00:00:00 IGIHE NETWORK KN KINYARWANDA EN ENGLISH FR FRANCAIS

Usta Kaitesi yagaragaje ko bizagera mu 2024 Abanyarwanda 90% bishimira imiyoborere na serivisi

Yanditswe na IGIHE
Kuya 24 Ukuboza 2022 saa 05:53
Yasuwe :

Umuyobozi Mukuru w’Urwego rw’Igihugu rw’Imiyoborere, RGB, Kaitesi Usta, yagaragaje ko bizagera mu mwaka wa 2024, Abanyarwanda 90% bishimira imiyoborere n’imitangire ya serivisi bahabwa n’inzego zitandukanye.

Ibi Usta Kaitesi yabigarutseho ubwo yaganiraga n’inzego z’ubuyobozi mu Mujyi wa Kigali, uturere twawo n’abagize ihuriro ry’abafatanyabikorwa.

Kaitesi yagaragaje ko ikigereranyo cy’umwaka wa 2022 kigaragaza ko abaturage bishimiye imiyoborere na serivisi bahabwa ku kigereranyo cya 76,1%, kandi ko hakiri urugendo kugira ngo mu 2024, iki kigereranyo kibe kigeze kuri 90%.

Yakanguriye ubuyobozi bw’Umujyi wa Kigali kwiga uko bagirana imikoranire inoze n’inzego bigaragara ko zizewe cyane n’abaturage mu rwego rwo kumenya uko zo zibikora no kuba zafasha aho bishoboka mu bitaranoga bikagenda neza.

Muri iyi nama kandi Usta Kaitesi yagaragarije abayobozi mu nzego zitandukanye mu Mujyi wa Kigali uko abaturage b’uyu mujyi bashimishijwe n’ibyo bakorerwa aho muri rusange igipimo kiri kuri 77,8%.

Yashimiye cyane Akarere ka Nyarugenge ku ntambwe yatewe aho mu kigereranyo cya 2021 kari gafite impuzandengo ya 68,1% kuko abaturage bako bari bishimiye Imiyoborere na Servisi bahabwa aho kari ku mwanya wa 28 mu gihugu n’akanyuma mu Mujyi wa Kigali, ariko mu kigereranyo cy’uyu mwaka kakaba gafite impuzandengo ya 78,6% kakaba aka mbere mu Mujyi wa Kigali n’aka gatandatu ku rwego rw’igihugu.

Mu Karere ka Nyarugenge iyo ugereranyije n’umwaka wa 2021 hari ibipimo byazamutse mu buryo birimo serivisi zijyanye n’ubworozi zazamutse kuri 29,7%, Ubuhinzi 27,3%, Ubuzima 16,6%, imikorere y’inzego z’ibanze 15,6%, Ikoranabuhanga11,9%, Uburezi 11,4%, Ubutabera 10%, Isuku 9,9%, Abikorera 9,8%.

Umuyobozi Nshingwabikorwa w’Akarere ka Nyarugenge, Ngabonziza Emmy, yishimiye ko ibikorwa byakozwe n’akarere byatanze umusaruro nk’uko bigaragazwa n’ubushakashatsi bwakozwe, aho yagaragaje bimwe mu byo Akarere kakoze muri uyu mwaka birimo kwegereza serivisi z’ubutaka abaturage, aho abakozi babishinzwe bavuye ku Karere bakajya gukorera mu Mirenge.

Urwego rujyanye n’ituze n’umutekano rwaje ku isonga mu bipimo by’imiyoborere mu Rwanda n’amanota 95.53%, mu gihe imitangire ya serivisi nziza yasubiye inyuma igira amanota 77.69%, mu gihe mu mwaka ushize uru rwego rwari rufite 81.86%.

Kugendera ku mategeko bigira 90.81%, uburenganzira mu bya politiki n’ukwishyira ukizana bifite 87.84%, naho kurwanya ruswa, gukorera mu mucyo no kubazwa inshingano bigira 87.19%."

Izindi nzego eshatu zifite munsi ya 80% zirimo imiyoborere mu bijyanye n’ubukungu ifite 77.85%, imitangire ya serivisi nziza ifite 77.69%, naho kongerera abaturage ubushobozi n’imibereho myiza biza ku mwanya wa nyuma n’amanota 75.81%."

Umuyobozi Mukuru w’Urwego rw’Igihugu rw’Imiyoborere, RGB, Usta Kaitesi yagaragaje ko bizagera mu 2024 Abanyarwanda 90% bimishimira imiyoborere na serivisi bahabwa
Umuyobozi w’Umujyi wa Kigali Wungirije ushinzwe Ubukungu n’Imibereho y’Abaturage, Urujeni Martine na Dr Mpabwanamaguru Merard ushinzwe Imiturire n’Ibikorwaremezo muri uyu mujyi ni bamwe mu bitabiriye iyi nama
Umuyobozi Nshingwabikorwa w’Akarere ka Nyarugenge, Ngabonziza Emmy, yagaragaje ibyabafashije kwimakaza imikorere myiza
Meya w'Umujyi wa Kigali, Rubingisa Pudence, atanga ibitekerezo muri iyi nama
Iyi nama yitabiriwe n'abayobozi b'Umujyi wa Kigali, aba RGB ndetse n'ab'Ingabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .