Urukiko rwategetse ko Dr Daphrose Gahakwa afungwa iminsi 30 y’agateganyo

Yanditswe na Tuyishimire Raymond
Kuya 20 Ukwakira 2020 saa 04:50
Yasuwe :
0 0

Urukiko rw’Ibanze rwa Gasabo rwategetse ko Dr Gahakwa Daphrose wigeze kuba Minisitiri w’Uburezi n’Umuyobozi Mukuru w’Agateganyo w’Ikigo cy’Igihugu gishinzwe Ubuhinzi, RAB, afungwa iminsi 30 y’agateganyo mu gihe iperereza ku byaha akekwaho byo kunyereza umutungo wa leta no gutanga amasoko ya Leta mu buryo bunyuranije n’amategeko rigikomeje.

Saa kumi z’igicamunsi kuri uyu wa Kabiri tariki ya 20 Ukwakira nibwo umwanzuro ku ifungwa n’ifungurwa ry’agateganyo rya Dr Gahakwa wasomwe. Abaregwa bose ntibagaragaye mu cyumba cy’urukiko.

Umucamanza yavuze ko Dr Gahakwa aramutse arekuwe yatoroka ubutabera ndetse ko gukomeza gufungwa byakorohereza urukiko ku buryo igihe cyose akenerewe yajya aboneka.

Dr Gahakwa yari yasabye kurekurwa kuko afite uburwayi bwa diabète kandi ko iyi dosiye imaze igihe kinini izwi ku buryo muri iyo minsi yose atigeze agerageza kuba yatoroka.

Umucamanza yavuze ko impamvu y’uko arwaye nta shingiro ifite, kuko n’aho agiye gufungirwa muri gereza, hatangirwa ubuvuzi ku buryo nta mpungenge ku buzima bwe.

Yaba Gahakwa n’umwunganizi we, mu iburanisha riheruka, bari babwiye urukiko ko bibaye ngombwa batanga ingwate yaba iy’umuntu cyangwa se amafaranga, gusa ntabwo higeze havugwa ingano yayo.

Umucamanza yavuze ko Dr Gahakwa atigeze avuga ingwate yatangwa ngo nibura ishingirweho arekurwa by’agateganyo.

Ku wa 2 Ukwakira nibwo Ubushinjacyaha Bukuru bwatangaje ko Dr Gahakwa yatawe muri yombi. Nyuma y’iminsi 13 yahise yitaba Urukiko rw’Ibanze rwa Gasabo aho yahakanye ibyaha byose akekwaho.

Ubushinjacyaha bwavuze ko ubwo Dr Gahakwa yari Umuyobozi wungirije muri RAB, yafashe imashini yuhira akayijyana mu ifamu ye iherereye mu Murenge wa Gashora. Mu 2017 nibwo byaje kumenyekana iyo mashini ikurwa mu murima we.

Bwavuze ko hari umukozi wa RAB watanze ubuhamya, akavuga ko imashini yuhira yari mu isambu ya Gahakwa yagiye kuyifata, Gahakwa abimenye ahita amuhamagara amubwira ko adakwiriye kuvogera umutungo we kuko ngo iyo mashini atari iya RAB, ahubwo ari iye bwite.

Ikindi ni uko akekwaho icyaha cyo kuba yarahaye isoko umuntu utabifitiye uburenganzira, aho ku itariki ya 08 Kanama 2016 ubwo Dr Gahakwa wari Umuyobozi Mukuru w’Umusigire wa RAB, yasinye amasezerano y’isoko ryo kuhira. Iryo soko ryahawe umukwe we Dr Edouard Kamugisha.

Iryo soko ngo ryari rifite agaciro ka miliyoni zirenga 800 Frw, ayo masezerano ayasinya mu gihe muri RAB hari ikibazo cy’ingengo y’imari idahagije.

Bwavuze ko bitumvikana ukuntu Gahakwa yavuga ko yatanze isoko atazi ko urihawe ari umukwe we, kuko ngo hejuru ku masezerano haba handitseho amazina y’umuntu urihawe, ndetse ko mu masezerano harimo ko umwe mu bazagenzura ishyirwa mu bikorwa byaryo ari umugabo we witwa Gahakwa Rudakemwa Pierre.

Dr Gahakwa yavuze ko ubwo yabaga Umuyobozi Mukuru w’Umusigire wa RAB, yasanze amasezerano muri dosiye z’uwari Umuyobozi Mukuru, areba ko amategeko yubahirijwe mu itangwa ry’isoko. Ngo we yasinye atitaye ku kujya kureba abanyamigabane, icyo yakoze biba gusinya kugira ngo imirimo ya RAB itadindira.

Ngo iyo aza no kureba akabona ko uwasinye ari Dr Kamugisha Edouard atari kumenya ko ari umukwe we, keretse iyo haba hariho ifoto. Ati “Nta ruhare nabigizemo rwose.” Yavuze kandi ko kuba umugabo we yarahawe akazi muri iryo soko nabyo nta ruhare na ruto yabigizemo.

Ku bijyanye n’imashini yuhira yasanzwe mu murima we, ngo zaguzwe ari imashini enye. Mu murima we ngo yari yarahinzemo imyembe kandi ko itari ikeneye amazi muri icyo gihe ku buryo yajya kuhira.

Iyo mashini ijya kujyanwa muri ako gace, ngo hitabwaga ku kureba uburyo imyaka y’abahinzi yarokorwa hatitawe ku kuvuga ngo ni umurima wa runaka. Kugira ngo ihagere, yashimangiye ko atigeze asaba ko yahajyanwa kuko we yari afite iye yaguze.

Urukiko rwategetse ko Dr Gahakwa Daphrose afungwa iminsi 30 y'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .