Ubusabe bwa Nkubiri bwo kujyana urubanza rwe mu rukiko rw’ubucuruzi bwateshejwe agaciro

Yanditswe na Iradukunda Serge
Kuya 14 Ukuboza 2020 saa 04:59
Yasuwe :
0 0

Urukiko Rwisumbuye rwa Gasabo rwanze ubusabe bw’abunganira umunyemari Nkubiri Alfred ko rwakwiyambura ububasha bwo kumuburanisha ruvuga ko ibyaha yakoze bitaburanishirizwa mu rukiko rw’ubucuruzi nk’uko bari babyifuje.

Uyu mugabo aregwa ibyaha byo guhimba, guhindura inyandiko cyangwa gukoresha inyandiko mpimbano, guhisha ibintu byakoreshejwe cyangwa byagenewe gukoreshwa icyaha n’ubuhemu.

Mu iburanisha ryabaye ku wa 11 Ukuboza abanyamategeko be bari basabye ko uru rukiko kwiyambura ububasha bwo kumuburanisha bavuga ko ibyaha aregwa bidakwiriye kujyanwa mu nkiko ziburanisha imanza z’inshinjabyaha, ahubwo byari kuregerwa urukiko rw’ubucuruzi.

Ni icyifuzo cyari cyamaganiwe kure n’ubushinjacyaha, bwavuze ko kuba uru rubanza rwajyanwa mu rukiko rw’ubucuruzi nta shingiro bifite, kuko mu iperereza hagaragaye amalisiti ya baringa agaragaza abantu bahawe ifumbire kandi ntayo bahawe, bitandukanye no kuba icyaha gishingiye ku masezerano, ku buryo urukiko rwaregewe rufite ububasha bwo kuburanisha uru rubanza.

Kuri uyu 14 Ukuboza, ubwo hasomwaga umwanzuro kuri iki cyifuzo, urukiko rwavuze ko nta shingiro gifite cyane ko ibyaha uyu munyemari aregwa atari iby’ubucuruzi, ahubwo ko byakomotse ku masezerano y’ubucuruzi.

Urukiko rwavuze ko ikiregerwa atari amasazerano atarubahirijwe ahubwo ari ibyaha byavutsemo, bityo rwanzura ko ruzakomeza kumuburanisha.

Urubanza rw’uyu munyemari ruzakomeza kuburanishwa mu mizi ku wa 30 Ukuboza 2020.

Ibyaha uyu mugabo aregwa bifitanye isano na miliyari 2 Frw ashinjwa ko yanyereje mu bucuruzi bw’ifumbire mvaruganda binyuze mu kigo cye cya ENAS, agahimba imikono byitwa ko ari iy’abantu bafashe ifumbire mvaruganda ntibishyure, ashyiraho n’abatarayihawe kugira ngo ahabwe amafaranga na Minisiteri y’Ubuhinzi n’Ubworozi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .