasuwe :
0 0

Tariki 8 Ukuboza uyu mwaka, Perezida Paul Kagame na mugenzi we wa Repubulika Iharanira Demokarasi ya Congo, Félix Tshisekedi, bitabiriye ikiganiro cyavugaga ku hazaza ha Afurika mu myaka 60 iri imbere.

Ni kimwe mu biganiro byatanzwe mu itangizwa ry’Ihuriro ‘Kusi Ideas Festival’ ryateguwe n’Ikigo cy’Abanyakenya kimaze imyaka 60 gikora itangazamakuru, hagamijwe kurebera hamwe ibyakorwa mu hazaza heza ha Afurika.

Ni ikiganiro kandi cyitabiriwe na Moussa Faki Mahamat uyobora Komisiyo ya AU; Raila Odinga, Intumwa ya Afurika Yunze Ubumwe mu bijyanye n’Iterambere ry’Ibikorwa remezo muri Afurika na Dr. Vera Songwa, Umunyamabanga Nshingwabikorwa wa Komisiyo ya Loni ishinzwe Afurika; cyayobowe na Natalie Munyampenda, Umuyobozi ushinzwe Ibijyanye n’Itumanaho muri AIMS akaba anayobora Ihuriro Next Einstein Forum (NEF).

Muri iki kiganiro, Perezida Kagame yari yicaranye na Perezida Félix Tshisekedi ndetse n’abayobozi batandukanye.

Nyuma y’ibi biganiro, haje kugaragara aba bakuru b’ibihugu babiri umwe afashe undi mu kiganza, bigaragara ko bishimiye kimwe mu biganiro byarimo gutangwa.

Iyi foto imaze kujya hanze, bamwe bagiye bayitangaho ibitekerezo bitandukanye, biza no gusohoka mu kinyamakuru RFI cy’Abafaransa bamwe bayinenga.

Uwitwa Seth Kikuni usanzwe urwanya guverinoma ya Congo, abinyujije kuri twitter, yavuze ko ngo ababajwe no kuba Perezida Tshisekedi yaragiranye ubufatanye na Perezida Paul Kagame, mu magambo ye akagaragaza ko hari ibyaha bimwe u Rwanda rwagizemo uruhare muri iki gihugu, harimo ibibazo bikomeje kwibasira u Burasirazuba bwacyo.

Gusa aya magambo yamaganwe n’umuvugizi wa Congo, Jolino Makelele, wagize ati “Ntabwo tugomba kubona ubu bumwe bwabaye hagati y’abakuru b’ibihugu babiri nk’ikintu cyo kugambanira Abanye-Congo b’inzirakarengane, ni igikorwa cya dipolomasi kandi nziza, ubu dushyize hamwe, nta na kimwe kitwemerera kujya mu ntambara.”

Umuyobozi mukuru mu ishyaka rya Perezida, Felix Tshisekedi, we yagize ati “Icyo azakora ni ugukomeza ubutegetsi, ntabwo ari Felix Tshisekedi wafunguye ambasade y’iki gihugu i Kigali mu Rwanda.”

Uwafashe iyi foto, Nkurunziza Faustin, mu kiganiro yahaye IGIHE, yavuze ko yatunguwe n’abantu batangiye kuyinenga.

Yagize ati “Urumva bo ni ugutekereza mu buryo bubi, nta hantu bihuriye urebye ukuntu iyi foto iteye, hari umuntu warimo kuvuga ijambo arabasetsa, abasekeje baherako baraseka banafatana no mu kiganza, iyo ugiye kureba n’izindi uzabona aho ari kumwe na Madamu we bari begeranye kandi bose barasekaga, njye ni uko nayifashe ariko nyishyira yonyine.”

“Icyo kuvuga ngo barebaga mu cyerekezo kitari kimwe, ibyo biterwa n’umwanya nari mpagazemo, n’ubundi urabona ko barebaga imbere ariko njye nabafotoye nturutse ku ruhande, ntabwo nari mpagaze imbere yabo, iyo abantu bifuriza igihugu inabi ntibabura icyo bavuga, ni gute ufata ifoto y’abantu bavuga ukajya kuyisobanuramo ibintu bibi.”

Avuga ko hari izindi foto zo muri Ethiopia, aho Minisitiri w’Intebe w’iki gihugu nabwo yarimo asuhuzanya na Perezida Kagame, izi foto nazo ngo zaramamaye cyane ariko ntabwo banditse amagambo nkayo.

Kuri Nkurunziza, avuga ko bigaragaraga ko ari Abafaransa ubwabo baba bakoze ibi. Ati “Niba Abanye-Congo barabivuze ariko bagomba kumenya ko ari abantu barwanya leta bataba mu gihugu, ni ukuvuga ko umuntu nk’uwo ahora ashaka ibintu bibi gusa.”

Nkurunziza avuga ko hari Abafaransa bigeze kubaza Perezida Tshisekedi niba yiyumvamo kuba ari umukuru w’igihugu, agaragaza ko ibi biteye isoni kuba abantu nk’aba bicara bakabaza umukuru w’igihugu niba koko yiyumvamo uwo mwanya.

Avuga ko abavuze ibi ari ibintu bashakaga gukwirakwiza mu binyamakuru, ariko we yumva nta kibazo bigomba guteza.

Iyi foto yavuzweho byinshi n'abatifuriza ibyiza RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .