Uturere twibasiwe na Coronavirus mu Rwanda mu minsi 10 ishize

Yanditswe na Dufitumukiza Salathiel
Kuya 1 Werurwe 2021 saa 08:46
Yasuwe :
0 0

U Rwanda ni kimwe mu bihugu byagerageje guhangana na COVID-19 imaze kuzengereza Isi mu gihe gisaga umwaka igaragaye, bigashimangirwa n’uko ruheruka gushyirwa ku mwanya wa mbere muri Afurika no ku wa gatandatu ku Isi muri urwo rugamba.

Ni intambwe nziza ariko ntirwabyina intsinzi kuko haracyagaragara ubwandu bushya buri munsi, kandi n’impfu ziracyiyongera.

Intambwe ikomeye yatewe igihugu kigura umuti wa Favipiravir watanze umusaruro ufatika mu gukiza abarwayi, aho abarenga ibihumbi 10 bamaze gukira Coronavirus mu gihe gisaga ukwezi uwo muti utangiye gukoreshwa.

Imibare ya Minisiteri y’Ubuzima igaragaza ko ku wa 21 Mutarama 2021 ubwo umuti watangiraga gukoreshwa, ijanisha ryo gukira ryari kuri 65,5%. Iyo ku wa 27 Gashyantare 2021 irerekana ko ijanisha ryo gukira rigeze kuri 92,5%; bivuze ko abakize bavuye ku 7973 bakaba bageze ku 17307.

Ingamba z’ubwirinzi na zo zakomeje gukazwa mu buryo bunyuranye hashyirwaho na gahunda ya Guma mu Rugo yihariye ku Mujyi wa Kigali wagaragaragamo ubwandu bwinshi, maze ijanisha ry’abandura riva kuri 7,1% ryariho uwo muti utangira gukoreshwa rigera kuri 2,4% uyu munsi.

Ku rundi ruhande ariko haracyasabwa imbaraga kuko ijanisha ry’abahitanwa n’icyorezo ryo ryakomeje kuzamuka, riva kuri 1,3% ku wa 21 Mutarama, rigera kuri 1,4% ku wa 27 Gashyantare. Imibare yerekana ko impfu za COVID-19 zavuye ku 162 zigera kuri 261.

Imyanzuro y’inama y’Abaminisitiri yateranye ku wa 18 Mutarama uyu mwaka, yategetse ko ibikorwa byo mu Mujyi wa Kigali wari wugarijwe cyane bifungwa hagasigara ibitanga serivisi z’ingenzi cyane.

Iyo Guma mu Rugo yamaze ibyumweru bitatu, umusaruro wayo urigaragaza kuko mbere y’uko ishyirwaho no mu minsi yayo ya mbere i Kigali habonekega ubwandu buri hejuru ya 100, ariko mu minsi 10 ishize ni inshuro ebyiri habonetse ubwandu buri hejuru ya 50.

Imibare y’ubwandu buri hejuru yasubiye mu turere

Hashize igihe kitari kinini ariko bamwe bashobora kuba batacyibuka ukuntu imwe mu mirenge y’Akarere ka Rusizi yamaze igihe kinini iri mu kato, mu gihe Guma mu Rugo y’Igihugu cyose yamaze amezi arenga abiri yari irangiye.

Inama y’Abaminisitiri yo ku wa 15 Nyakanga 2020, ni yo yakuye mu kato imirenge ya Kamembe, Nyakarenzo, Mururu n’igice cya Gihundwe kigize Umujyi wa Kamembe mu Karere ka Rusizi, yari yaragashyizwemo ku wa 4 Kamena 2020, n’uwa Nkombo wagashyizwemo ku wa 12 Kamena.

Bamwe mu batuye i Rusizi bamaze hafi amezi ane batarenga imbibi z’ako karere, kubera ubwandu bwahabonekaga cyane, ibintu ahanini byashingiraga ku bakorera ubucuruzi mu bihugu by’abaturanyi.

Impamvu zagarutsweho kenshi zituma ubwandu mu turere buzamuka zirimo kurenga ku mabwiriza, imyumvire ya bamwe bakerensa ubukana bw’icyorezo n’abitwaza imyemerere yabo bakanga kubahiriza iby’inzego z’ubuzima.

Abanya-Rusizi bemeye kubahiriza amabwiriza y’inzego z’ubuzima maze ubukana bw’icyorezo muri ako gace buracogora, basubukura kugenderanirana n’utundi turere.

Mu ntangiriro za 2021, Umujyi wa Kigali ni wo wagaragayemo ubwandu bwinshi. Wafatiwe ingamba zikaze kugeza imibare y’ubwandu bushya igabanyutse ikava hejuru ya 100 ikagera munsi ya 50.

Nyuma y’Umujyi wa Kigali, abatuye mu turere ni bo basigaye bagaragaza impungenge zo gushyirwa mu kato k’umwihariko kubera ubwandu burimo kuhiyongera.

Hashingiwe ku mibare yatanzwe na Minisiteri y’Ubuzima mu minsi icumi ishize (17-27 Gashyantare 2021), Umujyi wa Kigali ni wo umaze kugaragaramo ubwandu bwinshi, bugera kuri 362. Icyakora kuko ari imibare y’uturere dutatu ibumbiye hamwe ndetse hakaba hari abantu benshi bahora banakora urujya n’uruza kurusha mu ntara, iyo mibare ntiwavuga ko iri hejururu cyane.

Ikindi kandi ni uko ugereranyije n’iminsi yashize ubwo yashyirwaga muri Guma mu rugo, wabona ko imibare y’ubwandu bushya iri kugabanyuka.

Akarere kaza imbere mu twagaragayemo ubwandu bwinshi mu minsi 10 ishize muri rusange, ni Nyaruguru imaze kubonekamo 89. Aka Nyamagabe kamaze kubonekamo 53, Karongi 52, Ruhango 51, naho aka Huye kabonetsemo 41.

Muhanga yabonetsemo 41, Rubavu 40, Gisagara 39, Kayonza 37, Kirehe 34, Rwamagana 34, Ngororero 33, Rulindo 26, Rusizi 23, Ngoma 21 na Nyanza haboneka 21. Mu karere ka Kamonyi handuye 18, Gatsibo 17, Gicumbi 12, Musanze 8, Nyagatare 7,Nyabihu 5 na Rutsiro 5. Mu minsi 10 ishize kandi i Nyamasheke habonetse 5, Burera 4, Gakenke 4 na Bugesera 4.

Minisiteri y’Ubuzima ikomeje gukangurira Abanyarwanda kwirinda icyorezo bubahiriza amabwiriza ateganywa n’inzego z’ubuzima arimo gukaraba intoki aho ugeze hose, kwambara agapfukamunwa igihe cyose uri mu bandi kandi neza, guhana intera no kwihutira kwisuzumisha igihe ugaragaje ibimenyetso ukeka ko ari ibya Coronavirus.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .