Urukiko rwanze kurekura Ntawukulilyayo ufungiwe muri Benin kubera ibyaha bya Jenoside

Yanditswe na Rabbi Malo Umucunguzi
Kuya 11 Mutarama 2020 saa 02:30
Yasuwe :
0 0

Urwego Mpuzamahanga Rwashyiriweho Gukora Imirimo Yasizwe n’Inkiko Mpanabyaha (IRMCT), rwafashe umwanzuro wo kutarekura Dominique Ntawukuriryayo, nyuma y’ubusabe yaherukaga kurushyikiriza asaba kurekurwa atarangije igihano.

Ntawukulilyayo wahoze ari Sous- préfet wa Gisagara, aheruka gusaba yarekurwa mbere yo kurangiza igihano cy’imyaka 20 yahawe mu bujurire mu 2012. Uyu yahamijwe kuba yarayoboye ubwicanyi ku musozi wa Kibuye, ahiciwe Abatutsi basaga 30,000.

Ntawukuliryayo yafatiwe mu Bufaransa ku wa 17 Ukwakira 2007, yohererezwa ICTR ku wa 5 Kamena 2008. Urugereko rw’ubujurire rwaje gushimangira ko ahamwa n’ibyaha bya Jenoside, rumukatira gufungwa imyaka 20.

Yabanje gufungirwa muri Mali aho yoherejwe mu 2012, ariko umucamanza Theodor Meron wayoboraga IRMCT, mu 2018 aza kwemeza ko uyu mugabo yimurirwa muri Benin ngo abe ariho arangiriza igihano.

Mu mwanzuro Perezida wa IRMCT, Umucamanza Carmel Agius yatangaje ku wa Gatatu tariki 8 Mutarama 2020, bigaragara ko Ntawululiryayo na mbere hose yasabye gufungurwa atarangije igihano, ariko ananirwa kugaragaza ingingo zihariye zatuma arekurwa, cyane ko yari ataranarangiza bibiri bya gatatu by’igifungo yakatiwe, nk’ingingo ikunze gushingirwaho.

Ku wa 1 Gashyantare 2017 yongeye kubisaba, yishingikiriza ingingo zirimo ko yafashije abana barimo n’abatutsi mu gihe cya Jenoside, ko yifuza gukomeza kurihira amashuri abana batishoboye, ko ashaka kurekurwa kubera imyaka agezemo n’ubuzima bwe butifashe neza, ndetse ko ubwo yaburanaga yafashije Ubushinjacyaha n’abacamanza kubona ukuri.

Umucamanza asuzuma ishingiro ry’ubusabe bwa Ntawukulilyayo, yavuze ko ubwanditsi bw’urwego rwasabye Mali aho yafungiwe mbere, ngo batange raporo igaragaza isesengura ku myitwarire yagize igihe yari afungiweyo kimwe n’imiterere y’ubuzima bwe, airko ntibyakorwa.

Hejuru y’ibyo, Benin nayo yatanze amakuru “igaragaza ko Ntawukulilyayo atujuje ibisabwa n’amategeko ya Benin ngo ahabwe imbabazi, asimburizwe igihano cyangwa arekurwe atarangije igifungo”, kuko aho afungiwe hujuje ibyangombwa kandi nta kindi kibazo cyihariye afite cyatuma afungurwa igihano kitarangiye.

Umucamanza yavuze ko uretse izindi ngingo, urekurwa agomba kuba nibura amaze muri gereza bibiri bya gatatu by’igifungo yakatiwe, nyamara ngo Ntawukulilyayo azuzuza bibiri bya gatatu by’imyaka 20 yakatiwe ku wa 17 Gashyantare 2021.

Ibyo ngo bihita bisobanura neza ko atemerewe gusaba kurekurwa by’agateganyo, ari naho hashingiwe mu kwanga ubusabe bwe.

Umucamanza Agius yakomeje ati “Hakurikijwe ibiteganywa n’ingingo ya 150, nagishije inama abacamanza batanze igihano mu rubanza rwa Ntawukulilyayo bakaba ari n’abazamanza b’urwego, Umucamanza Lee G. Muthoga n’Umucamanza Liu Daqun kuri ubwo busabe.”

“Kuba icyemezo cy’uko ubusabe bwa Ntawukuliryayo bukwiye kwangwa cyarahuriweho ku bwiganze kuri iki kibazo, kubw’izo mpamvu ubusabe buranzwe, ndetse nsabye ubwanditsi kumenyesha Benin, Mali n’u Rwanda iki cyemezo.”

U Rwanda rwakunze kunenga icyemezo cyo kurekura abahamijwe ibyaha bya jenoside, bagafungurwa batarangije ibihano, kubera gusa ko bamaze muri gereza bibiri bya gatatu by’igifungo bakatiwe.

Kuba rwaramaganye ubu busabe byanashingiweho mu gufata umwanzuro ku cyifuzo cya Ntawukulilyayo.

Ubusabe bwo gufungurwa mbere yo kurangiza igihano bwanatangiwe rimwe n’ubwa Col. Aloys Simba na Hassan Ngeze wahoze ari umunyamakuru muri Kangura.

Nubwo hari abarekuwe muri ubu buryo, u Rwanda rwakunze kuvuga ko bikorwa hirengagijwe ubukana bw’icyaha cya Jenoside bahamijwe, kuba nta kwicuza abarekuwe bagaragaje n’ingaruka kurekurwa kwabo kwagira ku barokotse Jenoside.

Urukiko rwanze kurekura Ntawukulilyayo wahamijwe ibyaha bya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .