Uturere tw’imijyi mu myanya ya nyuma mu kwishyura mituweli

Yanditswe na Ndahayo Emmanuel
Kuya 5 Nzeri 2020 saa 09:08
Yasuwe :
0 0

Ikigo cy’Igihugu cy’Ubwiteganyirize mu Rwanda, RSSB, cyatangaje ko nyuma y’amezi arengaho gato abiri, umubare w’abanyarwanda bangana na 75.4% bamaze kwishyura ubwisungane mu kwivuza, Mituweli, muri uyu mwaka wa 2020/21.

Umwaka w’Ubwisungane mu kwivuza utangira ku wa 1 Nyakanga ugasozwa ku wa 30 Kamena, bivuze ko aba bishyuye mituweli babikoze muri aya mezi abiri ashize.

Urutonde tw’uturere dutanu tuza ku isonga mu kwishyura neza mituweli rwiganjemo uturere two mu ntara y’Amajyepfo y’u Rwanda, kuko dutatu muri dutanu twa mbere turi muri iyo ntara.

Utwo turere tuza ku isonga ni akarere ka Gisagara ko mu ntara y’Amajyepfo kari ku mwanya wa mbere, kagakurikirwa n’akarere ka Gakenke ko mu ntara y’Amajyaruguru, mu gihe akarere ka Nyaruguru ko mu Majyepfo kaza ku mwanya wa gatatu.

Akarere ka Kirehe k’i Burasirazuba kaza ku mwanya wa kane mu gihe akarere gaheruka muri utu dutanu twa mbere ari aka Nyamagabe na ko gaherereye mu Majyepfo y’u Rwanda.

Ku rundi ruhande, uturere dutanu twa nyuma mu kwishyura mu mituweli twiganje cyane mu mijyi, nyamara ari bo bakabaye bafite ubushobozi bwo kwishyura mituweli vuba.

Muri utwo turere, akarere ka Rutsiro ni ko konyine katabarwa mu turere tw’umujyi.
Nk’ubu akarere gaheruka utundi ni aka Kicukiro, gaherereye mu Mujyi wa Kigali.

Rutsiro ikaza imbere, ku mwanya wa 29 mu gihe akarere ka Gasabo, na ko kari mu Mujyi wa Kigali kaza ku mwanya wa 28, kabanjirijwe na Nyarugenge bihana imbibe mu murwa mukuru w’u Rwanda, kari ku mwanya wa 27 ndetse na Rubavu iza ku mwanya wa 26.

Muri rusange abaturarwanda 75.4% bamaze kwishyura ubwisungane bwabo mu kwivuza.

Ubu bwisungane bwishyurwa hakurikijwe ibyiciro by’ubudehe, aho leta yishyurira abari mu cyiciro cya mbere n’icya kabiri, naho abari mu cya gatatu bakiyishyurira 3 000 Frw mu gihe abari mu cya nyuma biyishyurira 7 000 Frw.

Leta iherutse gukora amavugurura mu mikorere ya mituweli, aho abishyuye mituweli bahita batangira kuyivurizaho bakimara kuyishyura, bitandukanye na mbere, aho abayishyuraga nyuma ya Kamena bategerezaga ukwezi kose nyuma yo kwishyura, ibintu byacaga intege ababonye ubushobozi bwo kwishyura mituweli igihe cyabarenganye.

Ibi kandi byanagiraga ingaruka ku buzima, kuko umuntu yashoboraga kuremba kandi yarishyuye mituweli, akazitirwa gusa n’uko ukwezi kutaruzura.

Gahunda yo kwishyura ubwisungane mu kwivuza yatangiye muri 2003 igamije gufasha abanyarwanda kubona ubuvuzi bwiza kandi buhendutse.

Uko amavuriro yegera abanyarwanda ndetse bakagenda barushaho kuyagana, igiciro rusange cyo kwivuza cyarazamutse, nyamara amafaranga abantu bishyura aguma ku giciro yariho na mbere.

Ibi byatumye serivise z’ubuvuzi zishyurwa n’ikigo cy’igihugu cy’ubwiteganyirize mu Rwanda (RSSB), gifite mu nshingano zacyo gukusanya imisanzu ya mituweli no kwishyura ibitaro kuri serivise byahaye abanyamuryango ba mituweli, zizamura igiciro, bituma hazamo icyuho cya miliyari 20 Frw mu mafaranga RSSB yakira mu bwisungane n’ayo yishyura ibitaro byavuye abanyamuryango ba mituweli.

Ibi byatumye leta itangira gushaka uburyo iki cyuho cyazibwa, kuko RSSB yakoreshaga amafaranga avuye mu misanzu y’izindi serivise itanga kugira ngo izibe cya cyuho cya mituweli, ibintu bitaramba kuko bishobora kugira ingaruka no ku bandi banyamuryango bishyuye imisanzu yabo neza mu zindi serivise zitangwa na RSSB.

Kutagira amafaranga ahagije yo kwishyura ibitaro byatanze serivise za mituweli, byatumye RSSB itinda kwishyura serivise z’ibitaro “mu gihe kigera ku mezi ane cyangwa atanu”, nk’uko byatangajwe na Minisitiri w’Ubuzima, Dr. Ngamije Daniel, wongeweho ko ibi bidindiza serivise z’ibitaro, rimwe na rimwe bigahanirwa amande z’ubukererwe bwo kwishyura amazi n’umuriro.

Leta yiyemeje gushaka uburyo buzakomeza gushyigikira iyi gahunda, burimo kongera amafaranga itangira abari mu cyiciro cya mbere n’icya kabiri, akava ku 2 000 Frw akaba 3 000 Frw.

Hari kandi ko leta izakomeza gutera inkunga ya miliyari 6 Frw iyi gahunda, ndetse ibigo by’itumanaho bikazajya bishyira 3% by’amafaranga byinjije ku mwaka muri iyi gahunda.

Hari kandi gukata 0.5% ku mishahara y’abakozi ba leta n’ab’ibigo byigenga ndetse n’andi mafaranga agomba kuzavanwa mu bindi bikorwa, yose hamwe akazaba miliyari 27 Frw, akazaziba icyuho gisanzweho muri mituweli ndetse anarusheho gutuma iyi serivise inoga kurushaho.

Uturere dutatu tw'umujyi wa Kigali turi muri dutanu twa nyuma mu kwishyura mituweli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .