Urukiko rw’Ikirenga rwemeye ikirego gisaba ko zimwe mu ngingo z’amategeko ahana ziteshwa agaciro

Yanditswe na Akayezu Jean de Dieu
Kuya 18 Mutarama 2019 saa 03:40
Yasuwe :
0 0

Urukiko rw’Ikirenga rugiye gutangira kuburanisha ikirego cy’Umunyamategeko Mugisha Richard, wareze leta asaba ko zimwe mu ngingo zasohotse mu itegeko rishya rihana ibyaha mu Rwanda zakurwamo, kuko zibangamiye Itegeko Nshinga rya Repubulika y’u Rwanda.

Mu ntangiro z’Ukuboza 2018 nibwo Me Mugisha yageze imbere y’Urukiko rw’Ikirenga humvwa ikirego cye, aherekejwe n’abamwunganira, Me Nkundabarashi Moïse na Me Kabasinga Florida.

Ingingo yagaragajeho ikibazo ziri mu byiciro bibiri, kimwe kirimo iya 154, 233 n’iya 236 zigaruka ku gusebanya bafata nk’izibangamiye ubwisanzure bw’itangazamakuru, ikindi kikabamo ingingo ya 136, 138 na 139 bavuga ko zibangamiye ubwiyunge bw’abagabo n’abagore.

Icyo gihe Umunyamategeko wari uhagarariye Guverinoma mu rubanza, Spéciose Kabibi, yavuze ko Mugisha nta bubasha afite bwo gutanga iki kirego, amusaba kugaragaza niba hari itsinda ahagarariye mu rubanza ryaba iry’abanyamakuru cyangwa abanyamategeko.

Bitabaye ibyo, ngo niba yarabikoze nk’umuturage usanzwe akwiye kugaragaza inyungu afite muri uru rubanza. Kabibi kandi yasabye urukiko gutesha agaciro ikirego cya Me Mugisha cyane ko atigeze agaragaza aho izo ngingo zaba zaramubangamiye.

Yanavuze ko ikirego kidashobora kwakirwa igihe urega adafite impamvu n’ubushobozi, ari nayo mpamvu Mugisha Richard yagombye kugaragaza inyungu afite muri uru rubanza.

Ubwo umwanzuro w’urukiko watangazwaga kuri uyu wa 18 Mutarama 2019, mu isomwa ry’urubanza ryatangiye ahagana saa 11:45, Perezida w’Urukiko rw’Ikirenga, Prof Sam Rugege, yahereye ku bubasha Mugisha afite bwo gutanga ikirego.

Prof. Sam Rugege yavuze ko mbere yo gusuzuma inyungu z’uwatanze ikirego, urukiko rusanga ari ngombwa kumenya niba leta ishobora gutanga inzitizi zo kutakira ikirego mu manza zisaba ko itegeko ribangamiye Itegeko Nshinga rikurwaho.

Yavuze ko itegeko rigena ububasha bw’inkiko ritegeka ko iburanisha ry’ikirego gisaba kwemeza ko itegeko rinyuranye n’itegeko nshinga, rikorwa mu ruhame hari uhagarariye leta. Ariko ngo ntaho biteganyijwe ko ari leta iregwa, ahubwo iza mu rubanza kugaragaza aho ihagaze ku myumvire y’itegeko risabirwa kuvanwaho, bitewe n’uko ariyo ihagarariye inyungu za rubanda.

Bityo ngo ibyavuzwe n’intumwa ya leta muri uru rubanza bigomba gusuzumwa nk’ibitekerezo aho kuba inzitizi.

Perezida w’Urukiko rw’Ikirenga yavuze ko n’ubwo ibirego nk’ibi bidakunze kubaho mu Rwanda, hasesenguwe ingero z’imanza zaciwe mu bindi bihugu rusanga Me Mugisha afite inyungu ku kirego yatanze mu rukiko.

Yakomeje avuga ko itegeko riteganya ibyaha n’ibihano rireba abashobora gukurikiranwaho icyaha kandi rireba buri wese na Me Mugisha arimo.

Ati “Mu buryo bumwe cyangwa ubundi iri tegeko rireba Me Mugisha watanze iki kirego. Urukiko rusanga afite inyungu zo gusaba kwemeza ko zimwe mu ngingo zaryo zinyuranye n’Itegeko Nshinga, nk’umwe mu bo bireba ashobora gukurikiranwaho ibyaha.”

Prof. Rugege yasoje avuga ko urukiko rusanga Me Mugisha afite inyungu zo gutanga ikirego, bivuze ko iburanisha rizakomeza.

Urubanza ruzatangira kuburanishwa mu mizi ku wa 18 Werurwe 2019, saa Mbili za mu gitondo.

Urukiko rwasabye abantu gutanga ibitekerezo

Prof Rugege yavuze ko akurikije uburemere bw’iki kibazo, ahamagarira abantu ku giti cyabo, ibigo n’imiryango itari iya leta n’abandi bose bifuza gutanga ibitekerezo byabo kuri izi ngingo, ko babigeza ku Rukiko rw’Ikirenga bikazafasha mu gukomeza gusesesengura neza iki kibazo.

Yagize ati “Kubera uburemere bw’ibibazo bizasuzumwa muri uru rubanza, hagendewe ku kuba nta zindi manza zaciwe n’inkiko z’u Rwanda, urukiko rurasaba abifuza gutanga ibitekerezo muri uru rubanza ko babimenyesha ubwanditsi bw’Urukiko rw’Ikirenga bitarenze tariki 2 Gashyantare 2019.”

Ababyifuza bahawe kugeza ku wa 28 Gashyantare 2019, bakaba bagejeje ku rukiko inyandiko zikubiyemo ibitekerezo byabo kuri iki kibazo.

Umuyobozi w’Ishyirahamwe ry’abanyamakuru mu Rwanda (ARJ), Muganwa Gonzague, yabwiye IGIHE ko biteguye kugeza ibitekerezo byabo ku rukiko, by’umwihariko ku bijyanye n’ingingo zishobora kubangamira ubwisanzure bw’itangazamakuru.

Ati “Natwe nk’ishyirahamwe ry’abanyamakuru tuzazana ibitekerezo byacu nabyo bisuzumwe.”

Indi nkuru wasoma: Umunyamategeko yitabaje Urukiko rw’Ikirenga asaba ko zimwe mu ngingo z’amategeko ahana ziteshwa agaciro

Umunyamategeko Mugisha Richard ashaka ko zimwe mu ngingo ziri mu Itegeko rishya rihana ibyaha zivanwamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza