Urukiko rwemeje ko Rwamuganza, Rwakunda n’abo bareganwa bakomeza gufungwa

Yanditswe na Rabbi Malo Umucunguzi
Kuya 14 Nyakanga 2020 saa 03:14
Yasuwe :
0 0

Urukiko rwisumbuye rwa Gasabo rwategetse ko Rwamuganza Caleb, Christian Rwakunda, Serubibi Éric, Aloys Rusizana n’abandi bareganwa bakomeza gufungwa, nyuma yo gusanga impamvu z’ubujurire bwabo nta shingiro zifite.

Baregwa ibyaha birimo gukoresha nabi umutungo ufitiye rubanda akamaro no gutanga isoko binyuranyije n’amategeko, byahombeje leta asaga miliyari 2 Frw.

Mu mwanzuro rwasomye kuri uyu wa Kabiri, mu bujurire ku ifungwa n’ifungurwa ry’agateganyo, Urukiko rwavuze ko rwasuzumye ubwiregure bwa buri umwe ruhereye kuri Rusizana Aloys, umushoramari wagurishije leta inzu yo shingiro ry’ibyaha abaregwa bakurikiranyweho.

Yahakanye icyaha cyo kuba icyitso mu gukoresha nabi umutungo wa leta. Urukiko rwavuze ko rusanga kuba avuga ko ntawe yagambanye nawe mu gihe cyo kugena ibiciro byagenwe, ibyo byazarebwaho n’umucamanza mu rukiko mu mizi, ubu icyarebwaho ari impamvu zikomeye zituma akekwaho icyo cyaha.

Urukiko rwavuze ko kuba bigaragara ko abantu bumvikanye ku giciro nta piganwa, kandi inama zemerejwemo igiciro cyateje ikibazo akaba yari azirimo, bituma akekwaho uruhare muri ibi byaha.

Rusizana yatanze ingwate ya miliyari 4 Frw, ariko ngo nta cyo yagaragaje ko zimwanditseho cyangwa se ko nta handi yazitanzeho ingwate cyangwa ko atazigurishije, bityo adashobora kurekurwa atanze ingwate.

Kuri Christian Rwakunda wari umunyamabanga Uhoraho muri Mininfra, we yavuze ko ubwo amasezerano yemeranywagaho yari yaravuye mu biganiro, ndetse asaba kurekurwano by’agateganyo ku mpamvu z’uburwayi.

Rwakunda kandi nawe yasabye kurekurwa atanze ingwate y’umutungo ufite agaciro ka miliyoni 100Frw, bityo ingwate ikaba ari nto.

Ikindi ni uko yavuze ko yarekurwa ku mpamvu z’uburwayi, ariko Urukiko rubyanga ruvuga ko aho bafungirwa bashobora kuvurwa.

Kabera Godefroid wari Umuyobozi mukuru muri Minecofin, we yashinjwe ko yari mu nama yo ku wa 18 Gicurasi yemerejwemo igiciro cyagize ibyaha, we akavuga ko bitari bigize icyaha kuko yitabiriye inama y’ubuyobozi bumukuriye.

Urukiko ariko rwavuze ko kuba yari mu nama yaganiriye ku byemezo byafatiwemo ibyemezo bigize icyaha, ari impamvu ituma akekwaho ibyaha.

Kuri Serubibi Eric, Urukiko ruvuga ko kuba yaritabiriye ibiganiro byafatiwemo imyanzuro yagize ibyaha, ari impamvu zikomeye zituma akekwaho ibyaha.

Kuba umugenagaciro wa mbere Gasabo 3D yaremeje ko inzu yagombaga kugurwa yari ifite agaciro ka miliyari 7.5 Frw ariko ikaza kugurishwa ku kindi giciro cya miliyari 9.6 Frw, ari impamvu ikomeye yatuma afungwa by’agateganyo.

Serubibi yatanze ingwate ifite agaciro ka miliyoni 76 Frw ngo arekurwe by’agateganyo, ariko urukiko ruvuga ko atatanze ibyemeza ko zimwanditseho, cyangwa ko atazigurishije.

Kuri Rwamuganza, yabwiye Urukiko ko igenagaciro rya Gasabo 3D ritirenganyijwe ahubwo cyashingiweho, ariko ko bitashobokaga ko inzu igurwa ku giciro cyo kuyubaka, kuko hagombaga kujyaho inyungu y’abagurishije inzu n’amafaranga ya banki kuko bari bagiye kwishyura inguzanyo mbere y’igihe cyatanzwe na banki.

Urukiko ruvuga ko kuba Rwamuganza ariwe wayoboye inama yo ku wa 18 Gicurasi yafatiwemo imyanzuro Ubushinjacyaha bushingiraho burega abaregwa, ari impamvu zikomeye zituma bakekwaho ibyaha baregwa.

Mu gihe Rwamuganza yari yatanze ingwate, Urukiko rwavuze ko nta kigaragaza agaciro kayo ku buryo iyo ngwate yashingirwaho.

Urukiko rwanzuye ko impamvu z’ubujurire nta shingiro zifite, bityo icyemezo cy’urukiko rw’ibanze rwa Gasabo kigumyeho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .