Urukiko rw’Ubujurire rugiye kuburanisha Bernard Munyagishari wahamijwe ibyaha bya Jenoside

Yanditswe na Akayezu Jean de Dieu
Kuya 13 Ugushyingo 2019 saa 01:31
Yasuwe :
0 0

Urukiko rw’Ubujurire rugiye gutangira kuburanisha ubujurire bwa Bernard Munyagishari, wakatiwe n’Urukiko Rukuru igifungo cya burundu nyuma yo guhamwa n’ibyaha bya Jenoside.

Munyagishari wavukiye i Gisenyi mu 1959, yahamijwe icyaha cya Jenoside, icyaha cyo kwica nk’icyaha cyibasiye inyokomuntu. Muri Mutarama 2017, nibwo yakatiwe gufungwa burundu ahita ajuririra urukiko.

Byari biteganyijwe ko Munyagishari yitaba Urukiko rw’Ubujurire kuri uyu wa Gatatu gusa ku mpamvu z’inama yahuje abacamanza bo muri uru rukiko bituma iburanisha ryimurirwa ku wa Mbere tariki 17 Ugushyingo 2019, saa mbili n’igice z’igitondo.

Munyagishari yashinjwaga kugira uruhare muri Jenoside yakorewe Abatutsi mu 1994, ibyaha byibasiye inyokomuntu no gufata abagore ku ngufu, gusa icyo gufata ku ngufu yagihanaguweho n’Urukiko.

Uyu mugabo wakunze kuburana mu ruririm rw’Igifaransa yafashwe kuwa 25 Gicurasi 2011 muri Repubulika iharanira Demokarasi ya Congo ashyikirizwa Urukiko mpuzamahanga mpanabyaha rwashyiriweho u Rwanda ICTR, kuwa 14 Kamena 2011.

Urukiko Rukuru rwamuburanishije rwavuze ko yitabiriye inama zitandukanye zacurirwagamo umugambi wo kwica abatutsi agaha urubyiruko rw’interahamwe amabwiriza yo kubica no gufata abagore ku ngufu, kandi ngo akajya i Kigali kubashakira ibikoresho byo kubicisha birimo imihoro, amagerenade n’ibindi.

Munyagishari ngo wari ukuriye Interahamwe zo mu Mujyi wa Gisenyi, yatwaraga abatutsi bafatiwe ku mabariyeri akabajyana ahitwaga komine rouge ari naho bicirwaga, agatanga amabwiriza yo gucukura ibyobo byo kubashyiramo, ndetse akanashyiraho amatsinda y’abashoferi bagombaga kubamutwaza.

Yasomewe urubanza adahari kuko yari amaze igihe yararwikuyemo, agaragaza ko atemera abavoka yahawe. Ariko uru rubanza rwasomwe abavoka babiri baruburanaga bahari, ndetse bahita batangaza ko bajuririye iki cyemezo cy’urukiko.

Bernard Munyagishari wabaye umuyobozi wa MRND ku Gisenyi yagejejwe mu rukiko bwa mbere kuwa 20 Kamena 2011 i Arusha, aza koherezwa kuburanira mu Rwanda kuwa 24 Nyakanga 2013.

Ubwo Munyagishari yagezwaga mu Rwanda yoherejwe n'Urukiko mpuzamahanga mpanabyaha rwashyiriweho u Rwanda
Bernard Munyagishari agiye kuburanishirizwa mu Rukiko rw'Ubujurire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza