Takako yahuye na Minisitiri w’Ububanyi n’Amahanga w’u Rwanda, Dr Vincent Biruta ndetse na Minisitiri w’Ikoranabuhanga na Inovasiyo, Paula Ingabire, baganira ku ngingo zitandukanye zijyanye n’umubano w’ibihugu byombi.

U Rwanda n’u Buyapani bisanzwe bifitanye imikoranire igamije iterambere ry’ubukungu ndetse bifatanya mu ngeri zirimo ubuhinzi, ibikorwaremezo, ikoranabuhanga n’ibijyanye n’isanzure.

Kimwe mu biri mu rugendo rwa Takako, ni ugushimangira umubano w’ibihugu byombi mbere y’Inama ya Munani yiswe iya “Tokyo” yiga ku Iterambere rya Afurika (TICAD) izabera muri Tunisia muri Kanama uyu mwaka.

TICAD ni inama mpuzamahanga yigirwamo ibibazo bibangamiye iterambere ry’Umugabane wa Afurika. Yitsa ku ngingo eshatu z’ingenzi harimo kugera ku ntego z’iterambere binyuze mu kugabanya ubusumbane mu bukungu, kubaka sosiyete iciye ukubiri n’ibibazo by’imibereho mibi n’ibindi.

Mu ruzinduko rwe mu Rwanda, Tatako yasuye Urwibutso rwa Jenoside rwa Kigali ruri ku Gisozi, yunamira inzirakarengane zazize Jenoside yakorewe Abatutsi.

Byitezwe ko azagirana ibiganiro n’Abanyarwanda bize mu Buyapani hamwe na ba rwiyemezamirimo b’Abayapani bari mu Rwanda

Umubano w’u Rwanda n’u Buyapani watangiye mu myaka 60 ishize guhera mu 1962.

Takako Suzuki yakiriwe na Minisitiri w'Ububanyi n'Amahanga, Dr Vincent Biruta

Bahanye impano mu gushimangira umubano mwiza uri hagati y'ibihugu byombi

Takako Suzuki yasuye Urwibutso rwa Jenoside rwa Kigali ku Gisozi, yunamira inzirakarengane ziruruhukiyemo

Yeretswe ubukana bw'amateka mabi yagejeje u Rwanda kuri Jenoside yakorewe Abatutsi

Takako Suzuki yagiranye ibiganiro na Minisitiri w'Ikoranabuhanga na Inovasiyo, Ingabire Paula