00:00:00 IGIHE NETWORK KN KINYARWANDA EN ENGLISH FR FRANCAIS

Urukundo no kwirinda ivangura: Amasomo Jenoside yakorewe abatutsi yasigiye Abatuye ku Idjwi

Yanditswe na Nsanzimana Erneste
Kuya 9 April 2022 saa 10:12
Yasuwe :

Idjwi/Ijwi ni ikirwa kinini giherereye rwagati mu Kiyaga cya Kivu, gifite uburebure bw’ibilometero 70 n’ubuso bw’ibilometero kare 340. Gituwe n’abaturage barenga ibihumbi 250 barimo abumva bakavuga neza ururimi rw’Ikinyarwanda.

Ni ikirwa kibarizwa mu Ntara ya Kivu y’Amajyepfo muri Repubulika ya Demokarasi ya Congo. Abatuye ku Idjwi biganjemo Abanye-Congo barema amasoko nyambukiranyamipaka ahuza u Rwanda na Congom by’umwihariko isoko nyambukiranyamipaka rya Karongi, ari naho IGIHE yabasanze bakaganira. Bavuga ko Jenoside yakorewe Abatutsi yabagizeho ingaruka ikanabasigira amasomo.

Mu 1994, Repubulika ya Demokarasi ya Congo ni kimwe mu bihugu byo mu karere byakiriye impunzi nyinshi z’Abanyarwanda. Abo ku Idjwi bavuga ko byari ibihe bibabaje kuri bo kubona abaturanyi babo (Abanyarwanda) bari kunyura mu bihe bigoye.

Aman Rubega Christophe urangura amatungo magufi ku isoko nyambukiranyamipaka rya Karongi akajya kuyacuruza iwabo muri Congo, yibuka neza uko byagenze mu gihe cya Jenoside yakorewe Abatutsi.

Avuga ko benewabo (Abanyarwanda) bamwe bahunze bava mu Rwanda bajya Congo barabakira, abandi bajya mu bindi bihugu, amahoro agarutse barataha.

Ati "Nyuma ya Jenoside yakorewe Abatutsi, mu Rwanda habaye kwiyunga, ntihakiba ibyo gucagura ngo uyu ni umuhutu uyu ni umututsi bose babaye umuntu umwe, ni Umunyarwanda. Ni ikintu kidushimisha twese, ariko nibura turasaba Imana iduhe icyizere, abandi bantu baravutse, bazafata imyanya y’abo bandi bitabye Imana".

Yakomeje agira ati "Amasomo Jenoside yadusigiye, ni ukwirinda ivangura kugira ngo natwe iwacu Jenoside itazahaba. Natwe iwacu byajyaga bihaba ahantu hitwa Katanga, abantu ba Katanga ntibemere ko abandi baza kuhatura, ariko nyuma yo kubona ibyabaye mu Rwanda byarashize, ubu umuntu aba i Bukavu agatembera Katanga, Umushi agatemberayo nta kibazo".

Ritha, ni umugore w’imyaka 50 ukora ubucuruzi bwambukiranya imipaka, yavuze ko byari ibihe bigoye muri Jenoside yakorewe Abatutsi, aho bishwe hakoreshejwe imihoro n’izindi ntwaro.

Ati "Ubu amahoro yaragarutse mu Rwanda turaza tukagura ibicuruzwa, ntawe utunyanganya, binabayeho twakwiyambaza abashinzwe umutekano. Ntidukeneye ko ibyabaye hano byazaba muri Congo".

Bosco Bokele avuga ko nabo Jenoside yabagizeho ingaruka, kuko hari inshuti bari bafite mu Rwanda zishwe. Yifashishije umugani uvuga ko ’umutungo w’umuntu mubi ari umujinya’ yagaye abakoze Jenoside yakorewe Abatutsi, asaba abatuye Isi guharanira iterambere.

Ati "Umuntu udafite iterambere niwe muntu utekereza nabi. Iyo utunze umujinya uba uri umuntu mubi niko twebwe Abakongomani tuvuga. Twifuza umubano n’umutekano, abakoze biriya bintu bazarebe imbere ibyo bakoze ntabwo ari byiza. Ivangura ry’amoko ryarashize muri Congo ntabwo rikibamo".

Benitha Nabusani, utuye teritwari y’Idjwi ry’Amajyaruguru yavuze ko Jenoside yakorewe Abatutsi mu Rwanda yabasigiye kumva ko bakwiye gukundana.

Ati "Yadusigiye isomo ry’urukundo, twese tugize umuryango umwe, nta kuvuga ngo uyu ni uwo ku Ijwi, uyu ni umunyarwanda, uyu akomoka mu bwoko ubu n’ubu, twese dufite umubyeyi umwe, dukomoka mu muryango umwe".

Kuwa 7 Mata nibwo abanyarwanda n’inshuti zabo batangiye icyumweru cy’icyunamo n’iminsi 100 yo kwibuka Jenoside yakorewe Abatutsi mu 1994.

Benitha Nabusani, umugore ukomoka ku Idjwi avuga ko Jenoside yakorewe abatutsi yabasigiye isomo ryo gukundana
Ritha yishimira ko nyuma ya Jenoside yakorewe Abatutsi amahoro yagarutse mu Rwanda
Aman Rubega Christophe avuga ko Jenoside yakorewe Abatutsi mu Rwanda yabasigiye isomo ryo kwirinda ivangura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .