00:00:00 IGIHE NETWORK KN KINYARWANDA EN ENGLISH FR FRANCAIS

Urwego rw’Umuvunyi rwiyemeje gukurikirana ahakivugwa ruswa ishingiye ku gitsina

Yanditswe na Ntabareshya Jean de Dieu
Kuya 31 Ukwakira 2022 saa 07:39
Yasuwe :

Umuvunyi Mukuru Nirere Madeleine yavuze ko uru rwego ruzakomeza gukurikirana ibijyanye na ruswa ishingiye ku gitsina ikivugwa mu nzego zitandukanye by’umwihariko ku bakozi bashyirwa mu myanya.

Yabigarutseho kuwa Kabiri tariki ya 26 Ukwakira 2022 ubwo yagezaga ku Nteko ishinga amategeko imitwe yombi ibikorwa byakozwe n’urwego ayoboye mu mwaka ushize.

Ubwo yabazwaga ikiri gukorwa mu gutahura ruswa ishingiye ku gitsina ivugwa mu bigo bitandukanye no muri serivisi zinyuranye n’uburyo uru rwego ruyitahura yasobanuye ko hari byinshi biri gukorwa kugira ngo iyi ruswa irandurwe.

Nirere Madeleine yavuze ko nubwo hari ibigo bikivugwamo ruswa hari gukorwa ibishoboka byose kugira ngo icike binyuze mu gukurikirana no guhana abagaragaweho n’uyu muco mubi.

Yakomeje agira ati “Hagaragaye ko hari ruswa ishingiye ku gitsina n’izindi kubikurikirana ni uko ababigizemo uruhare bagomba guhanwa.”

Yavuze ko abenshi bakwa ruswa ishingiye ku gitsina biganje mu binjira n’abasaba akazi bafatiranwa n’ubukene gusa ngo abo bimenyekanye bakurikiranwa kandi bakabiryozwa.

Ati “Abo bahohotera abaka akazi akaba yamufatirana n’ubukene hari abatangiye gukurikiranwa ariko ku bijyanye n’imitangire y’akazi hari aho usanga nta mabwiriza ahari agenga abakozi, uburyo bukoreshwa mu gutanga akazi ugasanga ariho hari icyuho.”

Nirere yavuze ko hashyizwemo ingufu mu gukurikirana ibyaha bya ruswa by’umwihariko ishingiye ku gitsina ariko anashima intambwe imaze guterwa yo gutinyuka kuvuga no kuyigaragaza.

Yavuze ko kuri ubu hari gahunda yo gusabira ibihano abagaragaweho na ruswa ku rwego rukuriye urwayigaragaweho kandi bagakurikiranwa mu rugamba rwo kuyihashya.

Ubushakashatsi bushya bwa Transparence International Rwanda ku miterere ya ruswa ishingiye ku gitsina mu kazi, buherutse gushyira abikorera ku mwanya wa mbere nk’ahantu harangwa ruswa ishingiye ku gitsina aho iri ku kigero cya 57,20%.

Mu bantu 1200 babajijwe na TI Rwanda barimo abo mu rwego rw’abikorera 629 mu gihe abo mu nzego za leta ari 405. Bwagaragaje ko 79,7% bazi cyangwa bumvise ruswa ishingiye ku gitsina mu kazi mu mezi 12 ashize.

Abarenga 75% bavuze ko abagore ari bo bafite ibyago cyane byo gusabwa ruswa y’igitsina nubwo 39,3% by’abasabwa ruswa bahitamo guceceka ntibavuge iby’ayo mahano bakorewe.

Nirere yavuze ko nubwo hakigaragara ruswa n’akarengane mu nzego zirimo n’iz’ubutabera bibabaje ariko hari uburyo bwagiye bushyirwaho bwo kurenganurwa ku bahuye n’akarerangane.

Umuvunyi Mukuru Nirere Madeleine yavuze ko uru rwego ruzakomeza gukurikirana ibijyanye na ruswa ishingiye ku gitsina ikivugwa mu nzego zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .