Urujijo ku mpamvu umunyarwanda yiciwe muri Uganda agahita ashyingurwa n’abapolisi

Yanditswe na Musangwa Arthur
Kuya 7 Mutarama 2020 saa 10:27
Yasuwe :
0 0

Undi munyarwanda aherutse kwicirwa muri Uganda mu buryo bubi, Félicien Mbonabaheka yatewe n’abagizi ba nabi bamwica bamutemesheje umuhoro mu ijoro ryo ku wa 31 Ukuboza 2019 aho yari atuye i Kisoro.

Nyuma y’urwo rupfu, Polisi ya Uganda yihutiye kumushyingura. Ntiyamenyesheje umuntu uwo ariwe wese wo mu muryango wa nyakwigendera ndetse nta n’iperereza ryigeze rikorwa ku rupfu rwa Mbonabaheka cyangwa se ngo umurambo we ube warakorewe isuzuma.

Bivugwa ko gushyingurwa kwe mu buryo bwa huti huti kwitabiriwe n’abapolisi bazanye umurambo gusa mu irimbi rya Kisoro.

Amakuru yagiye hanze agaragaza ko mbere y’uko Mbonabaheka ashyingurwa, urupfu rwe rwaje mu buryo busa no kwibeshya. Abamwishe bari bagambiriye kugirira nabi undi munyarwanda wirwa Bayavuge Denys Bwenge wari uturanye na nyakwigendera.

Mbonabaheka ni undi munyarwanda uburiye ubuzima bwe muri Uganda nyuma y’abandi benshi bagiye bapfa mu bihe bitandukanye.

Hari uwitwa Janvier Nsanzimana wari ufite imyaka 21 aho muri Nyakanga umwaka ushize yahohotewe n’abagizi ba nabi bamuteye we na mukuru we Jean d’Amour Rwabayeho, ahitwa Kyenjojo mu Burengerazuba bwa Uganda.

Rwabayeho yagerageje gutoroka, gusa Nsanzimana aza gutemwa hakoreshejwe umuhoro nyuma yitaba Imana.

Ibi ni ibikorwa by’ubugizi bwa nabi bikorerwa abanyarwanda muri Uganda ababikoze ntibanakurikiranwe n’amategeko. Amasezerano y’amahoro ya Luanda yasinywe umwaka ushize, yari agamije guca burundu ibi bikorwa byo kugirira nabi abanyarwanda bikorwa n’ubuyobozi muri Uganda.

Gusa ibikorwa by’ubugizi bwa nabi bikomeje gukorerwa abanyarwanda bigizwemo uruhare n’inzego z’umutekano muri Uganda bikomeje gufata intera ndetse Museveni yakomeje inzira ye yo gufasha imitwe yitwaje intwaro igamije guhungabanya uRwanda.

Bigendanye n’ibikorwa nk’ibi birimo iyicwa rya Mbonabaheka n’abandi, abanyarwanda bagiye bafatirwa i Kisoro ari igihiriri cyangwa se abagenda bajugunywa ku mipaka nyuma y’igihe bafunzwe mu buryo bunyuranyije n’amategeko; bigaragaza ko Uganda itigeze iha agaciro amasezerano ya Luanda.

Ubu ikibazo kiri kwibazwa n’abantu benshi bakurikiranira hafi iby’umubano w’u Rwanda na Uganda, ni ’Ese ni iyihe mpamvu Polisi ya Uganda yihutiye gushyingura Mbonabaheka itamenyesheje umuryango we cyangwa Ambasade y’u Rwanda i Kampala? Ese ni ukubera iki itigeze ikora iperereza ku rupfu rwe?’

Mu myaka itatu ishize, Urwego rushinzwe ubutasi mu Gisirikare cya Uganda, CMI, rwakunze kurangwa n’ibikorwa byo gushinja, guhohotera no gukorera iyicarubozo abanyarwanda rufatanyije n’umutwe w’iterabwoba wa RNC.

Kwitandukanya n’iyi mitwe ifite imigambi yo gukora amabi mu Rwanda ni kimwe mu bintu Uganda yari yiyemeje mu masezerano ya Luanda, gusa ntacyagezweho kuva yasinywa.

Mbere y’uko umwaka urangira, Urwego rushinzwe Umutekano w’imbere mu gihugu muri Uganda, ISO, rwataye muri yombi abanyarwanda babiri rubashinja ko bari gutegura ibitero by’iterabwoba kuri hotel zo muri Uganda, rubafungira mu nzu z’ibanga ziherereye ahitwa Kyengera.

ISO yavuze ko yakurikiranye abo banyarwanda babiri ikabafatira muri gare aho ngo bari bohereje umubare munini w’amafaranga ku bantu b’abagizi ba nabi.

Gusa amakuru yaje kugaragaza ko ibyo byari ibihuha nk’uko abo mu miryango yabo babitangaje, aho umwe yari avuye kuri Ambasade y’u Rwanda gushaka ibyangombwa by’umwana we. Undi aho yafatiwe nawe ntihari hafi y’aho bategera imodoka.

Ibikorwa by’ubugizi bwa nabi ku banyarwanda kandi mu minsi ishize byafashe indi ntera bigera no kuba byagirwamo uruhare n’abaturage basanzwe.

Umwe witwa Musinguzi, umugabo w’umugore witwa Nyiramwiza Pascaline yagerageje kumwica birangira yikase ikiganza cy’iburyo.

Musinguzi yavuze ko kwica umugore we byari nko kwica abandi banyarwanda muri Uganda. Ibi bigaragaza ko ubugizi bwa nabi ku banyarwanda busa n’ubwamamajwe ndetse bugatangirwa n’uburenganzira bwo kwica buri wese kuko ari umunyarwanda.

Uganda nta bushake yigeze igaragaza mu bikorwa byo kwamagana ubu bugizi bwa nabi bukorerwa abanyarwanda. Mu myaka ishize, imodoka z’abanyarwanda ziva muri Uganda, zagiye ziterwa amabuye, abarimo bagakomeretswa.

U Rwanda mu kurinda umutekano w’abaturage barwo, rwabasabye guhagarika ingendo zigana muri Uganda kuko umutekano wabo utizewe.

Ubu ikibabaje ni abanyarwanda batuye muri Uganda bakomeje gukorerwa ibikorwa bya mfura mbi nka Mbonabaheka.

Umuryango wa nyakwigendera wasazwe n'agahinda nyuma y'uko ubuze uwo wakundaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza