Urukiko rwateye utwatsi ubujurire bwa Dr Joseph Nkusi wakatiwe gufungwa imyaka 10

Yanditswe na Habimana James
Kuya 23 Nzeri 2019 saa 03:36
Yasuwe :
0 0

Urukiko rw’Ubujurire rwanze kwakira ubujurire bwa Dr Joseph Nkusi wakatiwe gufungwa imyaka 10 kubera guhamwa n’ibyaha birimo gushishikariza abaturage kwigomeka ku butegetsi, gukwirakwiza ibihuha no guhakana Jenoside yakorewe Abatutsi abinyujije ku rubuga yari yarashinze rwitwa Shikama.

Mu Rukiko Rukuru niho yari yakatiwe gufungwa imyaka 10.

Amakuru agera kuri IGIHE avuga ko tariki 13 Nzeri uyu mwaka, aribwo Urukiko rw’Ubujurire rwanzuye ko ubujurire bw’uyu mugabo budafite ishingiro, bisobanuye ko azakomeza gufungwa imyaka 10.

Ntiturashobora kubona amakuru arambuye ku mpamvu nyamukuru zatumye ubu bujurire butakirwa, kuko abacamanza bari mu mahugurwa.

Kuwa 29 Werurwe 2019 nibwo Urukiko Rukuru rwakatiye igihano cy’imyaka 10 y’igifungo Dr Joseph Nkusi, wazanwe mu Rwanda akuwe muri Norvège mu 2016.

Dr Nkusi yari akurikiranweho ibyaha bikomeye birimo gushishikariza abaturage kwigomeka ku butegetsi, gukwirakwiza ibihuha no guhakana Jenoside yakorewe Abatutsi abinyujije ku rubuga yari yarashinze rwitwa Shikama.

Icyo gihe Urukiko rwari rwamuhamije ibyaha bibiri ari byo gushishikariza abandi kwigomeka ku butegetsi no gukwirakwiza ibihuha, gusa rumuhanaguraho icyaha cyo guhakana jenoside yakorewe Abatutsi.

Mu bandi bategereje kumva imyanzuro y’Urukiko rw’Ubujurire ni Agnès Ntamabyariro, uyu yari Minisitiri w’Ubutabera ku ngoma yiyise iy’Abatabazi mu 1994.

Yari yajuririye Urukiko rw’Ubujurire asaba ko rwamugabanyiriza igihano cy’igifungo cya burundu yakatiwe n’Urukiko Rukuru mu 2015.

Tariki 18 Ukwakira uyu mwaka nibwo uyu mugore azamenya imyanzuro y’urukiko kuri ubu bujurire bwe.

Ntamabyariro yafashwe ku wa 27 Gicurasi 1997. Dosiye ye yaregewe Urukiko rwisumbuye rwa Nyarugenge mu Ugushyingo 2001, atangira kuburanishwa mu 2007.

Yahamijwe ibyaha bya Jenoside birimo gushishikariza Abahutu kwica Abatutsi, gukora urutonde rw’abagombaga kwicwa no kuba ashobora kuba yaratanze intwaro zifashishijwe mu kwica Abatutsi.

Ku wa 19 Mutarama 2009, Urukiko rwisumbuye rwa Nyarugenge, rwamukatiye igifungo cya burundu aza kujuririra iki cyemezo mu Rukiko Rukuru.

Urukiko Rukuru rwatangiye kumuburanyisha mu Ukuboza 2012, narwo ruza kongera kumukatira gufungwa burundu, mu cyemezo cyasomwe ku wa 27 Gashyantare 2015.

Ku wa 28 Werurwe 2019 nibwo Ntamabyariro na Me Gatera Gashabana umwunganira bagaragaye mu rukiko rw’Ubujurire, batakamba ko rwagabanya ibihano, bashingiye ku mpamvu bavuga ko zirengagijwe.

Urukiko rwasuzumye impamvu zatanzwe na Ntamabyariro n’umwunganizi we zirimo ijyanye n’amategeko atarubahirijwe ubwo yafatwaga ndetse n’igihe yamaze afunzwe ataraburana.

Ntamabyariro yabwiye Urukiko ko kuba yarafashwe mu Ukuboza 1997 akaza kugezwa imbere y’urukiko mu 2001, asanga hari amategeko atarubahirijwe bityo urukiko rukwiye kubishingiraho rukamugabanyiriza ibihano.

Kuri izi ngingo ubushinjacyaha bwagaragarije Urukiko ko zaburaniwe mu bujurire bwabereye mu Rukiko Rukuru kandi zamaze gufatirwa imyanzuro.

Bwagaragaje ko yavuze ko yakorewe iyicarubozo, nta bimenyetso ndetse nta n’inyandiko zo kwa muganga zibigaragaza.

Icyo gufatwa agafungirwa ahantu hatazwi, ubushinjacyaha bwavuze ko raporo ya Amnesty International ashingiraho ishobora kuba yarakozwe hashingiwe ku makuru yatanzwe n’abo mu muryango we.

Ubushinjacyaha bwavuze ko busanga umwanzuro wafashwe n’Urukiko Rukuru wari ukwiye.

Indi mpamvu yasuzumwe ni iyo kuba Ntamabyariro yarahakanye icyaha cyo kuba icyitso cy’abakoze Jenoside.

Iki cyaha gishingiye ku mbwirwaruhame yatangiye ku Kibuye, aho Ubushinjacyaha bwavuze ko yari imvugo ijimije igamije kubwira inzego zari zishinzwe umutekano icyo gihe gukora.

Ubushinjacyaha bwasobanuye ko iyi mbwirwaruhame ya Ntamabyariro yarimo gushishikariza abahutu kwica Abatutsi. Ikindi kandi ngo icyo gihe Ntamabyariro ntiyitandukanyije n’abagizi ba nabi.

Uyu mugore ariko yabwiye urukiko ko imvugo ye yarimo gusaba inkiko n’abagenzacyaha gukurikirana abakoraga Jenoside icyo gihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza