Urw’Ikirenga rwatesheje agaciro ubusabe bwo guhindura ibihano ku mugore wishe umwana we atabishaka

Yanditswe na Uwimana Abraham
Kuya 28 Ugushyingo 2020 saa 10:52
Yasuwe :
0 0

Urukiko rw’Ikirenga rwatesheje agaciro ubusabe bw’abavoka bakorera muri Certa Law Firm i Kigali, bari basabye impinduka ku ngingo ya 108 mu mategeko ahana, iteganya igifungo cy’imyaka hagati y’itanu n’irindwi y’igifungo ku mugore wishe umwana we atabigambiriye nyuma yo kubyara bitewe n’ibibazo byo mu mutwe bikurikira kwibaruka.

Ubu busabe bwatanzwe mu kwezi gushize aho abavoka bavugaga ko iyi ngingo ifite ibyuho bibiri, icya mbere ni uko irimo iteshagaciro kuko ivugwamo abagore gusa, mu gihe n’abagabo bashobora kuba bakora icyo cyaha.

Kabasinga Florida wabutangije yavuze ko ibi byerekana ko umugabo waramuka akoze icyaha nk’icyo yafatwa bitandukanye hakaba harimo ubusumbane, kuko biramutse bibaye we yahanirwa kwica atabigambiriye, bigatuma ahanishwa igifungo cy’amezi atandatu gusa.

Umwe mu bavoka babarizwa muri Celta Law Firm Rwagitare Fiston yabwiye The New Times ko uretse kuba iyi ngingo inyuranya n’iya 15 n’iya 16 yo mu Itegeko Nshinga ribuza ivangura iryo ari ryo ryose, ngo inanyuranyije n’amasezerano ya Maputo yo mu 2003 asaba ibihugu byose guhindura amategeko yose arimo ivangura.

Ati “Harimo ivangura, ntibyumvikana ukuntu umugabo ukoze icyaha cyo kwica atabigambiriye ahanishwa igifungo cy’amezi atandatu, mu gihe umugore ukoze icyo cyaha we ahanishwa kugeza ku gifungo cy’imyaka irindwi.”

Ikindi kintu Celta Law igaragaza nk’ikibazo mu ngingo ya 108, ni uko itegeko ubwaryo rigaragaza ko umugore ukora icyo cyaha aba atameze neza mu mutwe nyuma akimara kubyara, hanyuma rikagena ko bahanwa nk’aho bagikoze babigambiriye.

Rwagitare ati “Iyo uvuze ngo umuntu ukoze icyo gikorwa ntaba ameze neza mu mutwe, ni ikimenyetso ko ubwenge bwe butakoraga neza mu gihe yakoraga icyo cyaha, rero ntabwo wamwita umunyabyaha ngo umuhane.”

Abacamanza bane batanze umwanzuro kuri ubu busabe ntibemeranyijwe n’abatanze ubu busabe. Bavuze ko n’ubwo ibibazo byo mu mutwe ari ibisanzwe bikunda kugaragara mu bagore bamaze kwibaruka, hari ubundi burwayi butakoreshwa nk’urwitwazo.

Bagize bati “Impuguke mu by’ubuzima bwo mu mutwe bemera ko ibibazo byo mu mutwe ari ibisanzwe ku bagore bakibyara, ariko hari itandukaniro hagati y’umugore ufite ibibazo byo mu mutwe bisanzwe bikurikira kubyara, ndetse n’ufite ihungabana rituruka ku kubyara; uwa nyuma ntabwo aba azi ibikorwa bye, mu gihe uwa mbere aba ashobora gutandukanya icyiza n’ikibi.”

Abacamanza kandi bavuze ko mu gihe uwishe umwana we igihe yari afite ibyo bibazo byo mu mutwe agejejwe imbere y’ubutabera, ubucamanza bufata umwanzuro ariko ibyo nabyo bubirebaho mbere yo kumukatira.

Basabye ko amagambo yakoreshejwe mu ngingo ya 108 asobanurwa neza kugira ngo bitazongera gutuma isobanurwa nabi.

Banavuze ko gucira urubanza abica abana babo bivuye kuri iryo hungabana atari umwihariko w’u Rwanda ahubwo ko bibaho no ku bindi bihugu nka Canada n’u Bwongereza.

Umuganga uvura indwara zo mu mutwe, Ruhigisha Gihana, yavuze ko bidasanzwe ko abagore bahura n’impinduka mu byiyumviro byabo nyuma yo kubyara, gusa ubushakashatsi bugaragaza ko baba bashobora guhura n’ibibazo byo mu mutwe cyane nyuma yo kubyara kuruta ibindi bihe byose.

Yavuze ko hari itandukaniro koko hagati y’ibibazo byo mu mutwe umugore agira akimara kubyara n’ihungabana agira nyuma yo kubyara; avuga ko ihungabana rituma umuntu atakaza icyanga cy’ubuzima, akitakariza icyizere, akagira umubabaro, akibagirwa cyane, n’ibindi ku buryo bishobora gutuma yaniyahura.

Mu gihe ibibazo byo mu mutwe umugore agira akimara kubyara, ari ibyiyumviro bidasanzwe byo guhangayika n’ubwoba, akumva umwana ntatekanye, akabona ibintu bidahari, akumva adatuje, akigiramo ubugome, bishobora no gutuma agirira nabi umwana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .