Urukiko rwategetse ko CSP Camille Zuba ukekwaho gutonesha murumuna wa Gen Nyamvumba afungwa iminsi 30

Yanditswe na Twarabanye Venuste
Kuya 29 Nyakanga 2020 saa 05:18
Yasuwe :
0 0

Urukiko rwisumbuye rwa Nyarugenge rwemeje ko umuyobozi wa Gereza ya Mageregere, CSP Camille Zuba, ukurikiranywego gufata icyemezo gishingiye ku itonesha, afungwa iminsi 30 y’agateganyo mu gihe iperereza rigikomeje.

Ku wa 23 Nyakanga 2020 nibwo Camille zuba yari yaburanye mu bujurire ku cyemezo cy’urukiko kimufunga iminsi 30 y’agateganyo ku cyaha akurikiranyweho cy’itonesha.

Ni icyaha ubushinjacyaha buvuga ko yakoze ubwo yemereraga abafungwa batandukanye gusurwa barimo Robert Nyamvumba, murumuna wa Gen Patrick Nyamvumba, kandi amabwiriza yo kwirinda COVID-19 atabyemera. Ngo yemereye bamwe abandi arabangira.

Mu bujurire, Camille Zuba n’abunganizi be bari basabye ko yakurikiranwa adafunze bagaragaza impamvu zitandukanye ahanini zagarukaga ku kuba ibyo ashinjwa atari icyaha amategeko asobanura neza ari nabyo byatumye n’ingingo Ubushinjacyaha bwashingiyeho bavuga ko atariyo.

Mu isomwa ry’umwanzuro kuri ubwo bujurire urukiko rwavuze ko impamvu zose Camille Zuba n’abunganizi be batanze nta shingiro zifite, rusobanura ingingo ku yindi maze rwemeza ko impamzu zashingiweho n’urukiko rw’ibanze rwa Nyarugenge zigaragaza impamvu zikomeye zituma akomeza gukurikiranwa afunze.

Urukiko rwahereye ku ngingo ya 8 y’iteteko ryerekeye kurwanya ruswa, abunganizi ba Camille bavugaga ko Ubushinjacyaha bwayiteruyeho agace gato bukirengagiza ibindi bika bugamije gushinja icyaha umukiliya wabo.

Me Mutabingwa Aloys na Me Ngarambe Raphaël bari bagaragaje ko itonesha rivugwa muri iyo ngingo riba rigamije kwigwizaho umutungo mu buryo butemewe n’amategeko cyangwa ishimisha mubiri, kandi ko ntanakimwe muri ibyo umukiliya wabo yari agamije.

Urukiko rwagaragaje itonesha yakoze ritafatwa nk’aho yari agamije kwigwizaho umutungo cyangwa ishimishamubiri ahubwo ‘yasumbanishije abantu bitewe n’ubushuti bafitanye.’

Ku bijyanye no kuba abantu Camille Zuba yakiriye yarabahaga serivisi nk’umuyobozi, harimo abari bashyiriye abafungwa umuti na murumura wa Gen. Patrick Nyamvumba bari bajyaniye ibikoresho bitashoboraga kuboneka muri Kantine ya gereza, nabyo urukiko rwagihinyuye.

Rwavuze ko ibyavuzwe n’abamwunganira atari ukuri kuko hari abatangabuhamya bemeza ko hari abo yasubije inyuma ariko abo akabakira kandi ko bazaga bamaze kumuhamagara kuri telefoni.

Ni mu gihe kandi ngo hari abatangabuhamya babyemeza bavuga ko batanditswe mu gitabo cyo gusura.

Urukiko rwasabye abunganizi ba Camille na we ubwe kumva ko adafungiye kutubahiriza amabwiriza yo kwirinda COVID-19 ahubwo afungiye itonesha yakoze mu iyubahirizwa ry’ayo mabwiriza.

Umucamanza yavuze ko ibyo no kuba urukiko rwagaragaje ibyaha akurikiranyweho, uhamwe nabyo ahanishwa igifungo kitari munsi y’imyaka ibiri, aribyo byatumye urukiko rushimangira ko afungwa iminsi 30 y’agateganyo mu gihe iperereza rikomeje.

Ingingo ya 8 y’Itegeko ryerekeye kurwanya ruswa ivuga ko umuntu wese ufite mu nshingano ze guha serivisi abantu, ufata icyemezo ashingiye ku itonesha, ku bucuti, ku rwango, ikimenyane cyangwa icyenewabo ku bamugana, aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu ya miliyoni imwe y’amafaranga y’u Rwanda ariko atarenze miliyoni ebyiri.

Ubwo umuyobozi wa Gereza ya Mageragere, CSP Camille Zuba, yaburanaga mu bujurire ku ifungwa n'ifungurwa ry'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .