Urw’Ikirenga rwakoresheje ibizamini bya ADN rwemeza ko uwashakaga kuzungura se wazize Jenoside abyemerewe

Yanditswe na Habimana James
Kuya 22 Ugushyingo 2019 saa 09:33
Yasuwe :
0 0

Urukiko rw’Ikirenga rugendeye ku bizamini bya ADN byakozwe na Laboratwari y’u Rwanda y’ibimenyetso bishingiye ku bumenyi n’ubuhanga rwanzuye ko Tuyishimire Yves waburanaga na Aksante Job kwikubira imitungo ya se bazize Jenoside yakorewe Abatutsi mu 1994, ari umwana w’uwo muryango ndetse akaba yemerewe kubonamo umugabane.

Uru rubanza rwari rumaze imyaka isaga itanu rwatangiye Tuyishimire wagizwe impfubyi na Jenoside yakorewe Abatutsi yahitanye se witwaga Gusenga Innocent, Nyirasenge Nyirabarera Jacqueline n’abandi bo mu muryango we, arega uwitwa Aksante ko yikubiye imitungo yabo.

Aksante we yaburanaga avuga ko Tuyishimire atari umwana wo mu muryango wa Gusenga Innocent na Nyirabarera Jacqueline [Aksante] avuga ko ari abavandimwe be naho Tuyishimire akavuga ko Gusenga ariwe se naho Nyirabarera akaba nyirasenge.

Mu maburanisha yabanje Tuyishimire yakomeje kugenda atsinda ariko Aksante akomeza gutsimbarara kugeza mu Rukiko rw’Ikirenga aho yasabye ko hakorwa ibizamini bya ADN kugira ngo hemezwe isano iri hagati yabo.

Bitegetswe n’Urukiko rw’Ikirenga hemejwe ko hapimwa ADN y’imibiri ya Gusenga na Nyirabarera ishyinguye mu Rwibutso rwa Jenoside ku Gisozi bigahuzwa na ADN za Tuyishimire na Aksante.

Prof Rugege yasabye umucamanza wakurikiranye urwo rubanza gusoma raporo y’ibizamini bya ADN.

Iyi raporo y’isuzuma ryakozwe igaragaza ko Gusenga ashobora kuba ari Se wa Tuyishimire ku gipimo kirenga 99.99% naho Nyirabarera akaba mushiki wa Gusenga ku kigero kirenga 99.99%.

Ku bijyanye n’isano hagati ya Gusenga na Aksante, iyi raporo yakozwe ku wa 15 Ukwakira 2019, igaragaza ko bashobora kugirana isano ku kigero cya 2.312%, bisobanuye ko amahirwe yo kuba nta sano bafitanye ari hejuru ya 97.56%.

Bigaragaza ko Nyirabarera afitanye isano na Tuyishimire ku kigero kirenga 99.99% mu gihe isano hagati ya Aksante na Tuyishime iri munsi ya 2.31%.

Uwunganira uregwa [Aksante] yavuze ko iyo raporo nta buziranenge we n’umukiliya we bayiha kubera kuba ivuguruzanya, kuba idafite inyandiko isobanura imvugo za gihanga ziyirimo ku buryo buri wese yayumva kandi ikaba nta nyandiko y’umuyobozi mukuru wa RFL iyiherekeza.

Yavuze ko raporo bahawe mbere y’umunsi umwe w’iburanishwa hari amakuru amwe itagaragazaga kubera ikoranabuhanga basobanuriwe ko ritari rihari bikaba bitumwika ukuntu iyasomwe uyu munsi amakuru yose iyatanga.

Uyu munyamategeko yavuze ko uwo yunganira afite impungenge ku buziranenge bw’iyo raporo ishobora kuba yarakozwe hashingiwe ku bushake bw’uwo baburana.

Yavuze ko bashingiye kuri izo mpamvu yagaragaje, ‘Ibyatanga umucyo n’ubutabera ari uko yakoherezwa mu mahanga mu bigo bifite ubushobozi buhambaye bwo gushakisha isano iri hagati y’umuntu n’undi kandi igakorwa n’abanyamahanga.’

Abunganira Tuyishimre bavuze ko ibyo nta shingiro bifite kuko raporo yakozwe mu buryo bwemewe n’amategeko kandi igakorwa n’ikigo cyemewe kandi kibifitiye ubushobozi. Bavuze kandi ko nta tegeko riteganya ko iyo raporo yagombaga guherekezwa n’inyandiko y’umuyobozi mukuru wa RFL.

Prof Rugege yabajije uwunganira Aksante, itegeko risobanura ko ‘Raporo ya gihanga yagombaga kuza iherekejwe n’inyandiko y’Umuyobozi mukuru w’ikigo cyayikoze [RFL], asubiza ko ingingo atayifite ariko yahabwa umwanya wo kuza kuyishaka.

Yavuze kandi ko bidashimishije kuba umunyamategeko wunganira Aksante anenga abahanga bashyizweho gukora ibyo bizamini ko bashobora kuba barakoze ibyo bategetswe na Tuyishimire.

Kuri uyu wa Gatanu, tariki ya 22 Ugushyingo 2019, Tuyishimire Yves n’umwunganira mu mategeko nibo bagaragaye imbere y’abacamanza ngo bumve umwanzuro ufatwa.

Nyuma yo gusobanurirwa uko urubanza rwagiye rugenda kuva mu mizi, Cyanzayire Aloysie, Umucamanza mu Rukiko rw’Ikirenga ari nawe wari uyoboye Inteko Iburanisha, yavuze ko nyuma y’isuzuma ryakozwe n’abahanga bakoze ADN, rwanzuye ko Tuyishimire Yves afite uburenganzira ku mutungo se yasize.

Ibizamini bya ADN ngo byemeje ko Tuyishimire Yves afite isano na se iri ku kigero cya 99.99%.

Mu kugaragaza ibyishimo, Tuyishimire Yves, yagize ati “Ndashima Imana kandi nkashimira ubutabera, ndashimira umuryango wa mama umbyara kuko wambaye hafi, ndasaba n’abandi bana bafite ibibazo nk’ibyanjye gukomera kigabo.”

Yashimiye kandi ikigo cyapimye ibizamini bya ADN kuko wari umukoro utoroshye.

Urukiko rw’Ikirenga kandi rwategetse ko Tuyishimire ahabwa miliyoni 2.2 Frw nk’indishyi zo gusiragizwa mu nkiko.

-  Inkuru bifitanye isano: Ibizamini bya ADN byateye impaka mu rubanza rw’ushaka kuzungura uwazize Jenoside

Tuyishimire Yves (hagati) yatsinze urubanza yaburanaga mu Rukiko rw'Ikirenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza