Ushobora kunyica, ushobora kundasa ariko ntiwampfukamisha-Perezida Kagame

Yanditswe na Ferdinand Maniraguha
Kuya 9 Werurwe 2019 saa 03:27
Yasuwe :
0 0

Perezida Paul Kagame yavuze ko adashobora kwihanganira gusuzugurwa kugeza aho apfukamishwa n’uwasuzuguye, ko aho kubikora yahitamo gupfa.

Yavuze ko ari nayo myumvire yifuza ko abanyarwanda bagira mu kwihesha agaciro no kugahesha igihugu cyabo.

Yabitangaje kuri uyu wa Gatandatu ubwo yatangizaga Umwiherero w’abayobozi ku nshuro ya 16, uri kubera i Gabiro mu kigo cy’imyitozo cya gisirikare mu Karere ka Gatsibo.

Perezida Kagame yavuze ko ibibazo u Rwanda rwanyuzemo bikwiriye kuba bivamo amasomo, ku buryo nta munyarwanda wakabaye ajenjeka ku byo ashinzwe, cyangwa ngo yemere ko asuzugurwa.

Yavuze ko ikibabaje ari uko hari abatibuka aho bavuye, ahubwo amahirwe bahawe bakayapfusha ubusa.

Yagize ati “Hari ikibazo kiturimo tudakemura kandi dukwiriye kuba dukemura. Kubera urugendo twiyemeje buri wese agomba kugiramo uruhare. Ntabwo waba mu buzima utera intambwe ebyiri ujya imbere ngo utere indi usubira inyuma usa n’uhunga aho waganaga.”

Yakomeje agira ati “Njye hari ubwo ntabyumva neza. Twagize ibibazo bihagije twe abanyarwanda. Kudasunikwa n’ibyo ngo ukore uko ushoboye ujye imbere birantangaza. Turacyabifite ariko kujya hariya ukitwara nk’aho ibintu ari ibisanzwe birantangaza.”

“Ibibazo ubusanzwe byakabaye bigusunukira ku gukora uko ushoboye ngo ubivemo. Umuntu utagira icyo abikoraho ni uwataye icyizere, uwamanitse amaboko cyangwa udaha agaciro ubuzima bwe. Ariko se twakwemera kuba abantu bamanitse amaboko, bitakarije icyizere.”

Perezida Kagame yavuze ko ibibazo abanyarwanda banyuzemo bidakwiriye gutuma batuza ngo bumve ko bageze iyo bajya, kuko ibyo ari byo bamwe bahera babasuzugura.

Yavuze ko ibibazo we yanyuzemo, byamuhaye isomo ryo kudakangwa n’ibibonetse byose birimo no gupfukamira umuntu waje amusuzugura amwereka ko ntacyo ashoboye.

Kagame yavuze ko yahitamo kwicwa aho gupfukamira ushaka kumusuzugura.

Ati “Amwe mu masomo nize nuko ntafite ububasha ku byo umuntu antekerezaho n’ibyo ategura kungirira ariko hari icyo mfiteho ububasha, ni ibibera hano mu gihugu cyanjye. Ushobora kunyica, ukandasa ibyo birashoboka ariko hari ikintu kidashoboka kandi nibyo nifuza ko bitanaba ku gihugu cyacu.”

Yongeyeho ati “ Nta n’umwe wampfukamisha kuko gupfukama biva ku mahitamo yawe. Sinifuza ko igihugu cyacu cyapfukamira uwo ari we wese. Bagabo namwe bagore b’igihugu cyanjye ntimuzemere ibyo. Ntidukwiriye ibyo.”

Yavuze ko abanyarwanda bakwiriye kugira amahitamo yabo ajyanye n’ibyo biyemeje, aho gutegereza ko ibyo bifuza bizava ahandi.

Yashimangiye ko umwiherero ari umwanya mwiza wo kwicara abayobozi bagatekereza ku nshingano bafite, bakarebera hamwe ibyo bagezeho n’ibitaragezweho, kandi aho bitagezweho bagaharanira ko icyabiteye kitazongera mu gihe bahawe ibishoboka byose ngo bikemuke.

Umwiherero w’abayobozi uri kubera i Gabiro uhurije hamwe abayobozi bagera kuri 350 bo mu nzego zose zaba iza Leta, iz’abikorera na sosiyete sivile.

Perezida Kagame avuga ko abanyarwanda bagomba kurangwa n'indangagaciro yo kudapfukamira abashaka kubasuzugura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza